Eclesiastes 4 - Ti Baro a Naimbag a Damag Biblia

¹ Makitak manen dagiti amin a pannakairurumen a maar-aramid ditoy lubong. Agsasangit dagiti mailupitlupit ket awan ti tumulong kadakuada. Awan tumulong kadakuada gapu ta adda bileg kadagiti mangidadanes kadakuada.

² Apalak dagiti natay ken pimmusayen; napimpintas ti kasasaadda ngem dagiti sibibiag pay.

³ Nupay kasta, nagasgasat pay ngem dagitoy dua ti di nayanak a di pay nakaimatang kadagiti dakes nga aramid iti daytoy a lubong.

⁴ Natakuatak met no apay nga igaed dagiti tattao ti agtrabaho tapno agballigida: gapu ta apalanda dagiti sanikua dagiti kaarrubada. Ngem awan ti serserbina. Mayarig iti panangkamkamat iti angin.

⁵ Kunada a maag ti maysa a tao no agdalikepkep ket baybay-anna ti bagina a mabisinan agingga a matay.

⁶ Mabalin a kasta, ngem nasaysayaat ti sangkabassit nga adda natalna a pakinakem ngem ti trabaho a trabaho a kasmo la kamkamaten ti angin.

⁷ Adda pay nadlawko a banag nga awan serserbina ditoy a biag.

⁸ Adtoy ti maysa a tao nga agbibiag a maymaysa. Awan anakna, awan kabsatna a lalaki, trabaho a trabaho, ngem saan a mapnek iti kinabaknangna. Siasino ti itartrabahoanna? Dina ikkan ti bagina iti gundawayna nga agragsak. Awan met serserbi daytoy ket maysa a nakalkaldaang a panagbiag.

⁹ Naim-imbag ti dua ngem ti maymaysa, agsipud ta no duada nasaysayaat ti trabahoda.

¹⁰ No matuang ti maysa, mabalin a bataken ti kaduana. Ngem no agmaymaysa ti tao ket matuang, daksanggasat laeng ta awan tumulong kenkuana.

¹¹ No nalam-ek, mabalin a maturog nga agkaidda ti dua a tao ket mapapudot ti tunggal maysa, ngem kasano a pumudotka no maymaysaka?

¹² Mabalin a parmeken ti dua a tao dagiti mangraut kadakuada, ngem no maymaysaka awan ti gawaymo. Narigat a pugsaten ti tinallo a tali.

^13-14 Nalabit nga agbalin nga ari ti maysa a napanglaw wenno maisaad iti trono ti maysa a naggapu iti pagbaludan, ngem inton lumakay, no maag la unay a dina kayat ti pabagbagaan, saan a nasaysayaat ngem ti agtutubo a napanglaw ngem masirib.

¹⁵ Pinampanunotko ti maipapan iti amin a tattao ditoy lubong, ket nabigbigko nga adda latta agtutubo a mangalanto iti lugar ti ari.

¹⁶ Nalabit a saan a sumardeng ti panagadu dagiti tattao nga iturayan ti maysa nga ari; inton pumusayen, awanto ti agyaman iti gapuananna. Awan serserbina. Mayarig iti panangkamkamat iti angin.