Eclesiastes 8 - Ti Baro a Naimbag a Damag Biblia

¹ Ti la masirib ti makaammo iti pudno a kaipapanan ti maysa a banag. Ti kinasirib ti mangtignay kenkuana nga umisem ket pukawenna ti rupangetna.

Panagtulnog iti Ari

² Tungpalem ti ibaga ti ari ket amirisem nga umuna ti ikarim iti Dios.

³ Maaramid ti ari ti amin a kayatna, isut' gapuna a pumanawka iti sangoananna. Dika agyan iti kasta a napeggad a lugar.

⁴ Naturay ti ari ket awan ti makalapped iti aramidenna.

⁵ Awan pakaan-anoam no la ket tungpalem dagiti bilinna ket ammo ti masirib ti tumutop a tiempo ken ti rumbeng nga aramidenna.

⁶ Adda tumutop a tiempo ken naimbag a pamuspusan a panangaramid iti amin ngem bassit unay ti ammotayo!

⁷ Awan kadatayo ti makaammo no ania ti mapasamak, ken awan mangibaga kadatayo.

⁸ Awan ti tao a makalisi ken ni patay, wenno mangitantan iti aldaw ti ipapatayna. Maysa a gubat dayta a ditay maliklikan. Ditay mabalin ti agsaur tapno makalibastayo.

Ti Managdakdakes ken ti Nalinteg

⁹ Nakitak amin daytoy idi am-amirisek ti kaipapanan ti amin a mapaspasamak ditoy lubong; wen, ditoy lubong a pagnaedan ti sumagmamano a tattao nga adda pannakabalinna ket masapul nga agsagaba dagiti dadduma iti babaenda.

¹⁰ Wen, nakitak dagiti managdakdakes a naipumpon ken naitanem. Ngem idi pumanaw dagiti tattao iti kamposanto, indaydayawda dagiti managdakdakes iti mismo a siudad a nangaramidanda iti dakes. Awan serserbina.

¹¹ Apay a sisasagana dagiti tattao nga agaramid iti kinadakes? Gapu ta saan a madusa a dagus ti agbasol.

¹² Uray maminggasut nga agaramid ti managbasol iti dakes, agbiag pay laeng. Wen, ammok ti kunada, “No agbutengka iti Dios, naimbagto latta amin,

¹³ ngem saan a nasayaat ti pagbanagan ti managbasol. Mayarig iti anniniwan ti biagna ket masapa a matay, agsipud ta saan nga agbuteng iti Dios.”

¹⁴ Ngem kinamaag daytoy. Kitaem ti mapaspasamak ditoy lubong: No dadduma, maipatay kadagiti nalinteg ti dusa nga agpaay koma kadagiti nakillo; ket dagiti nakillo ti umawat iti gunggona dagiti nalinteg. Kunak nga awan serserbina.

¹⁵ Ngarud, patiek unay a rumbeng nga agragsak ti tao. Mangan, uminum ken aglang-ay laeng ti aramidenna iti daytoy a biag. Daytoy ti mabalinna nga aramiden iti baet ti panagtrabahona bayat ti inted ti Dios a panagbiagna ditoy lubong.

¹⁶ Tunggal padasek ti agbalin a masirib ket ammoek ti mapaspasamak iti lubong, nabigbigko a mabalinmo ti siririing iti agpatnag ken agmalem

¹⁷ ngem pulos a dimo maawatan ti ar-aramiden ti Dios. Uray no kasano ti panangpadasmo, dimonto matakuatan. Mabalin a kuna dagiti masirib nga ammoda, ngem saanda nga ammo.