Dagiti Salmo 2 - Ti Baro a Naimbag a Damag Biblia

Ti Ari a Pinili ti Dios

¹ Apay a panggepen dagiti nasion ti umalsa? Apay nga agtutulagda iti awan serserbina?

² Agtutulag nga agmaymaysa dagiti agtuturayda busorenda ti Apo, ken iti ari a pinilina.

³ Kunada, “Lumapsuttayo iti panangiturayda, duprakentayo ti pannakabalinda.”

⁴ Iti tronona sadi langit, agkatawa ti Apo ket laisenna ti nakapuy a panggepda.

⁵ Makaunget a mangballaag kadakuada; butbutngenna ida iti pungtotna.

⁶ Kunana, “Insaadko ti arik idiay Sion a nasantoan a turodko.”

⁷ Kuna ti ari, “Ipakaammok ti imbilin ti Apo. Kinunana kaniak, ‘Sika ti anakko, Ita nga aldaw, nagbalinak nga amam.

⁸ Agkiddawka ket itedko amin a nasion kenka; kukuamto ti entero a daga.

⁹ Dadaelemto ida iti sarukod a landok, burakemto ida a kasla banga.’”

¹⁰ Ita, dakayo nga ar-ari, denggenyo ti ballaagko; dakayo a turayen ti lubong, adalenyo daytoy a sursuro:

¹¹ Agserbikayo a sibubuteng iti Apo; sipipigergerkayo nga

¹² agrukbab kenkuana amangan no sumged lattan ti pungtotna ket pukawennakayo. Nagasat dagiti amin nga agkamang kenkuana.