Amos 5 - Ti Baro a Naimbag a Damag Biblia

Maawis nga Agbabawi ti Israel

¹ Tattao ti Israel, denggenyo ti idung-awko kadakayo:

² Natnagen ti birhen nga Israel, ket saanen a bumangon. Pulos a saan a bumangonen! Napasag iti bukodna a daga ket awan ti mangpatakder kenkuana a tumakder.

³ Kuna ni Apo Dios, “Sangaribu a mannakigubat ti ibaon ti maysa a siudad ti Israel, ngem 100 laeng ti agsubli. Sabali a siudad ti mangibaon iti 100 a mannakigubat, ngem 10 laeng ti agsubli.”

⁴ Kuna ni Yahweh kadagiti Israelita, “Umaykayo kaniak ket agbiagkayo.

⁵ Dikay mapan agdaydayaw idiay Beerseba. Didak biroken idiay Betel—awanto ti pagbalbalinan ti Betel. Dikay mapan idiay Gilgal—maitalawto a kas balud iti sabali a daga dagiti tattao sadiay.”

⁶ Umasidegkayo iti Apo, ket agbiagkayo. Amangan no sumgiab a kas apuy ti pungtotna kadagiti Israelita—apuy a manguram kadagiti taga-Betel, ket awanto ti makaiddep.

⁷ Asikayto pay, dakayo a mangbalballikug iti hustisia ken mangilupitlupit kadagiti tattao.

⁸ Inaramid ti Apo dagiti bituen, ti Pleiades ken ti Orion. Pagbalinenna ti sipnget a bigat ken ti aldaw a rabii. Ayabanna ti danum ti taaw ket ibuyatna iti daga. Apo ti naganna.

⁹ Yegna ti pannakadadael dagiti mannakabalin ken dagiti sarikedkedda.

¹⁰ Dakayo a tattao, guraenyo ti mangikalintegan iti maisaklang ken agsao iti amin a kinapudno iti pangukoman.

¹¹ Gapu ta idadanesyo dagiti napanglaw ket takawenyo ti trigoda, dikayto makapagnaed kadagiti napintas a balay a bato nga inaramidyo wenno makainum iti arak a naggapu iti napintas a kaubasan nga imulayo.

¹² Ammok a nakaam-amak dagiti basolyo. Ammok met nga adu dagiti dakes nga inaramidyo. Idadanesyo ti naimbag a tao, agawatkayo iti pasuksok ket ikkatenyo ti kalintegan dagiti napanglaw a mangtunton iti kalinteganda iti pangukoman.

¹³ Dakes dagiti kasta a tiempo ket nasaysayaat nga agulimek ti manakem a tao.

¹⁴ Ikagumaanyo ti agaramid iti naimbag, saan nga iti dakes, tapno agbiagkayo; ket kas kunkunayo, awan duadua nga addanto kadakayo ti Apo a Dios a Mannakabalin-amin.

¹⁵ Guraenyo ti dakes. Ayatenyo ti naimbag. Ipakatyo ti kinahustisia kadagiti pangukoman. Nalabit a maasianto ti Apo kadagiti tattao a natda a sibibiag pay laeng iti daytoy a nasion.

¹⁶ Ngarud, kuna ti Apo Dios a Mannakabalin-amin, “Addanto panagdung-aw ken panagsangit iti nasaem kadagiti kalsada iti siudad. Maayabanto dagiti tattao ti away tapno makipagdung-awda kadagiti natangdanan nga agdung-aw.

¹⁷ Addanto dung-aw iti amin a kaubasan. Mapasamakto amin dagitoy ta umaykayo dusaen.” Daytoy ti sao ti Apo.

¹⁸ Nakabutbuteng ti pagbanaganyo, dakayo nga agur-uray iti yaay ti aldaw ti Apo! Apay a tarigagayanyo dayta nga aldaw? Adda kadi imbag nga itedna kadakayo! Aldawto ti sipnget, saan a lawag.

¹⁹ Mayarigto iti maysa a tao nga itartarayanna ti maysa a leon ket adda oso a masabatna! Wenno mayarigto iti agkamang iti maysa a balay sana isadag ti imana iti diding ket kagaten ti maysa nga uleg!

²⁰ Yegto ti aldaw ti Apo ti sipnget, saan a lawag. Nalidemto nga aldaw nga awan a pulos ti raniagna.

²¹ Kuna ti Apo, “Kagurak dagiti nasantoan a fiestayo; diak maragsakan iti panagrarambakyo.

²² Uray no idatagyo ti daton a mapuoran ken daton a makan, saankonto nga awaten ida. Saankonto met nga awaten dagiti pinalukmegyo nga animal a yegyo a kas daton a pagyaman.

²³ Isardengyo dagiti naariwawa a kantayo. Diak kayat a denggen ti uni dagiti arpayo.

²⁴ Ipaayyo ketdi ti hustisia a kas ayus ti waig ken ti kinalinteg a kas karayan a di maatianan.

²⁵ “Tattao ti Israel, bayat ti 40 a tawen a panagyanyo idiay let-ang, diak dinawat nga idatagandak iti daton ken sakrifisio.

²⁶ Ngem ita, gapu ta nagdaydayawkayo kadagiti imahen da Sakkut nga ari a didiosen, ken Kaiwan, ti bituen a didiosenyo, masapul nga awitenyo dagitoy

²⁷ inton ipanawkayo a kas balud iti maysa a daga iti labes ti Damasco,” kuna ni Yahweh; Mannakabalin-amin a Dios ti naganna.