Daniel 12 - Ti Baro a Naimbag a Damag Biblia

Ti Panungpalan

¹ Intuloy ti anghel ti nagsao: “Iti dayta a tiempo, agparangto ni Miguel, ti naindaklan nga anghel a mangaywan kadagiti kailiam. Kalpasanna, tumaudto ti riribuk a di pay napasamak manipud pannakaipasdek dagiti nasion. Inton dumteng dayta a tiempo, maisalakanto dagiti amin a kailiam a nailanad ti naganda iti libro ti Dios.

² Adunto kadagiti natay ti agbiagto manen. Agbiagto iti agnanayon ti dadduma kadakuada, ket dagiti dadduma, iti agnanayon a pannakaibabain.

³ Agraniagto dagiti mamasirib a kas iti lawag ti langit. Aglawagto nga agnanayon a kas kadagiti bituen dagiti nangisuro kadagiti adu a tattao nga agaramid iti naimbag.”

⁴ Kinunana kaniak: “Ita, Daniel, rikpam ti libro ket timbream agingga iti panungpalan. Kabayatanna, adunto a tattao ti mangigaed a mangammo iti kaipapanan dagiti mapaspasamak ngem agbambannogdanto laeng.”

⁵ Kalpasanna, nakitak ti dua a lallaki. Nakatakder ti maysa igid iti karayan ket ti maikadua, iti ballasiw.

⁶ Maysa kadakuada ti nangsaludsod iti anghel nga adda iti surong ti karayan, “Kasano pay ti kabayag sakbay nga aggibus dagitoy nakaskasdaaw a banag?”

⁷ Ingngato ti anghel dagiti imana sadi langit ket nagsapata iti nagan ti Agnanayon a Dios. Nangngegko a kinunana, “Tallo ket gudua a tawen. Inton agpatinggan ti pannakaidadanes dagiti tattao ti Dios, mapasamakto aminen dagitoy a bambanag.”

⁸ Nangngegko ti imbagana. Ngem diak naawatan, isu a sinaludsodko, “Apo, kasanonto ti panaggibus amin dagitoy?”

⁹ Kinunana, “Daniel, inkan, ta masapul a mailimed dagitoy a balikas ket saanda a maipakaammo agingga iti panungpalan.

¹⁰ Adunto a tattao ti magugoran ken madalusan. Saanto a makaawat dagiti managdakdakes, ngem itultuloyda ti kinadakesda. Dagitinto la masirib ti makaawat.

¹¹ “Manipud pannakaisardeng ti inaldaw a panangidatag iti daton, kayatna a sawen, manipud iti pannakaisaad ti Nakabutbuteng a Mangdadael, 1,290 nga aldawto ti mapalabas.

¹² Nagasat dagiti agtalinaed a napudno agingga nga aggibus ti 1,335 nga aldaw.

¹³ “Ngem sika, Daniel, agtalinaedka a napudno agingga iti panungpalan. Mataykanto, ngem agungarkanto tapno awatem ti gunggonam iti maudi nga aldaw.”