Deuteronomio 25 - Ti Baro a Naimbag a Damag Biblia

¹ “Kas pangarigan adda dua nga Israelita a dumatag iti pangukoman tapno mausig ti ririda ken masentensiaan ti nakabasol,

² pagpaklebento ti ukom ti nakabasol sana pasaplit. No ania ti dakes nga inaramidna, isu met ti bilang ti pannakasaplitna.

³ Mabalin a masaplit iti mamin-uppat a pulo. Ngem saan a nasursurok ngem uppat a pulo tapno saan a maibabain dayta a tao kadagiti kailianna.

⁴ “Diyo busalan ti agir-irik a baka.

Ti Pagrebbengan iti Natay a Kabsat

⁵ “No agkabbalay ti agkabsat a lallaki ket matay ti naasawaan kadakuada nga awan anakna, saan a makiasawa ti biuda iti sabali; rebbengna a ti kabsat ti natay ti mangasawa kenkuana.

⁶ Maibilang nga anak ti natay ti inauna a lalaki nga ipasngayna tapno saan a mapukaw ti naganna iti Israel.

⁷ Ngem no madi ti kabsatna a mangasawa iti biuda, dumatag ti babai kadagiti panglakayen iti pangukoman ket kunana, ‘Madi ti kabsat daydi asawak a mangtungpal iti annongna a kas kabsat ti natay nga asawak. Dina kayat a taginayonen ti nagan ti kabsatna iti Israel.’

⁸ “Paayaban ngarud dagiti panglakayen ti lalaki tapno kasaoda. No dina latta kayat nga asawaen ti biuda,

⁹ umasideg ti babai kenkuana iti sango dagiti panglakayen ket uksotenna ti sandalias ti lalaki sana tupraan ti rupana. Kunananto, ‘Kastoy ti mapasamak iti lalaki a madi a mangtaginayon iti familia ti kabsatna.’

¹⁰ Iti Israel, maawaganto ti familiana iti ‘ti familia ti lalaki a nauksot ti sandaliasna.’

Dadduma a Linteg

¹¹ “No agap-apa ti dua a lallaki, ket tulongan ti asawa ti maysa kadakuada ti asawana babaen iti panangguyodna iti mabagbagi ti karangranget ti asawana,

¹² masapul a maputed ti ima ti babai. Saanyo a kaasian.

^13-14 “Dikay agsaur no usarenyo ti timbangan ken pagsukatan.

¹⁵ Usarenyo ti husto a timbangan ken pagsukatan tapno napaut ti panagbiagyo iti daga nga ited kadakayo ti Apo a Diosyo.

¹⁶ Kagura ti Apo a Diosyo ti agsuitik.

Maibilin ti Pannakapapatay dagiti Amalekita

¹⁷ “Laglagipenyo ti inaramid kadakayo dagiti Amalekita idi aggapukay idiay Egipto.

¹⁸ Dida nagbuteng iti Dios, isut' gapuna a liniputandakayo a dinarup idi nabannog ken napaksuyankayo; pinatayda pay amin a nakapsut a sumarsaruno.

¹⁹ Ngarud, inton maiteden ti Apo a Diosyo ti daga nga itedna kadakayo ken natalgedkayon sadiay, masapul a papatayenyo dagiti amin nga Amalekita tapno awanton ti makalaglagip kadakuada. Laglagipenyo daytoy.”