Dagiti Salmo 3 - Ti Baro a Naimbag a Damag Biblia

Kararag iti Bigat a Pagdawat iti Tulong ti Dios

¹ O Apo, anian a nagadu dagiti kabusorko, nagadu ketdin dagiti gumura kaniak!

² Pagsasaritaandak ket kunada, “Saan a tumulong ti Dios kenkuana!”

³ Ngem sika, O Apo, ti salaknibko; pagballigiennak ket papigsaem ti pakinakemko.

⁴ Umawagak ken ni Yahweh ket agpatulongak, ket manipud iti nasantoan a turodna sungbatannak.

⁵ Agiddaak ket maturogak; Bumangonak iti agsapa ta agpatpatnag a salaknibannak ni Yahweh.

⁶ Diak kabuteng dagiti rinibu a kabusor iti likmutko.

⁷ Umayka, O Apo! Isalakannak, Diosko! Parmekem amin a kabusorko, ket pukawem ti bilegda a mangdangran kaniak.

⁸ Aggapu ti balligi iti Apo— bendisionanna koma dagiti bukodna a tattao.