Dagiti Salmo 1 - Ti Baro a Naimbag a Damag Biblia

UMUNA A LIBRO (Salmo 1–41) Ti Pudno a Kinagasat

¹ Nagasat ti tao a di mangipangag iti pammagbaga dagiti managdakdakes, dina tuladen ti aramid dagiti managbasol, ken di makikadua kadagiti mangrabrabak iti Dios.

² Pagragsakanna ketdi ti Linteg ni Yahweh; aldaw-rabii a basbasaen ken ut-utobenna.

³ Mayarig iti kayo a naimula iti igid ti waig. Nalangto latta dagiti bulongna ken agbunga iti tiempona. Agballigi iti amin nga aramidenna.

⁴ Saan a kasta dagiti managdakdakes; kasda la taep a maitayab no agangin.

⁵ Ukomento ngarud ida ti Dios, ket mailaksiddanto iti gimong dagiti nalinteg.

⁶ Tarabayen ni Yahweh dagiti nalinteg, salaknibanna ida; ngem dagiti managdakdakes agturongda iti pakadadaelanda.