Deuteronomio 23 - Ti Baro a Naimbag a Damag Biblia

Dagiti Mailaksid kadagiti Tattao ni Yahweh

¹ Intuloy ni Moises, “Saan a maibilang kadagiti tattao ti Apo ti siasinoman a lalaki a nakapon wenno naputed ti mabagbagina.

² “Saan a maibilang kadagiti tattao ti Apo ti maysa a bastardo wenno dagiti kaputotanna, uray iti maikasangapulo a kaputotan.

³ “Saan a maibilang kadagiti tattao ti Apo ti maysa nga Ammonita wenno Moabita—wenno ti siasinoman a kaputotanda uray iti maikasangapulo a kaputotan.

⁴ Didakay inikkan iti kanen ken danum idi magnakayo iti dagada kalpasan ti iruruaryo idiay Egipto. Tinangdananda ketdi ni Balaam nga anak ni Beor a taga-Peor iti probinsia ti Mesopotamia tapno ilunodnakayo.

⁵ Ngem saan nga impangag ti Apo a Diosyo ni Balaam. Pinagbalinna ketdi a bendision daydi lunod gapu ta inay-ayatnakayo ti Apo.

⁶ Bayat ti panagtalinaedyo a maysa a pagilian, dikay agaramid iti aniaman a mangted iti pagimbagan wenno pagrang-ayanda.

⁷ “Diyo laisen dagiti Edomita, ta kabagianyo ida. Diyo met laisen dagiti Egipcio, ta nagnaedkayo idi iti dagada.

⁸ Mabalin a maibilang kadagiti tattao ti Apo dagiti annakda manipud iti maikatlo a kaputotan.”

Tapno Nadalus ti Kampo dagiti Soldado iti Tiempo ti Gubat

⁹ “Iti tiempo ti gubat, saankayo nga agaramid iti uneg ti kampo ti aniaman a mamagbalin kadakayo a narugit iti imatang ti linteg.

¹⁰ No agbalin a narugit ti maysa a lalaki gapu ta agruar iti kissit bayat ti panagtagtagainepna iti rabii, masapul nga agyan nga agmalmalem iti ruar ti kampo.

¹¹ Masapul nga agdigos iti mumalemen ket inton lumnek ti init, sumrek met laeng iti kampo.

¹² “Masapul nga adda disso iti ruar ti kampo a mabalinyo a pagkasilyasan.

¹³ Kas paset ti aruatenyo, mangitugotkayo iti pagkaliyo iti abut no umiblengkayo; kalpasanna, gaburanyo met laeng ti rugityo.

¹⁴ Pagtalinaedenyo a nadalus ti kampoyo gapu ta adda ti Apo a Diosyo iti kampoyo a mangsalaknib kadakayo ken mangparmek kadagiti kabusoryo. Dikay agaramid iti aniaman a naalas a panggapuan ti Apo a mangbaybay-a kadakayo.

Nadumaduma a Linteg

¹⁵ “No agkamang kadakayo ti maysa a tagabu, diyo pagsublien iti apona.

¹⁶ Bay-anyo nga agnaed iti uray sadino a lugar kadagiti iliyo a pilienna. Saanyo nga idadanes.

¹⁷ “Maiparit iti maysa nga Israelita, lalaki man wenno babai, nga agbalin a balangkantis iti templo.

¹⁸ Diyo ipan iti templo ti Apo a Diosyo ti matgedan ti maysa a balangkantis tapno idatonyo a pangtungpal iti kariyo. Kagura ti Apo dagiti balangkantis ti templo.

¹⁹ “No agpautangkayo iti kuarta, taraon wenno uray ania iti padayo nga Israelita, diyo paanakan.

²⁰ Mabalinyo a paanakan ti ipautangyo iti ganggannaet, ngem diyo paanakan ti ipautangyo iti padayo nga Israelita. Tungpalenyo daytoy a bilin tapno bendisionannakayto ti Apo a Diosyo iti amin nga aramidyo iti daga a sakupenyo.

²¹ “No agkarikayo iti Apo a Diosyo, diyo itantan a tungpalen, ta awan duadua a singirennakayo ket agbasolkayo.

²² Saankayo a makabasol no dikay agkari iti Apo,

²³ ngem no agkarikayo iti agtaud iti nakemyo, masapul a tungpalenyo.

²⁴ “No magnakayo iti kaubasan ti maysa a tao, mabalinyo ti mangan kadagiti ubas iti kaykayatyo. Ngem dikay mangibasket iti yawidyo.

²⁵ No magnakayo iti katrigoanna, mabalinyo a kanen ti amin a mapurosyo ngem dikay agani iti trigo.”