Dagiti Salmo 4 - Ti Baro a Naimbag a Damag Biblia

Kararag iti Rabii a Pagdawat iti Tulong ti Dios

¹ Ipangagnak kadi, O Dios, no umawagak! Sika a mangsalaknib kaniak. Tinulongannak idi nariribukak. Kaasiannak ket ipangagmo toy kararag!

² Dakayo a tattao, kaano ti panagsardengyo a manglalais kaniak? Kasano ti kabayag nga ayatenyo ti awan serserbina ket ipamaysayo ti ulbod ken panangallilaw?

³ Laglagipenyo a pinili ti Apo dagiti nalinteg a maipaay kenkuana, ket denggennak no awagak.

⁴ Agbutengkayo ket dikay agbasol; panunotenyo a naimbag daytoy a sao, no agiddakayo a naulimek iti katreyo.

⁵ Idatonyo dagiti rumbeng a daton ket agtalekkayo kenkuana.

⁶ Adu ti agkuna iti kararagda, “Yad-adum koma ti bendisionmi! O Apo, maasika kadi kadakami!”

⁷ Ngem ti rag-o nga intedmo kaniak, dakdakkel nga adayo ngem ti rag-o dagiti aduan pagay ken arak.

⁸ Apaman nga agiddaak, makaturogak a sitatalna; ta sika laeng, O Apo, ti mangted iti natalged nga inana.