Amos 2 - Ti Baro a Naimbag a Damag Biblia

Moab

¹ Kuna ni Yahweh, “Kanayon nga agbasol dagiti taga-Moab, isu nga awan duadua a dusaekto ida. Dida rinaem dagiti tulang ti ari ti Edom iti panangpuorda kadagitoy agingga a dimmapu.

² Mangidissuorak iti apuy iti daga ti Moab tapno mapuoran agingga a dumapu dagiti sarikedked ti Keriot. Matayto dagiti Moabita iti arimbangaw ti gubat, bayat ti panagiikkis dagiti soldado ken panaguni dagiti trumpeta.

³ Patayekto ti agturay idiay Moab ken amin a pangulo iti dayta a daga.”

Juda

⁴ Kuna ni Yahweh, “Kanayon nga agbasol dagiti taga-Juda, isu nga awan duadua a dusaekto ida. Linaisda dagiti pannursurok ket dida tinungpal dagiti bilinko. Inyaw-awan ida dagiti didiosen a nagdaydayawan met idi dagiti kapuonanda.

⁵ Daytoy ti gapuna a mangidissuorakto iti apuy iti Juda tapno mapuoran agingga a dumapu dagiti sarikedked ti Jerusalem.”

Ti Panangukom ti Dios iti Israel

⁶ Kuna ni Yahweh, “Kanayon nga agbasol dagiti Israelita, isu nga awan duadua a dusaekto ida. Ilakoda a kas tagabu dagiti tattao nga awanan basol a di makabayad iti utangda ken dagiti napanglaw iti gatad ti sangaparis a sapatos.

⁷ Ibaddebaddekda dagiti nakapsut ken awan gawayda ken iwalinda dagiti napanglaw iti dalanda. Kaiddaen ti ama ken ti anakna a lalaki ti isu met laeng a balangkantis iti templo ket tulawanda ti nasantoan a naganko.

⁸ Iti amin a lugar a pagdaydayawan, pagturogda dagiti pagan-anay a salda dagiti pautangda. Iti templo ti Diosda, agiinumda iti arak nga innalada kadagiti nakautang kadakuada.

⁹ “Apay a kastoy ti ar-aramidenyo, dakayo a tattaok, idinto a dakayo ti nakaipuonan ti panangpapatayko kadagiti Amorreo, tattao a natatayag a kas kadagiti kayo a sedro ken napipigsa a kas lugo?

¹⁰ Siak ti nangiruar kadakay idiay Egipto. Indalankay idiay let-ang iti 40 a tawen ket intedko a tagikuaenyo ti daga dagiti Amorreo.

¹¹ Dinutokak a profeta ti dadduma kadagiti annakyo a lallaki. Dinutokak met nga agbalin a Nazireo ti sumagmamano kadagiti agtutuboyo. Saan kadi a pudno daytoy, dakayo nga Israelita? Siak, ni Yahweh, ti agsasao.

¹² Ngem pinainumyo dagiti Nazireo iti arak, ket binilinyo dagiti profeta a dida ipakaammo ti mensahek.

¹³ Ita, parukmaenkayo a mamimpinsan ket agirikayo a kas iti panagiri ti karison a nagkarga iti adu.

¹⁴ Uray ti napardas a tumaray, dinto makalisi. Mapukawto ti pigsa dagiti nabileg. Saanto a maisalakan dagiti soldado ti mismo a bagida.

¹⁵ Awanto ti maaramid ti pumapana. Saanto a maisalakan ti napardas a tumaray, ket saanto a makalisi ti nakasakay iti kabalio.

¹⁶ Iti dayta nga aldaw, uray ti katuredan a soldado ibbatannanto ti igamna ket agtaray.” Daytoy ti sao ni Yahweh.