Ezekiel 11 - Ti Baro a Naimbag a Damag Biblia

Dusaento ti Dios ti Jerusalem

¹ Impangatonak ti espiritu ti Dios ket impannak iti akindaya a ruangan ti Templo. Iti asideg ti ruangan, nakitak ti 25 a lallaki, agraman dua kadagiti pangulo ti nasion, da Jaazanias nga anak ni Azzur ken Pelatias nga anak ni Benaias.

² Kinuna ti Dios kaniak, “Anak ti tao, agplano dagitoy a tattao iti dakes ket saan a nasayaat ti pammagbagada iti daytoy siudad.

³ Kunada, ‘Iti saan a mabayag, agbangontayo manen kadagiti balbalay. Natalgedtayo ditoy siudad uray no arigtayo ti karne iti uneg ti kaldero.’

⁴ Ita ngarud, ibutaktakmo ti kinadakesda.”

⁵ Inturayannak ti espiritu ti Apo, ket imbaga ti Apo kaniak nga ipakaammok daytoy a mensahe kadagiti tattao, “Dakayo nga Israelita, ammok ti sasawenyo ken no ania ti pangpanggepenyo.

⁶ Adu unay ti pinapatayyo a tattao iti daytoy a siudad, ket napno dagiti kalsada kadagiti bangkay.

⁷ “Ngarud, siak, ti Apo a Dios, kastoy ti kunak kadakayo. Ala wen, mayarig ti siudad iti kaldero, ngem ania ti karne a mailuto? Dagiti bangkay dagiti pinapatayyo! Awankayto ditoy—ipurruakkayo iti ruar ti siudad!

⁸ Kabutengyo ti kampilan? Yegkonto dagiti lallaki a nagtagikampilan a mangdarup kadakayo.

⁹ Iruarkayo iti siudad, ket yawatkayo iti pannakabalin dagiti ganggannaet. Inkeddengko a mapapataykayo

¹⁰ ket mataykayto iti gubat iti bukodyo a daga. Iti kasta, maammoanto ti amin a siak ni Yahweh.

¹¹ Dinakayto salakniban daytoy a siudad a kas iti panangsalaknib ti kaldero iti karne a linaonna. Dusaenkayto uray sadinoman nga ayanyo iti daga ti Israel.

¹² Maammoanyonto a siak ni Yahweh, ket bayat ti panangsalimetmetyo kadagiti linteg dagiti kabangibang a nasion, sinalsalungasingyo dagiti lintegko ken sinuksukiryo dagiti bilinko.”

¹³ Idi agipadpadtoak, napasag ni Pelatias ket natay. Nagpaklebak ket impukkawko, “O Apo a Dios, papatayem kadi ti tunggal maysa a natda iti Israel?”

Ti Kari ti Dios Kadagiti Napagtalaw

¹⁴ Nagsao ti Apo kaniak.

¹⁵ Kinunana, “Anak ti tao, sika ken dagiti padam nga Israelita a napagtalaw a kas balud ti sarsaritaen dagiti agnaed idiay Jerusalem. Kunada, ‘Adayo unay dagiti napagtalaw ket dida mabalin ti agdaydayaw iti Apo. Dakami ti nangipatawidanna iti daytoy a daga.’

¹⁶ “Ita, ibagam daytoy kadagiti kaduam a napagtalaw. Siak ti nangibaon kadakuada nga agnaed kadagiti adayo a pagilian ket inwarawarak ida kadagiti nadumaduma a nasion. Nupay kasta, siakto ti agpaay a santuarioda bayat ti kaaddada iti sadinoman a pagilian a nakaipananda.

¹⁷ “Ibagam ngarud kadakuada ti saok, siak nga Apo a Dios. Iruarkonto ida kadagiti nasion a nakaiwarawaraanda ket isublikto kadakuada ti daga ti Israel.

¹⁸ Inton dumtengda, masapul nga ikkatenda dagiti amin a narugit ken makarimon nga imahen a masarakanda.

¹⁹ Ikkakto ida iti baro a puso ken baro a panunot. Ikkatekto ti bimmato a pusoda ket sukatakto iti puso a natulnog.

²⁰ Iti kasta, annurotendanto dagiti lintegko, ket tungpalendanto a sipapasnek dagiti bilinko. Isudanto dagiti tattaok, ket siakto ti Diosda.

²¹ Ngem dusaekto dagiti tattao a pagay-ayatda ti agdaydayaw kadagiti narugit ken makarimon nga imahen. Dusaekto ida gapu iti inaramidda. Siak, ti Apo a Dios, ti agsasao.”

Panawan ti Dayag ti Dios ti Jerusalem

²² Timmayab dagiti nagpayak a parsua ket simmurot dagiti pilid kadakuada. Adda iti ngatoenda ti makapurar a lawag a mangipakita iti kaadda ti Dios ti Israel.

²³ Kalpasanna, pinanawan ti makapurar a lawag ti siudad, ket napan iti tapaw ti bantay iti daya ti siudad.

²⁴ Iti parmata, impangatonak ti espiritu ti Dios, sanak insubli iti ayan dagiti napagtalaw a kas balud idiay Babilonia. Kalpasanna, nagin-inut a napukaw ti parmata,

²⁵ ket imbagak kadagiti napagtalaw ti amin nga imparangarang kaniak ti Apo.