Deuteronomio 16 - Ti Baro a Naimbag a Damag Biblia

Fiesta ti Paskua

¹ “Padayawanyo ti Apo a Diosyo babaen iti panangrambakyo iti Fiesta ti Paskua iti bulan ti Abib; iti maysa a rabii iti dayta a bulan, inruarnakayo idiay Egipto.

² Inkay iti lugar a pinilina a pagdaydayawan kenkuana ket agpartikay iti karnero wenno baka nga agpaay iti pangrabii ti Paskua a pammadayaw iti Apo a Diosyo.

³ No kanenyo daytoy a daton, dikay mangan iti nalebaduraan a tinapay. Pito nga aldaw a mangankay iti saan a nalebaduraan a tinapay, ti simbolo ti panagsagabayo, gapu ta nagdardaraskayo idi a pimmanaw idiay Egipto. Aramidenyo daytoy a panglagip iti aldaw nga ipapanawyo idiay Egipto, dayta lugar a nagsagabaanyo.

⁴ Pito nga aldaw a masapul nga awan ti lebadura iti sakupyo. Sidaenyo amin ti karne ti animal a napapatay iti rabii ti umuna nga aldaw ket awan ti ipabigatyo.

^5-6 “Iti laeng pagdaydayawan ti pakaisaganaan iti animal a maipaay iti Fiesta ti Paskua ket awanen ti sabali a disso iti daga nga ited kadakayo ti Apo. Isaganayo iti sumipnget, iti oras nga ipapanawyo idi idiay Egipto.

⁷ Angrenyo sayo sidaen iti disso a pagdaydayawan ket agawidkayo iti sumuno a bigat.

⁸ Iti las-ud ti innem nga aldaw, masapul nga awan ti lebadura ti tinapay a kanenyo; iti maikapito nga aldaw, aggigimongkayo nga agdaydayaw iti Apo a Diosyo. Dikay agtrabaho iti dayta nga aldaw.

Ti Fiesta ti Panagani

⁹ “Palabsenyo ti pito a lawas manipud panangrugiyo nga agani

¹⁰ sayo rambakan ti Fiesta ti Panagapit a pammadayaw iti Apo a Diosyo. Mangidatagkayo iti daton nga agtaud iti nakemyo kas maikanatad iti imparaburna kadakayo.

¹¹ Agrag-okayo iti imatang ti Apo, dakayo ken dagiti annakyo, dagiti adipenyo ken dagiti Levita, dagiti ganggannaet, dagiti ulila ken balo a babbai nga agnaed kadagiti iliyo. Aramidenyo daytoy iti lugar a pilien ti Apo a Diosyo a pagdaydayawan kenkuana.

¹² Laglagipenyo a natagabukayo idi idiay Egipto. Daytoy ti gapuna nga ikagumaanyo a tungpalen dagitoy a bilin.

Ti Fiesta dagiti Abong-abong

¹³ “Kalpasan ti panangirikyo kadagiti amin a trigoyo ken panangpespesyo kadagiti amin nga ubasyo, rambakanyo ti Fiesta dagiti Abong-abong iti las-ud ti pito nga aldaw.

¹⁴ Agraragsakkayo iti daytoy a fiesta, dakayo ken dagiti annakyo, dagiti adipenyo ken dagiti Levita, ganggannaet, ulila ken balo a babbai nga agnaed kadagiti iliyo.

¹⁵ Padayawanyo ti Apo a Diosyo iti panagrambakyo iti daytoy a fiesta iti las-ud ti pito nga aldaw iti lugar a pilienna a pagdaydayawan kenkuana. Agragsakkayo gapu ta binendisionan ti Apo ti apityo ken ti trabahoyo.

¹⁶ “Mamitlo iti makatawen a masapul a mapan agdaydayaw ti amin a lallaki iti lugar a pilienna a pagdaydayawan kenkuana. Mapanda iti Fiesta ti Paskua, iti Fiesta ti Panagani ken iti Fiesta dagiti Abong-abong. Dikay mapan nga ima-ima iti imatang ti Apo;

¹⁷ masapul a mangitugot ti tunggal maysa iti sagut kas mayannurot iti imparabur ti Apo a Diosyo.

Ti Pannakaipakat ti Hustisia

¹⁸ “Mangdutokkayo kadagiti ukom ken dadduma nga ofisiales iti tunggal ili nga ited kadakayo ti Apo a Diosyo. Kas ukom, ibanagda dagiti kaso dagiti tattao nga awan ti idumdumada.

¹⁹ Masapul a dida ballikugen ti linteg ken awan ti kanunonganda iti panangukomda. Dida agawat iti pasuksok ta ti pasuksok bulsekenna uray masirib ken mapagtalkan a tao ket daytoy ti pakaigapuan ti panangikeddengda iti saan nga umisu a sentensia.

²⁰ Agtalinaedkayo a nalinteg ken awan idumdumana tapno masakupyo ti daga nga ited kadakayo ti Apo a Diosyo ket agtultuloykayo nga agnaed sadiay.

²¹ “No mangbangonkayo iti altar iti Apo a Diosyo, dikay mangikabil iti abayna ti kayo a simbolo ni Asera a didiosen.

²² Dikay mangipasdek iti uray ania nga adigi a bato a pagdaydayawan; kagura dagitoy ti Apo.