Exodo 16 - Ti Baro a Naimbag a Damag Biblia

Ti Mana ken dagiti Tukling

¹ Manipud Elim, nagrubbuat ti entero a bunggoy dagiti Israelita. Iti maika-15 nga aldaw iti maikadua a bulan kalpasan ti ipapanawda idiay Egipto, dimtengda iti let-ang ti Sin nga adda iti nagbaetan ti Elim ken Sinai.

² Nagreklamoda iti maibusor kada Moises ken Aaron idiay let-ang.

³ “Pinataynakami la koman ti Apo idi idiay Egipto,” kinunada. “Sadiay, agum-umakam idi a mangan iti karne ken dadduma pay a taraon. Ngem inyegdakami ditoy let-ang tapno patayendakam iti bisin.”

⁴ Kinuna ni Yahweh ken ni Moises, “Pagtudoekto iti taraon nga agpaay kadakayo amin. Masapul a rummuar dagiti tattao nga agurnong iti umdas a kanenda iti tunggal aldaw. Kastoy ti panangsuotko kadakuada no tungpalenda met laeng dagiti bilinko.

⁵ Iti maikanem nga aldaw, masapul a doblienda ti masansan nga urnongenda iti inaldaw ket isaganada.”

⁶ Iti kasta, kinuna da Moises ken Aaron kadagiti Israelita, “Ita a rabii, maammoanyo a ti Apo ti nangiruar kadakayo idiay Egipto.

⁷ Inton agsapa no bigat, makitayonto ti dayag ti Apo. Nangngegna ti panagsaoyo iti maibusor kenkuana. Wen, isu ti nagsaoanyo iti dakes ta ipatpatungpalmi laeng dagiti bilinna.”

⁸ Innayon pay ni Moises, “Iti rabii, mangted ti Apo iti karne a sidayo. Iti bigat, ikkannakayo iti tinapay ingganat' mapnekkayo agsipud ta nangngegna ti nakaro a panagsaoyo iti maibusor kenkuana. No agreklamokayo kadakami, awan sabali a pagreklamoanyo no di ti Apo.”

⁹ Kinuna ni Moises ken ni Aaron, “Ibagam kadagiti amin a tattao a dumatagda iti Apo ta nangngegna dagiti reklamoda.”

¹⁰ Idi madama a kasasao ni Aaron dagiti tattao, timmaliawda iti let-ang ket pagammoan nagparang ti dayag ni Yahweh iti ulep.

¹¹ Kinuna ni Yahweh ken ni Moises,

¹² “Nangngegko ti reklamo dagiti Israelita. Ibagam kadakuada, nga iti sumipnget, addanto karne a sidada, ket iti agsapa, agum-umadanto a mangan iti tinapay. Iti kasta, maammoandanto a siak ni Yahweh a Diosda.”

¹³ Iti rabii, dimteng ti adu a pogo ket pinunnoda ti kampo. Iti agsapa, naaplagan iti linnaaw ti aglawlaw iti kampo.

¹⁴ Idi awanen ti linnaaw, adda dagiti naingpis a banag a kasla nagbalay a danum iti rabaw ti daga.

¹⁵ Idi makita dagiti Israelita, dida ammo no ania dagitoy ket nagsisinnaludsodda, “Ania dagitoy?” “Daytoy ti taraonyo nga inted ti Apo,” kinuna ni Moises kadakuada.

¹⁶ “Imbilin ti Apo nga agurnong ti tunggal maysa iti umdas a kanenna. Maysa a kasukat ti agpaay iti tunggal kameng ti familiana.”

¹⁷ Inaramid daytoy dagiti Israelita. Adda dagiti nagala iti adu. Adda met dagiti bassit ti innalana.

¹⁸ Idi sukatenda, saan a nagsobra dagiti nagurnong iti adu ket saan met a nagkurang dagiti bassit ti innalana. Nagurnong ti tunggal maysa iti apag-isu a masapulna.

¹⁹ Kinuna ni Moises kadakuada, “Awan ti agidulin iti tinapay nga agpaay iti sumuno nga aldaw.”

²⁰ Ngem adda dagiti saan a nangipangag ken ni Moises. Nagibatida iti para bigat ngem inigges ken nabangles ket nakaunget ni Moises kadakuada.

²¹ Tunggal agsapa, agala dagiti tattao iti umdas a kasapulan ti tunggal maysa. Ngem no pumudot ti init, marunaw dagiti saan a naala.

²² Iti maikanem nga aldaw, agurnongda iti mamindua ti kaadu ti makan—dua a kasukat ti tunggal tao. Napan amin a pangulo dagiti umili ken ni Moises ket impadamagda daytoy kenkuana.

²³ Kinuna ni Moises kadakuada, “Kuna ti Apo a nasantoan nga aldaw a panaginana inton bigat. Naidaton daytoy kenkuana. Imbilinna a lutoenyo ti kayatyo a lutoen—yorno wenno ipaburekyo. Idulinyo ti teddayo para iti sumuno a bigat.”

²⁴ Inaramidda ti imbilin ni Moises. Saan a nabangles wenno inigges dagiti natda nga indulinda.

²⁵ Iti sumuno nga aldaw, kinuna ni Moises, “Kanenyo daytoy ita nga aldaw agsipud ta daytoy ti Aldaw a Panaginana a maipaay iti Apo. Awan ti masarakanyo a makan iti ruar ti kampo.

²⁶ Iti las-ud ti innem nga aldaw, agurnongkayo iti makan ngem iti maikapito, awanto ti maalayo.”

²⁷ Iti maikapito nga aldaw, adda latta dagiti mapan nagala iti makan ngem awan nasarakanda.

²⁸ Kinuna ngarud ni Yahweh ken ni Moises, “Inton-ano ti panagsardengyo a mangsukir kadagiti bilinko?

²⁹ Laglagipenyo a siak ni Yahweh, inikkankayo iti Aldaw a Panaginana. Isut' gapuna nga iti maikanem nga aldaw, ikkankayo iti kanenyo nga umanay iti dua nga aldaw. Agyan ti tunggal maysa iti balayna iti maikapito nga aldaw. Awan ti rummuar.”

³⁰ Iti kasta, naginana dagiti tattao iti maikapito nga aldaw.

³¹ Mana ti impanagan dagiti Israelita iti dayta a taraon. Mayarig iti bassit a bukel a puraw ket kasla kankanen nga adda dirona.

³² Kinuna ni Moises, “Imbilin ti Apo a mangidulintayo iti mana tapno makitanto dagiti kaputotantayo no ania ti taraon nga impakanna kadatayo iti let-ang kalpasan nga inruarnatayo idiay Egipto.”

³³ Kinuna ni Moises ken ni Aaron, “Mangalaka iti putik. Kargaam iti maysa a kasukat iti mana samo ikabil iti sango ti Apo ket maidulin tapno makitanto dagiti kaputotanyo.”

³⁴ Kas imbilin ni Yahweh ken ni Moises, inkabil ni Aaron ti putik iti sangoanan ti Lakasa ti Tulag tapno maidulin.

³⁵ Uppat a pulo a tawen a mana ti kinkinnan dagiti Israelita agingga a dimtengda iti daga ti Canaan ket nagnaedda sadiay.

³⁶ (Omer ti pagsukatanda idi nga apagkasangapulo iti efa a dandani dua a litro ti kaibatoganna.)