Ester 6 - Ti Baro a Naimbag a Damag Biblia

Padayawan ti Ari ni Mardokeo

¹ Alimbasagen ti ari iti dayta met laeng a rabii, isut' gapuna a pinaalana ti libro a nakailanadan dagiti mapaspasamak iti pagarian. Naibasa kenkuana ti libro.

² Iti maysa a paset a naibasa, nairaman ti pakasaritaan ti pannakatakuat ni Mardokeo iti panggep da Bigtana ken Teres a mangpapatay iti ari. Dua nga eunoko dagitoy iti palasio a mangguguardia iti kuarto ti ari.

³ Sinaludsod ti ari, “Nagunggonaan kadi wenno napadayawan ni Mardokeo iti daytoy nga inaramidna?” Imbaga dagiti adipenna nga awan ti naipaay ken ni Mardokeo.

⁴ Sinaludsod ti ari, “Siasino kadagiti ofisialesko ti adda iti palasio?” Nairana a simrek ni Haman iti akinruar a paraangan; napan iti palasio tapno dawatenna iti ari a mabitay ni Mardokeo iti pagbitayan a naisaganan.

⁵ Iti kasta, kinuna dagiti adipenna, “Adda ditoy ni Haman nga agur-uray a makisao kenka.” “Pastrekenyo,” imbilin ti ari.

⁶ Simrek ni Haman ket sinaludsod ti ari kenkuana, “Adda maysa a tao a kayatko unay a padayawan. Ania ti rumbeng nga ipaayko iti dayta a tao?” Gapu ta ipagarup ni Haman nga isu a mismo ti mapadayawan,

^7-8 kinunana iti ari, “Agpaalaka iti nadaeg a pagan-anay, ti mismo a pagan-anay nga ikawkawesmo, ket itedmo iti daytoy a tao. Paguarnasionam iti napintas ti bukodmo a kabalio a pagsakayanna.

⁹ Kalpasanna, ayabam ti maysa kadagiti kangatoan nga ofisialesmo tapno kawesanna ken iruarna ti tao a nakakabalio iti plasa ti siudad. Paipukkawmo daytoy iti ofisial bayat ti pannagnada: ‘Kitaenyo no kasano a gunggonaan ti ari ti tao a kayatna a padayawan!’”

¹⁰ Iti kasta, kinuna ti ari ken ni Haman, “Inka alaen a dagus ti pagan-anay ken ti kabalio ket padayawam ni Mardokeo a Judio. Aramidem amin kenkuana dagiti insingasingmo. Masarakam ni Mardokeo nga agtugtugaw iti ruangan ti palasio.”

¹¹ Napan ngarud innala ni Haman ti pagan-anay ken ti kabalio. Kinawesanna ni Mardokeo sana pinagsakay iti kabalio ket inlibutna iti plasa ti siudad. Bayat ti pannagnada, ipukpukkawna, “Kitaenyo no kasano a gunggonaan ti ari ti tao a kayatna a padayawan!”

¹² Nagsubli ni Mardokeo iti ruangan ti palasio. Nagawid met ni Haman a mangab-abbong iti rupana gapu iti bain.

¹³ Imbagana ken ni Zeres nga asawana ken kadagiti amin a gagayyemna ti amin a napasamak kenkuana. Kinuna ni Zeres ken dagiti masirib a gagayyemna: “Mangrugin a mayallatiw ti pannakabalinmo ken ni Mardokeo. Gapu ta maysa a Judio, narigatmo ti mangibaba kenkuana—ikabilnanto ti amin a kabaelanna a mangdadael kenka.”

Mabitay ni Haman

¹⁴ Agsasaritada pay laeng idi sumangpet dagiti eunoko ti palasio ket nagdardarasda nga innala ni Haman tapno dumar-ay iti pasken nga insagana ni Ester.