Exodo 24 - Ti Baro a Naimbag a Damag Biblia

Mapatalgedan ti Tulag

¹ Kinuna ni Yahweh ken ni Moises, “Sumang-atka ditoy bantay. Itugotmo da Aaron, Nadab, Abiu ken ti pitopulo kadagiti panglakayen ti Israel. Inton adayokayo pay laeng iti ayanko, agkurnokayo iti panagdaydayaw.

² Sikanto laeng ti umasideg. Dinto umasideg dagiti kakadduam. Ket saan met a mapalubosan dagiti tattao a sumang-at iti bantay.”

³ Napan imbaga ni Moises kadagiti tattao ti amin a bilin ken alagaden nga inted ni Yahweh. Sangsangkamaysada amin a simmungbat, “Aramidenmi ti amin nga imbaga ti Apo.”

⁴ Insurat ni Moises dagiti amin a bilin ni Yahweh. Iti agsapa iti sumuno nga aldaw, nangbangon iti altar iti arisadsad ti bantay ken nangipatakder iti 12 a baton-lagip a mangibagi kadagiti 12 a tribu ti Israel.

⁵ Kalpasanna, binilinna ti sumagmamano nga agtutubo a lallaki a mangpuor kadagiti animal a kas sagut ken ni Yahweh ken mangidatag iti sumagmamano a toro a baka a kas daton a pakikappia.

⁶ Inkabil ni Moises kadagiti palanggana ti kagudua ti dara dagiti napapatay nga animal ket insuyatna iti altar ti nabati.

⁷ Innalana ti libro ti tulag a nakailanadan dagiti bilin ni Yahweh sana binasa iti napigsa. Kinuna dagiti tattao, “Agtulnogkami iti Apo ket tungpalenmi amin nga imbilinna.”

⁸ Innala ni Moises ti dara nga adda kadagiti palanggana ket winarisanna dagiti tattao. Kinunana, “Daytoy ti dara a mangpatalged iti pannakitulag ti Apo kadakayo idi intedna amin dagitoy a bilin.”

⁹ Simmang-at da Moises, Aaron, Nadab, Abiu ken ti 70 kadagiti panglakayen ti Israel iti bantay.

¹⁰ Nakitada ti Dios ti Israel. Adda iti babaen ti sakana ti umasping iti pagnaan a nabaldosaan iti safiro ken asul a kas iti tangatang.

¹¹ Saan nga inan-ano ti Dios dagitoy a panglakayen iti Israel. Nakitada ti Dios. Kalpasanna, nagpapangan ken nagiinumda.

Ni Moises iti Tapaw ti Bantay Sinai

¹² Kinuna ni Yahweh ken ni Moises, “Sumang-atka iti bantay ket umayka iti ayanko. Agyanka ditoy ket itedkonto kenka dagiti dua a tapi a bato a nakailanadan dagiti linteg ken bilin nga insuratko nga annuroten dagiti tattao.”

¹³ Nagsagana ni Moises ken ni Josue a katulonganna ket simmang-at ni Moises iti nasantoan a bantay.

¹⁴ Kinuna ni Moises kadagiti panglakayen, “Urayendakami ditoy agingga nga agsublikami. Mabati da Aaron ken Hur. Isuda ti papanan ti siasinoman nga adda parikutna.”

¹⁵ Simmang-at ni Moises ket adda ulep a nangkumot iti Bantay Sinai.

^16-17 Bimmaba iti rabaw ti bantay ti makapurar a lawag a mangipakdaar iti kaadda ni Yahweh. Iti panagkita dagiti Israelita, ti lawag ket kasla apuy a gumilgil-ayab iti tapaw ti bantay. Innem nga aldaw a kinumotan ti ulep ti bantay. Iti maikapito nga aldaw, manipud iti ulep, inawagan ni Yahweh ni Moises.

¹⁸ Simrek ni Moises iti ulep iti isasang-atna iti bantay. Nagyan idiay iti las-ud ti 40 nga aldaw ken rabii.