Deuteronomio 13 - Ti Baro a Naimbag a Damag Biblia

¹ “No adda profeta wenno tao a mangilawlawag iti tagtagainep a mangipakita kadakayo iti maysa a milagro wenno datdatlag,

² ket awisennakayo nga agdaydayaw ken agserbi kadagiti didiosen a diyo pay nagdaydayawan. Uray no matungpal ti karina,

³ diyo ipangpangag dayta a tao. Susuotennakayo la ti Apo a Diosyo tapno maammoanna no ay-ayatenyo met laeng ti Apo iti amin a pusoyo.

⁴ Tungpalenyo ti Apo ket agbutengkayo kenkuana. Agtulnogkayo kenkuana ket salimetmetanyo dagiti bilinna; agdaydayaw ken agtalinaedkayo a napudno kenkuana.

⁵ Ngem patayenyo ti siasinoman a profeta wenno mammadles a mangibaga a supringenyo ti Apo a nangiruar kadakayo idiay Egipto a nakatagabuanyo. Dakes ti kasta a tao ket panggepnakayo nga isina iti panagbiag nga imbilin ti Apo a panagbiagyo. Masapul a maikkat dayta a kinadakes iti sidongyo.

⁶ “Nalabit nga umay a sililimed ti kabsatyo wenno annakyo wenno ti patpatgenyo nga asawa wenno ti nadekket a gayyemyo ket awisennakayo nga agdaydayaw kadagiti sabali a didiosen, a diyo pay nagdaydayawan kasta met dagidi kapuonanyo.

⁷ Nalabit nga allukoyennakayo ti maysa kadakuada nga agdaydayaw kadagiti didiosen dagiti agnaed iti asidegyo wenno kadagiti didiosen dagiti agnaed iti adayo.

⁸ Ngem dikay paallukoy kenkuana; diyo pay ketdi ipangpangag. Diyo kaasian; diyo isakit wenno salakniban.

⁹ Papatayenyo! Dakayo ti umuna a mangbato kenkuana ket kalpasanna batoen met dagiti dadduma.

¹⁰ Batoenyo agingga a matay! Pinanggepnakayo nga isina iti Apo a Diosyo a nangiruar kadakayo idiay Egipto a nakatagabuanyo.

¹¹ Madamagto dagiti amin nga Israelita ti napasamak ket agbutengdanto; awanton ti agaramid iti kasta a kinadakes iti sidongyo.

¹² “Inton agnaedkayon kadagiti ili nga ited ti Apo a Diosyo, mabalin a madamagyo

¹³ nga adda sumagmamano nga awan serserbina a kailianyo a nangyaw-awan kadagiti tattao iti ilida nga agrukbab agdaydayaw kadagiti didiosen a diyo pay nagdaydayawan.

¹⁴ No madamagyo daytoy, palutpotenyo a naimbag ket no pudno a naaramid ti kasta a kinadakes,

¹⁵ patayenyo amin nga agnaed iti dayta nga ili ken amin a bakada. Dadaelenyo a mamimpinsan dayta nga ili.

¹⁶ Ummongenyo dagiti amin a sanikua dagiti tattao nga agnaed sadiay ket ipanyo iti plasa. Kalpasanna, puoranyo ti ili ken amin a linaonna kas daton iti Apo a Diosyo. Bay-anyo nga aglangalang dayta nga ili iti agnanayon ket dinton mabangon.

¹⁷ Awan ti alaenyo kadagiti naituding a madadael tapno agbaaw ti pungtot ti Apo ken kaasiannakayo ket paaduennakayto a kas inkarina kadagiti kapuonanyo.

¹⁸ Kasta ti aramidenna no tungpalenyo dagiti amin a bilin nga intedko kadakayo ita nga aldaw ket aramidenyo ti pagayatanna.”