Dagiti Proverbio 7 - Ti Baro a Naimbag a Damag Biblia

¹ Anakko, ipangagmo dagiti saok, ket tungpalem a tungpalen ti ibagak nga aramidem.

² Aramidem ti saok tapno agbiagka. Ipategmo dagiti pannursurok a kas iti panangipategmo kadagiti matam.

³ Laglagipem a kanayon ti pannursurok. Isuratmo iti pusom.

⁴ Ibilangmo ti kinasirib a kas kabsatmo a babai, ken ti sirmata a kas kasingedan a gayyemmo.

⁵ Ilisidaka iti asawa ti sabali ken iti babai a makagargari ti saona.

Ti Balangkantis a Babai

⁶ Naminsan, timman-awak iti tawa ti balayko.

⁷ Nakitak ti adu nga agtutubo nga awan padasna. Nadlawko ti maysa nga agtutubo a maag.

⁸ Magmagna iti kalsada iti nagsulian, iti asideg ti balay ti maysa a babai. Lumabas iti pagnaedanna

⁹ iti sardam nga apagsipnget.

¹⁰ Ket sinabat ti babai; nagkawes a kas iti balangkantis ken adda panggepna.

¹¹ Natured ken awan babainna, kanayon a magmagna iti kalsada.

¹² Agur-uray iti uray sadino a nagkurosan. No dadduma, adda iti tiendaan wenno kadagiti kalsada.

¹³ Inarakupna ti barito sana inagkan, pinerrengna ket kinunana:

¹⁴ “Nangidatagak iti datonko ita nga aldaw, ket nangilasinak iti karne a paset ti sakrifisio.

¹⁵ Isu a rimmuarak a mangbirok kenka. Sika ti sapsapulek ket ita adtoykan!

¹⁶ Inarpawak ti katrek iti dekolor a linen-Egipto.

¹⁷ Binangbangloak iti mirra, aloe ken kanela.

¹⁸ Umaykan! Agpatpatnagta nga aginnayat. Aginnarakupta ket agragsakta.

¹⁹ Awan ni lakayko iti balay. Nagbiahe iti adayo.

²⁰ Nangitugot iti adu a kuarta, ket agsublinto kalpasan ti dua a lawas.”

²¹ Ginargarina ti barito babaen iti pintasna ket nasulisog iti nalamuyot a panagsaona.

²² Pagammoan, simmurot ti lalaki kenkuana, kas iti baka a maipan iti pagpartian, kas iti ugsa a sipaparagsit nga agturong iti palab-og

²³ a pangsalputan ti pana iti pusona. Kasla billit a sumrek iti silo—dina ammo nga agpeggad ti biagna.

²⁴ Ita ngarud, annakko, denggendak. Imdenganyo a naimbag ti ibagak.

²⁵ Diyo itulok a masulisogkayo iti kasta a babai. Dikay mayaw-awan iti panangsapulyo kenkuana.

²⁶ Isu ti nakaigapuan ti pannakadadael ti adu a lallaki ket saan a mabilang dagiti natay gapu kenkuana.

²⁷ No inkay iti balayna, agturongkayo iti lubong dagiti natay. Ababa a dalan nga agtungpal ken patay ti balayna.