Amos 7 - Ti Baro a Naimbag a Damag Biblia

Ti Parmata maipapan kadagiti Dudon

¹ Daytoy ti impakita kaniak ti Apo a Dios: Naimatangak ti panangpataudna iti pinangen a dudon kalpasan ti pannakaparaspas ti garami a bingay ti ari, ket agtubo manen dagiti ruot.

² Iti parmatak, nakitak nga inibus dagiti dudon ti amin a mula iti daga, ket kinunak: “O Apo a Dios, pakawanem dagiti tattaom! Kasano a makalasatda? Bassitda unay ken awan gawayda.”

³ Saan nga intuloy ti Apo ti panggepna. “Saanto a mapasamak ti nakitam,” kinunana.

Ti Parmata maipapan iti Apuy

⁴ Daytoy ti parmata nga impakita kaniak ti Apo a Dios: Nakitak ti panagsaganana a mangdusa kadagiti tattaona babaen iti apuy. Nasilmutan ti nalawa a taaw iti uneg ti daga, ket agkayamkamen ti apuy iti rabaw ti daga.

⁵ Ket kinunak, “O Apo a Dios, pangngaasim ta isardengmon! Kasano a makalasat dagiti tattaom? Bassitda unay ken awan gawayda.”

⁶ Saan nga intuloy ti Apo ti panggepna. “Uray daytoy, saanto met a mapasamak,” kinunana.

Ti Parmata maipapan iti Tinnag

⁷ Impakita kaniak ti Apo ti sabali a parmata: Nakitak nga agtaktakder iti abay ti maysa a bakud. Adda ig-iggamanna a tinnag a nausar iti pannakabangon ti bakud.

⁸ “Ania ti makitam, Amos?” sinaludsodna. “Maysa a tinnag,” insungbatko. Ket kinunana, “Aramatek daytoy a pangipakitak a mayarig dagiti tattaok iti bakud a nabangon a di naisurot iti tinnag. Diak pakawanenen ida.

⁹ Madadaelto dagiti lugar a pagdaydayawan dagiti kaputotan ni Isaac. Marakrakto dagiti nasantoan a disso ti Israel. Gibusakto ti familia ni Ari Jeroboam.”

Da Amos ken Amazias

¹⁰ Nagipulong ni Amazias a padi ti Betel ken ni Jeroboam nga ari ti Israel. Kinunana: “Isiksikatnaka ni Amos kadagiti Israelita. Madadaelto ti pagilian gapu kadagiti ibagbagana.

¹¹ Kunkunana a mataykanto iti paggugubatan, ket maitalawto dagiti tattao ti Israel sada maipan iti sabali a daga.”

¹² Kinuna ni Amazias ken ni Amos, “Sika a profeta! Agsublika idiay Juda ket sadiay ti panggedam babaen iti panangaskasabam.

¹³ Saankan nga agipadto ditoy Betel agsipud ta ditoy ti santuario ti ari ken templo ti pagilian.”

¹⁴ “Saanak a patangtangdanan a profeta,” insungbat ni Amos. “Maysaak nga agpaspastor ken agay-aywan kadagiti sikamoro.

¹⁵ Ngem innalanak ti Apo iti trabahok nga agpaspastor, ket imbilinna nga umayak agipadto kadagiti tattaona nga Israelita.

¹⁶ Ita, denggem ti sao ti Apo. Pasardengennak nga agipadto. Pasardengennak a mangballaag kadagiti Israelita.

¹⁷ Gapu ta paritannak, Amazias, kastoy met ti kuna kenka ti Apo: ‘Agbalinto ti asawam a balangkantis iti siudad. Matayto dagiti annakmo iti paggugubatan. Mabingbingayto ti dagam ket maitedto kadagiti sabali. Mataykanto iti ganggannaet a daga. Maitalawto nga awan duadua dagiti Israelita ket maipanda iti sabali a daga.’”