Dagiti Proverbio 3 - Ti Baro a Naimbag a Damag Biblia

Pammagbaga kadagiti Agtutubo a Lallaki

¹ Anakko, dimo liplipatan ti isurok kenka. Laglagipem a kanayon dagiti ibagak nga aramidem.

² Napaut ken narang-ay a panagbiag ti itedto kenka ti pannursurok.

³ Dimo baybay-an ti ayat ken kinapudno. Ibitinmo ida iti tengngedmo ken isuratmo ida iti pusom.

⁴ No aramidem daytoy, maay-ayonto kenka ti Dios ken dagiti tattao.

⁵ Agtalekka iti Apo iti amin a pusom. Dika agtalek iti ipagarupmo nga ammom.

⁶ Laglagipem ti Apo iti amin nga aramidmo, ket isuronanto kenka ti rumbeng a dalan.

⁷ Dimo ipagarup a masiribka; agbutengka ketdi iti Apo ket dika agaramid iti dakes.

⁸ No aramidem ti kasta, mayarigto iti agas a mangpaimbag kadagiti sugatmo ken mangikkat kadagiti saksakitmo.

⁹ Padayawam ti Apo babaen iti panangidatagmo kenkuana iti kasayaatan nga apitmo.

¹⁰ No aramidem ti kasta, mapnonto dagiti kamaligmo, ket aglippiasto iti arak dagiti burnaymo.

¹¹ Anakko, no tubngarennaka ti Apo ikasom a nalaing ket ibilangmo a kas ballaagna.

¹² Babalawen ti Apo dagiti ay-ayatenna, a kas iti panangbabalaw ti maysa nga ama iti anak nga ipatpategna.

¹³ Nagasat ti tao nga agbalin a masirib, ti tao a makagun-od iti pannakaawat.

¹⁴ Ad-adu ti magunggona iti sirib ngem iti pirak; napatpateg nga adayo ngem ti balitok.

¹⁵ Napatpateg nga adayo ti kinasirib ngem ti alahas; saan a maartapan ti uray ania a tarigagayam.

¹⁶ Ipaayna kenka ti atiddog a biag, kasta met ti kinabaknang ken dayaw.

¹⁷ Ti kinasirib mabalinna a paragsaken ti panagbiagmo. Maidalannaka iti panagbiagmo nga awan pakaan-anoam.

¹⁸ Nagasat dagiti agbalin a masirib. Ti kinasirib ikkannanto ida iti biag.

¹⁹ Pinarsua ti Apo ti daga babaen iti kinasiribna; insaadna dagiti langit babaen iti pannakaawatna.

²⁰ Babaen iti siribna, nagayus dagiti karayan, ket nagtudo iti daga.

²¹ Anakko, dimo pukawen ti kinasirib ken sirmatam. Dimo ipalubos a maikkatda kenka.

²² Isudanto ti mangted iti natalinaay ken naragsak a biag.

²³ Awanto ti pakaan-anoam iti dalanmo ket pulos a dikanto maitibkol.

²⁴ Awanto ti kabutengmo no agiddaka, ket naimasto latta ti turogmo iti agpatnag.

²⁵ Dikanto agdanag iti aniaman a didigra a kellaat a dumteng kas kadagiti didigra a kasla bagio a mangdadael kadagiti managdakdakes.

²⁶ Salaknibannaka ti Apo ket dinanto ipalubos a maipalab-ogka.

²⁷ No adda gundawaymo a mangipaay iti imbag, ipaaymo kadagiti makasapul.

²⁸ Dimo pagurayen agingga iti bigat ti kaarrubam no mabalinmo a tulongan itan.

²⁹ Dimo panggepen a dangran ti kaarrubam; agnaed iti asidegmo ket agtaltalek kenka.

³⁰ Dika makiriri iti siasinoman no awan ti gapuna, ket awan dakes nga inaramidna kenka.

³¹ Dimo apalan dagiti nauyong a tattao. Dimo tultuladen dagiti aramidda,

³² ta kagura ti Apo dagiti agaramid iti dakes ngem maragsakan kadagiti nalinteg.

³³ Ilunod ti Apo ti balay dagiti managdakdakes ngem bendisionanna ti taeng dagiti nalinteg.

³⁴ Dina pagan-ano dagiti natangsit ngem paraburanna dagiti napakumbaba.

³⁵ Dayaw ti magun-odto dagiti masirib ngem naynayonan laeng dagiti maag ti pannakaibabainda.