2 Timoteo 3 - Ti Baro a Naimbag a Damag Biblia

Dagiti Maudi nga Aldaw

¹ Laglagipem a napeggadto dagiti maudi nga aldaw.

² Adunto dagiti tattao a naimut, naagum, napangas, ken napalangguad. Nauyawdanto, sukirendanto dagiti nagannak kadakuada, didanto bigbigen ti naimbag a nakem, awanto ti pammatida.

³ Naranggas, awanan asi, mamadpadakes, nauyong ken narungsotdanto, kaguradanto dagiti naimbag.

⁴ Mangliliput, darasudos ken natangsitdanto. Ad-addanto nga ayatenda ti nalabes a ragragsak ngem ti Dios.

⁵ Agparangdanto a relihioso ngem saan met a makita iti biagda ti pudno a bileg ti relihion. Adaywam dagitoy a tattao.

⁶ Sumagmamano kadakuada ti sumrek kadagiti balay ket allilawenda dagiti babbai a naigamer iti basol ken naikulbo iti amin a kita ti gartem,

⁷ babbai a kankanayon nga agsursuro ngem pulos a dida maammoan ti pudno.

⁸ Sinukir idi da Janes ken Jambres ni Moises. Sukirento met dagitoy a tattao ti pudno. Rinuker ti panunot dagitoy a tattao ket sinsinan ti pammatida.

⁹ Ngem didanto makaadayo, ta makitanto ti amin a tao ti kinamaagda. Kasta ti napasamak da Janes ken Jambres.

Maudi a Pammagbaga

¹⁰ Ngem sinurotmo ti pannursurok, ti panagbiagko, ken ti panggepko iti daytoy a biag. Napaliiwmo ti pammatik, ti anusko, ti ayatko, ti panagibturko,

¹¹ ti pannakaidadanesko ken ti panagsagabak. Ammom dagiti amin a napasamak kaniak idiay Antiokia, Iconio, Listra, ken dagiti nakabutbuteng a pannakaidadanes nga inibturak. Ngem insalakannak ti Apo kadagitoy!

¹² Maidadanesto ti amin nga agtarigagay nga agbiag iti nadiosan a panagbiag ken ni Cristo Jesus.

¹³ Ngem dumakdakesto dagiti dakes a tattao ken manangallilaw, ket agtultuloydanto a mangallilaw ken paallilaw.

¹⁴ Ngem no maipapan kenka, agtalinaedka koma iti nasursurom ken pinatim a sitatalged. Ammom dagiti nangisuro kenka.

¹⁵ Laglagipem a sipud pay iti kinaubingmo, naammoamon dagiti Nasantoan a Sursurat. Mabalindaka nga isuro maipapan iti pannakaisalakan babaen iti pammati ken ni Cristo Jesus.

¹⁶ Impaltiing ti Dios ti amin a Nasantoan a Surat, ket naserbi a pangisuro iti kinapudno, pangbabalaw, pangatur iti biddut ken pakasursuroan iti nalinteg a panagbiag,

¹⁷ tapno awan pagkurangan ti tao nga agserbi iti Dios, ket sisasagana nga agaramid iti amin a kita ti kinaimbag.