Deuteronomio 7 - Ti Baro a Naimbag a Damag Biblia

Dagiti Tattao ni Yahweh

¹ “Ipannakayto ti Apo a Diosyo iti daga a tagikuaenyo. Pagtalawennanto dagiti adu a tattao nga agnaed sadiay. Iti isusungadyo, paksiatennanto ti pito a nasion a dakdakkel ken nabilbileg ngem dakayo: dagiti Heteo, Gergeseo, Amorreo, Cananeo, Perezeo, Heveo ken dagiti Jebuseo.

² Inton yawat ti Apo a Diosyo dagitoy a tattao iti pannakabalinyo, masapul a papatayenyo amin ida. Dikay makikadua kadakuada; diyo kaasian ida.

³ Dikay makiasawa kadakuada; diyo ipalubos a makiasawa dagiti annakyo kadagiti annakda.

⁴ Ngamin, yadayodanto dagiti annakyo iti Apo tapno agrukbabda kadagiti didiosen; kapungtotnakayto ti Apo ket dagdagusennakayto a dadaelen.

⁵ Ngarud, rebbaenyo dagiti altarda, burakenyo dagiti adigida, duprakenyo dagiti imahen ni Asera a didiosenda ken puoranyo dagiti imahen a pagrukrukbabanda.

⁶ Aramidenyo daytoy ta tattaonakayo ti Apo a Diosyo. Pinilinakayo iti amin a pagilian tapno agbalinkayo a naidumduma a gamengna.

⁷ “Inayat ken pinilinakayo ti Apo saan a gapu ta ad-adukayo ngem dagiti dadduma a tattao; kinapudnona, dakayo ti kabassitan a nasion ditoy daga.

⁸ Ngem inayatnakayo ti Apo ket tinungpalna ti inkarina kadagidi kapuonanyo. Daytoy ti gapuna nga insalakannakayo iti ari ti Egipto babaen iti naindaklan a pannakabalinna.

⁹ Laglagipenyo a ti Apo a Diosyo ti maymaysa a Dios ken mapagtalkan. Tungpalennanto ti tulagna ket iparangarangnanto ti di agbalbaliw nga ayatna iti rinibu a kaputotan kadagiti agayat kenkuana ken agtulnog kadagiti bilinna,

¹⁰ ngem dinto bumdeng a mangdusa kadagiti gumura kenkuana.

¹¹ Ngarud, tungpalenyo ti amin a linteg nga intedko kadakayo ita nga aldaw.”

Dagiti Bendision para kadagiti Natulnog

¹² “No ipangagyo dagitoy a bilin ket tungpalenyo ida a sipapasnek, taginayonento ti Apo a Diosyo ti katulaganna kadakayo ken ti di agbalbaliw nga ayatna, kas inkarina kadagidi kapuonanyo.

¹³ Ayaten, bendisionan ken paaduennakayto; paraburannakayto iti nawadwad nga apit, arak ken lana ti olibo. Ket bendisionannakayto babaen iti pannangtedna kadakayo iti adu a baka ken karnero. Ipaaynanto kadakayo amin dagitoy a parabur iti daga nga inkarina kadagidi kapuonanyo.

¹⁴ Awanto ti sabali a pagilian ditoy a lubong nga ad-adu ti paraburna ngem dakayo. Awanto ti lupes kadakayo, uray dagiti animalyo.

¹⁵ Ilisinakayto ti Apo iti amin a sakit. Dinanto yeg kadakayo ti uray ania kadagiti nakabutbuteng a sakit a kas iti linak-amyo idiay Egipto ngem idissuornanto ida amin kadagiti kabusoryo.

¹⁶ Pukawenyo amin dagitoy a tattao a yawat ti Apo iti pannakabalinyo. Diyo kaasian ida. Dikay agrukbab kadagiti didiosenda agsipud ta daytanto ti pakatayanyo.

¹⁷ “Diyo pagdanagan no ad-adu dagitoy a tattao ngem dakayo ket diyo mapapanaw ida.

¹⁸ Dikay agbuteng kadakuada. Lagipenyo ti inaramid ti Apo a Diosyo iti ari ti Egipto ken amin a tattaona,

¹⁹ dagiti nakabutbuteng a didigra, dagiti milagro ken ti naindaklan a bileg ken pannakabalin nga inaramid ti Apo a Diosyo iti pannakawayawayayo. Kastanto met ti aramidenna kadagitoy a tattao a kabutengyo.

²⁰ Mangyegto pay iti pagbutnganda ket dadaelenna dagiti aglibas tapno aglemmengda.

²¹ Dikay agbuteng kadagitoy a tattao. Adda kadakayo ti Apo a Diosyo; naindaklan a Dios ken rumbeng a pagbutngan.

²² In-inutennanto a paksiaten dagitoy a nasion iti isusungadyo. Diyonto kabaelan a dadaelen ida a mamimpinsan gapu ta no mapukawda a mamimpinsan, umadunto dagiti atap nga animal ket agpeggadkayo kadakuada.

²³ Yawatto ti Apo dagiti kabusoryo iti pannakabalinyo ket pagbutngennanto ida agingga a madadaelda.

²⁴ Yawatnanto dagiti arida iti pannakabalinyo. Papatayenyonto ida ket awanton ti makalagip kadakuada. Awanto ti makaatipa kadakayo; ikisapyonto amin ida.

²⁵ Puoranyo dagiti imahen a pagrukrukbabanda. Diyo aguman ti pirak ken balitok a naikalupkop kadakuada, ta no alaenyo dagitoy, isunto ti pakaipalab-oganyo ta kagura ti Apo ti panagdaydayaw kadagiti didiosen.

²⁶ Diyo ipan iti balayyo ti uray ania kadagitoy nga imahen amangan no dakayto ti pagdissuoran ti lunod a naipatay kadakuada. Guraen ken karimonyo dagitoy a didiosen ta inlunod ida ti Apo.