Dagiti Proverbio 10 - Ti Baro a Naimbag a Damag Biblia

Dagiti Proberbio ni Solomon

¹ Adtoy dagiti proberbio ni Solomon. No masiribka nga anak, pagtangsitnaka ni amam; no maagka, pagladingitem ni inam.

² Awan imbag nga ited kenka ti kinabaknang a nagtaud iti allilaw, ngem ti kinalinteg ti mangyadayo kenka ken patay.

³ Saan nga ipalubos ti Apo a mabisinan ti nalinteg a tao, ngem dina ipalubos a magun-od ti dakes a tao ti tarigagayanna.

⁴ No nasadutka, pumanglawka, ngem no nagagetka, bumaknangka.

⁵ Agani ti manakem a tao no tiempo ti panagani; nakababain ti maturog iti tiempo ti panagani.

⁶ Mabendisionan ti naimbag a tao. Ti sao ti nadangkes abbonganna ti naranggas a katataona.

⁷ Malaglagipto a kas bendision ti naimbag a tao, ngem awanton pakalaglagipan iti nadangkes.

⁸ Ipangag ti manakem ti naimbag a pammagbaga. Madadaelto ti tao nga agsao iti minamaag.

⁹ Natalged ken awan pakaan-anoan ti naimbag a tao, ngem matiliwto dagiti nakillo.

¹⁰ Riribuk ti patauden ti tao a saan a mangibaga iti pudno. Ngem ti situtured nga agdillaw, agtrabaho iti para iti kappia.

¹¹ Ubbog ti biag ti sao ti naimbag a tao, ngem ti sao ti nadangkes abbonganna ti naranggas a katataona.

¹² Riribuk ti patauden ti gura, ngem abbongan ti ayat ti amin a biddut.

¹³ Adda kinasirib iti sao ti nalaing a tao, ngem masapul a madusa dagiti maag.

¹⁴ Gun-oden dagiti masirib ti amin a pannakaammo a kabaelanda a gun-oden. No agsao ti maag, umas-asibay latta ti riribuk.

¹⁵ Ti sanikua ti salaknib ti nabaknang, ngem ti kinakurapay ti pakadadaelan ti napanglaw.

¹⁶ Biag ti gunggona ti naimbag a tao, ngem ti basol pataudenna ti ad-adu pay a basol.

¹⁷ Agbiag ti tao a mangipangag iti panangisuro, ngem agpeggad ti tao a di mangawat iti biddutna.

¹⁸ Ulbod ti tao a mangilemmeng iti gurana. Maag ti agiwaras iti pammadpadakes.

¹⁹ No saoka la a sao, dakdakkel ti gundawaymo nga agbasol. No masiribka, agulimekka.

²⁰ Mayarig iti nasudi a pirak ti sao ti naimbag a tao; awan serserbi ti panunot ti managdakdakes.

²¹ Adu a tattao ti matulongan ti sao ti naimbag a tao, ngem mabalin a pakatayam ti kinamaagmo.

²² Ti bendision ti Apo pabaknangenna ti maysa a tao. Mabalin a saan a manayonan ti kinabaknangna iti kinagagetna unay.

²³ Maag ti tao a pagragsakanna ti agaramid iti dakes. Pagragsakan ti nasaririt a tao ti kinasirib.

²⁴ Magun-od ti nalinteg a tao ti aniaman a tarigagayanna, ngem lak-amen ti managdakdakes ti kabutengna unay a dumteng.

²⁵ No dumteng ti bagio, mapukaw dagiti managdakdakes, ngem kanayon a natalged ti nalinteg a tao.

²⁶ Dimo ayaban ti sadut a mangaramid iti kayatmo a maaramid; mayarig dayta a tao iti suka a makaalino iti ngipen wenno asuk iti matam.

²⁷ Agbutengka iti Apo ket umatiddog ti biagmo, ngem ababa ti biag dagiti managdakdakes.

²⁸ Dagiti namnama dagiti naimbag a tao pataudenda ti rag-o, ngem awan ti mauray dagiti managdakdakes.

²⁹ Salakniban ti Apo dagiti awan basolna, ngem dadaelenna dagiti agaramid iti dakes.

³⁰ Natalged latta dagiti nalinteg a tattao, ngem saan nga agpaut iti daga ti managdakdakes.

³¹ Kinasirib ti sawen ti nalinteg a tao, ngem mapasardeng ti dila nga agsao kadagiti dakes a banag.

³² Ammo ti nalinteg ti nasayaat nga ibalikasna, ngem makapasakit ti sasawen ti managdakdakes.