Ezekiel 12 - Ti Baro a Naimbag a Damag Biblia

Ni Ezekiel a kas Naitalaw a Balud

¹ Nagsao ti Apo kaniak.

² Kinunana, “Anak ti tao, agnaedka iti sidong dagiti nasukir a tattao. Adda matada, ngem saanda a makakita; adda lapayagda, ngem saanda a makangngeg agsipud ta nasukirda.

³ “Ita, anak ti tao, agbalkotka a kasla napagtalaw a mapan iti adayo. Agrubbuatka sakbay a rumabii tapno makita ti tunggal maysa a pumanawka. Nalabit a makitadaka dagiti nasukir a tattao.

⁴ No nangato pay laeng ti init, isaganamon ti awitmo a maitalaw tapno makitadaka. Iti sumipnget, ipakitam kadakuada ti ipapanawmo a kas mapagtalaw a balud.

⁵ Iti imatangda, abutam ti bakud ti balaymo ket ditoy ti pangiruaram iti kargam.

⁶ Ipakitam ti panangibaklaymo kadagiti gargaretmo. Rummuarka a mapan iti nasipnget ket abbongam dagiti matam tapno dimo makita ti papanam. Pakaballaagan kadagiti Israelita ti aramidem.”

⁷ Tinungpalko ti imbilin ti Apo kaniak. Iti dayta nga aldaw idi agsipngeten, insaganak ti awitko a kasla mapagtalaw a balud ket binutbutak ti bakud. Kitkitaenda ti panangibaklayko iti awitko ket rimmuarak.

⁸ Kabigatanna, nagsao ti Apo kaniak.

⁹ Kinunana, “Anak ti tao, ita ta salsaludsoden dagiti nasukir nga Israelita no ania ti ar-aramidem,

¹⁰ ibagam kadakuada a siak ti Apo a Dios. Kastoy ti kunak kadakuada. Agpaay daytoy a mensahe iti prinsipe nga agdama nga agturay iti Jerusalem ken amin a tattao nga agnanaed sadiay.

¹¹ Ibagam kadakuada a ti inaramidmo ti pagilasinan iti mapasamakto kadakuada—maitalawdanto a kas balud iti sabali a daga.

¹² Ibaklayto ti prinsipe a mangiturturay kadakuada dagiti gargaretna iti kasipngetan ket aglibasto a rummuar iti abut a naaramid a ruaranna. Abbongannanto dagiti matana tapno saanna a makita ti papananna.

¹³ Ngem isarwagkonto kenkuana ti iketko, ket matiliwto. Ipankonto iti siudad ti Babilonia a pakatayanna nupay dina makita dayta a daga.

¹⁴ Iwarawarakto iti amin a suli ti daga dagiti ofisiales ti palasiona, dagiti mamalbalakad kenkuana ken dagiti para-bantayna. Birokento ida dagiti tattao tapno papatayenda ida.

¹⁵ “Maammoandanto a siak ni Yahweh inton iwarawarak ida kadagiti nasion ken kadagiti sabali a pagilian.

¹⁶ Ipaluboskonto ti sumagmamano kadakuada a makalasat iti gubat, bisin ken sakit tapno mabigbigda a makarimon dagiti aramidda ken maammoanda a siak ni Yahweh.”

Ti Pagilasinan iti Agtigtigerger a Profeta

¹⁷ Nagsao ti Apo kaniak.

¹⁸ Kinunana, “Anak ti tao, agtigergerka no manganka ken agpigergerka iti buteng no uminumka.

¹⁹ Ibagam kadagiti amin nga umili a daytoy ti sao ti Apo a Dios kadagiti taga-Jerusalem nga agnanaed pay la iti dagada: Agtigergerdanto no manganda ken agpigergerdanto iti buteng no uminumda. Aglangalangto ti daga gapu ta managdakdakes dagiti amin nga agnaed sadiay.

²⁰ Madadaelto dagiti siudad a napno ita kadagiti tattao, ket agbalinto a let-ang ti pagilian. Iti kasta, mabigbigdanto a siak ni Yahweh.”

Matungpal a Matungpal ti Sao ni Yahweh

²¹ Nagsao ti Apo kaniak.

²² Kinunana, “Anak ti tao, apay nga ulit-uliten dagiti Israelita daytoy a pagsasao: ‘Aglabas ti tiempo, ket saan a pumayso dagiti padto’?

²³ Ita, ibagam kadakuada a siak nga Apo a Dios, kastoy ti kunak maipapan iti dayta. Gibusak dayta a pagsasao. Ket saanton a maisawang iti Israel. Ibagam ketdi kadakuada nga asidegen ti tiempo ket matungpalen dagiti padto!

²⁴ “Awanton ti ulbod a parmata wenno makaallilaw a padto kadagiti Israelita.

²⁵ Siak, ni Yahweh, kasaokto ida, ket matungpalto ti ibagak. Saanen a maitantan. Iti tiempoyo, dakay a nasukir a tattao, tungpalek ti imballaagko nga aramiden kadakayo. Nasaokon,” kuna ti Apo a Dios.

²⁶ Kinuna ti Apo kaniak,

²⁷ “Anak ti tao, ipagarup dagiti Israelita a mabayag pay ti pannakatungpal dagiti padto ken parmatam. Kunada nga ipadpadtom ti mapasamakto iti adayo a masakbayan.

²⁸ Ibagam ngarud kadakuada a siak nga Apo a Dios daytoy ti kunak, Saanen a maitantan. Matungpal a matungpal ti imbagak. Siak, ti Apo a Dios, ti agsasao.”