Eclesiastes 3 - Ti Baro a Naimbag a Damag Biblia

Adda Tiempo ti Amin a Banag

¹ Adda tiempo nga ituding ti Dios a pannakapasamak ti amin a banag ditoy lubong.

² Itudingna ti tiempo ti pannakayanak ken tiempo ti pannakatay; tiempo ti panagmula ken tiempo ti panagparut;

³ tiempo ti panagpapatay ken tiempo ti panagagas; tiempo ti panagrebba ken tiempo ti panagbangon.

⁴ Itudingna ti tiempo ti panagladingit ken tiempo ti panagragsak; tiempo ti panagdung-aw ken tiempo ti panagsala;

⁵ tiempo ti panagurnong iti bato ken tiempo ti panagiwara, tiempo ti panaginnarakup ken tiempo ti panaginnadayo.

⁶ Itudingna ti tiempo ti panagbirok ken tiempo ti panagpukaw; tiempo ti panagidulin ken tiempo ti panagibelleng;

⁷ tiempo ti panagrakrak ken tiempo ti panagtarimaan; tiempo ti panagulimek ken tiempo ti panagsao.

⁸ Ikeddengna ti tiempo ti ayat ken tiempo ti gura; tiempo ti gubat ken tiempo ti kappia.

⁹ Ania ti magun-od ti tao iti amin nga aramidna?

¹⁰ Ammok ti gasat nga insaad ti Dios a maipaay kadatayo.

¹¹ Intudingna ti tumutop a tiempo a maipaay iti amin a banag. Inikkannatayo iti tarigagay a mangammo iti masakbayan, ngem pulos a dinatay ikkan iti pannakapnek a mangawat iti naan-anay a kaipapanan dagiti aramidna.

¹² Iti kasta, naamirisko nga awanen ti naim-imbag nga aramiden ti tao no di agragsak ken aramidenna ti amin a kabaelanna bayat ti panagbiagna.

¹³ Masapul a mangan ken uminumtayo amin ket lak-amentayo ti nagbannogantayo ta sagut ti Dios dagitoy.

¹⁴ Ammok a mataginayon ti amin nga aramiden ti Dios. Dimo mabalin a nayonan wenno kissayan. Ket aramiden amin ti Dios daytoy tapno agbuteng dagiti tattao kenkuana.

¹⁵ Napasamak idin ti aniaman a mapasamak wenno mabalin a mapasamak. Nakem ti Dios a maulit-ulit ti pannakapasamak ti maysa a banag.

Ti Kinaawan Hustisia ditoy Lubong

¹⁶ Saan la a daytoy. Nadlawko pay nga iti daytoy a lubong, masarakam ti kinadakes iti lugar a rumbeng nga adda hustisia ken kinalinteg.

¹⁷ Kinunak iti bagik, “Agpadpada nga ukomen ti Dios ti nalinteg ken ti managbasol, agsipud ta naituding ti tiempo a maipaay iti amin a pasamak ken iti amin nga aramid.”

¹⁸ Kinunak pay a susuotennatayo ti Dios tapno ipakitana kadatayo nga awan ti nakaidumaantayo kadagiti animal.

¹⁹ Ngamin, agpada ti pagtungpalan dagiti tattao ken dagiti animal. Matayda nga agpadpada. Agpadada a kita ti parsua. Awan pangatiwan ti tao iti animal ta awan ti kaipapanan ti biag kadakuada.

²⁰ Agturong ti amin iti maymaysa a lugar. Nagtaudda iti tapok ket agbalindanto met la a tapok.

²¹ Kasano nga adda makaammo nga agpangato ti espiritu ti tao ket agpababa ti espiritu ti animal?

²² Naamirisko ngarud nga awanen ti naim-imbag nga aramiden ti tao no di ti pananglak-amna iti bunga ti nagbannoganna ket agragsak. Awanen ti sabali a mabalinna nga aramiden. Kalpasan ti ipapatayna, awanton ti pakaammoanna no anianto ti mapasamak.