Dagiti Proverbio 9 - Ti Baro a Naimbag a Damag Biblia

Kinasirib ken Kinamaag

¹ Binangon ni Kinasirib ti balayna, ket nangipatakder iti pito nga adigi a pagsaadanna.

² Nangparti iti animal a para iti padaya, nangtempla iti arak ket insaganana ti lamisaan.

³ Imbaonna dagiti katulonganna a babbai iti kangatoan a disso iti ili a mangipakaammo:

⁴ “Umaykayo, dakayo nga ignorante!” Ket kadagiti maag, kinunana:

⁵ “Umaykayo, kanenyo ti taraonko ket inumenyo ti tinemplak nga arak.

⁶ Bay-anyo ti bunggoy dagiti ignorante a tattao ket agbiagkayto. Surotenyo ti dalan ti kinasirib.”

⁷ No babalawem tapno suroam ti tao a mangipagarup a ti bagina ti kasayaatan, mapabainanka laeng. No tubngarem ti dakes a tao, masaktanka laeng.

⁸ Dimo babalawen tapno isurom ti tao a mangipagarup a ti bagina ti kasayaatan; kaguranaka iti kasta nga aramidem. Ngem no tubngarem ti masirib, raemennaka.

⁹ Aniaman nga ibagam iti masirib, manayonan pay ti kinasiribna. Aniaman nga ibagam iti nalinteg, mainayon iti ammona.

¹⁰ Tapno agbalinka a masirib, umuna pay nga agdaydayawka a sibubuteng iti Apo. No ammom ti Nasantoan, addaanka iti pannakaawat.

¹¹ Paatiddogen ti kinasirib ti panagbiagmo.

¹² No addaanka iti kinasirib, sika ti aglak-am iti imbag. Ket no laksidem ti kinasirib, sika ti agsagaba.

¹³ Mayarig ti kinamaag iti babai a naariwawa, awan ammona ken awan babainna.

¹⁴ Agtugaw iti ridaw ti balayna, wenno iti kangatoan a lugar iti ili,

¹⁵ ket padagasenna dagiti aglabas a maringgoran kadagiti aramidda.

¹⁶ Kunana, “Sumrekkayo, dakay a nengneng!” Kunana iti maag,

¹⁷ “Nasam-it ti tinakaw a danum; naimas ti tinakaw a tinapay.”

¹⁸ Saan nga ammo dagiti ayabanna a matay dagiti mapan sadiay, a dagiti nakastreken addadan iti lubong dagiti natay.