2 Taga-Corinto 9 - Ti Baro a Naimbag a Damag Biblia

Tulong kadagiti Pada a Kristiano

¹ Saanen a masapul nga agsuratak kadakayo maipapan iti tulong a maipatulod kadagiti nasantoan a tattao ti Dios idiay Judea.

² Ammok a siaayatkayo a tumulong, ket impasindayagkayo kadagiti taga-Macedonia. Kinunak, “Sidadaan a tumulong dagiti kakabsat idiay Acaya manipud pay itay napan a tawen.” Gapu iti reggetyo a tumulong, natignay ti kaaduan kadakuada.

³ Ita, ibaonko dagitoy a kakabsat tapno saan nga ubbaw ti panangipasindayagmi kadakayo ngem kas nasaokon, sisasagana koma ti tulongyo.

⁴ No kumuyog kaniak dagiti taga-Macedonia ket maduktalanda a saankay a nakasagana, anian a pannakaibabainmi—uray dakayo mabainankayo la ketdi—ta dakkel ti panagtalekmi kadakayo!

⁵ Isu a napanunotko a masapul a mauyotan dagitoy a kakabsat tapno umun-unada nga umay ngem siak a mangkita iti pannakaisagana ti sagut nga inkariyo nga ited. Sisasagananto koman dagitoy inton sumangpetak, ket maipakitanto a siaayatkayo a mangted saan a gapu ta mapilitkayo.

⁶ Laglagipenyo a ti tao a bassit ti imulana, bassitto met ti apitenna. Ti tao nga adu ti imulana, adunto met ti apitenna.

⁷ Ngarud, mangted koma ti tunggal maysa kas agubbog iti pusona. Saan koma a nasakit ti nakemna wenno mapilpilit, ta ayaten ti Dios ti mangted a siraragsak.

⁸ Kabaelan nga ited ti Dios ti ad-adu pay ngem ti kasapulanyo ket aglaplapunosankayto a kanayon tapno agsobsobraankayto a maipaay iti panagaramidyo iti naimbag.

⁹ Kas kuna ti Nasantoan a Surat: “Sibubuslon a mangted kadagiti napanglaw, Ket agnanayon ti kinamanagparaburna.”

¹⁰ Ket ti Dios a mangted iti bukel iti agmulmula ken iti tinapay a taraon, ikkannakayto met iti amin a bukel a masapulyo ket paaduennanto tapno adunto ti apitenyo gapu iti kinamanagparaburyo.

¹¹ Pabaknangennakayto met a kanayon tapno mabalinyo ti agparabur iti amin a tiempo, ket adunto ti agyaman iti Dios gapu kadagiti tulongyo nga inawatda kadakami.

¹² Ta daytoy a panagserbiyo, saanna la a punnoan ti kasapulan dagiti tattao ti Dios, no di ket tignayenna pay ti adu nga agyaman kenkuana.

¹³ Ket gapu iti pammaneknek nga ibunga daytoy a panagserbiyo, adunto ti mangidaydayaw iti Dios gapu iti panagtulnogyo iti ebanghelio ni Cristo. Wen, agyamandanto iti Dios gapu iti ayatyo a mangipaay iti kasapulanda ken iti pagimbagan ti amin.

¹⁴ Iti kasta, idawdawatandakayto a sipapasnek gapu iti naisangsangayan a parabur nga inted ti Dios kadakayo.

¹⁵ Agyamantayo iti Dios gapu iti saan a magatadan a sagutna!