Dagiti Salmo 102 - Ti Baro a Naimbag a Damag Biblia

Kararag ti Mariribuk a Tao

¹ O Apo, denggem ti kararagko, agpatulongak ket ipangagmo toy dawatko.

² Saannak koma nga adaywan no mariribukak. Denggennak ket darasem ti tumulong kaniak.

³ Kas asuk nga agpukaw ti biagko; sumsumged ti bagik a kas iti urno.

⁴ Marsaakak a kas ruot a nagango; uray iti pannangan, awan ganasko.

⁵ Gapu iti leddaang ken as-asugko, kudil laengen ti nangbungon iti tulangko.

⁶ Kaslaak la tumatayab iti let-ang arigko iti kullaaw iti langalang.

⁷ Wenno di makaidna a billit nga agmaymaysa iti tuktok ti balay.

⁸ Agmalmalem a pabpabainandak dagiti kabusorko; pagang-angawanda ti naganko ket ilunlunoddak.

⁹ Gapu iti pungtot ken ungetmo, dapu ti taraon nga ipaunegko ket ti inumek natibnokan kadagiti luak.

¹⁰ Pinidutnak sanak impurruak iti adayo.

¹¹ Anniniwan iti malem ti kayarigan ti biagko; kaslaak la ruot a nagango.

¹² Ngem sika, O Apo, agnanayonka nga ari; laglagipendakanto dagiti amin a kaputotan.

¹³ Tumakderka ket kaasiam ti Sion, bumangonka; dimtengen ti tiempo ti panangngaasim kenkuana!

¹⁴ Ay-ayaten ngamin dagiti adipenmo dagiti batona, patpatgenda ti tapokna uray pay no narnarba.

¹⁵ Raemento dagiti nasion ti naganmo; bigbigento dagiti amin nga ari ti bilegmo.

¹⁶ Inton bangonen manen ti Apo ti Sion, ipakitananto ti kinadayagna.

¹⁷ Denggennanto dagiti nabaybay-an a tattaona, ket ipangagnanto dagiti kararagda.

¹⁸ Maisuratto daytoy nga agpaay iti sumaruno a kaputotan, tapno dagiti tattao a di pay nayanak idaydayawdanto.

¹⁹ Timmannawag ni Yahweh manipud ngato a nasantoan a yanna, manipud langit, kinitana ti daga.

²⁰ Nangngegna ti asug dagiti balud, ken winayawayaanna dagiti naikeddeng a matay.

²¹ Iti kasta, ipakaammonto dagiti tattao ti nagan ni Yahweh idiay Sion. Madaydayawto idiay Jerusalem,

²² inton aguummong dagiti nasion ken pagarian tapno agdaydayawda iti Apo.

²³ Tinukkolna ti pigsak idi agtutuboak pinaababana dagiti aldaw nga innak panagbiag.

²⁴ Diosko, dimo kadi pay pugsaten ti angesko ta diak pay la nadanon ti kinalakayko! Ta sika agnanayonka, O Apo.

²⁵ Idi un-unana pinarsuam ti daga. Inaramidmo dagiti langit babaen iti bukodmo nga ima.

²⁶ Mapukawda man amin, agnanayonto latta nga addaka; marunotdanto amin a kas iti pagan-anay. Ibellengmonto ida a kas iti kawes, ket mapukawdanto.

²⁷ Ngem pulos nga awan ti panagbaliwmo; awan panagpatingga ti biagmo.

²⁸ Agbiagto a sitatalged dagiti annak dagiti adipenmo; natalgedto dagiti kaputotanda iti babaen ti pannalaknibmo.