2 Taga-Corinto 10 - Ti Baro a Naimbag a Damag Biblia

Ikalintegan ni Pablo ti Panagserbina

¹ Siak, ni Pablo, ti mismo nga agdawat kadakayo. Kunkunada a napakumbabaak no addaak iti dennayo, ngem nagubsangak no adayoak. Yunay-unayko, gapu iti kinaanus ken kinamanangngaasi ni Cristo, a

² didak piliten nga agbalin a nagubsang kadakayo no umayak. Ammok a kabaelak met ti agunget kadagiti agkunkuna nga agtignaykami gapu iti nainlubongan a panggep.

³ Agpayso nga addakami ditoy lubong, ngem dikam makiranget gapu iti nainlubongan a panggep.

⁴ Saan a dagiti igam ti lubong ti aramatenmi a pakidangadang. Usarenmi ketdi dagiti nabileg nga armas ti Dios a pangrebba kadagiti sarikedked ti kabusor. Dadaelenmi dagiti ulbod a pannakisuppiat.

⁵ Ikkatenmi amin a kinatangsit a makalapped iti pannakaammo iti Dios. Kayawanmi amin a panunot tapno agtungpalda ken ni Cristo.

⁶ Ket kalpasan ti panangpaneknekyo iti naan-anay a kinatulnogyo, sisasaganakamto a mangdusa kadagiti nasukir.

⁷ Kitkitaenyo laeng ti akinruar dagiti bambanag. No adda siasinoman a mangipagarup iti bagina a tao ni Cristo, utobenna man ti kinasiasinona? Uray dakami, tattaonakami met ni Cristo a kas kenkuana.

⁸ Saanak a mabain, uray no nalabes ti panangipasindayagko iti turay nga inted ti Apo kadakami—turay a mangpatanor kadakayo, saan a mangdadael.

⁹ Diyo ipagarup a butbutngenkayo kadagiti suratko.

¹⁰ Addanto agkuna, “Nauyong ken nagubsang dagiti linaon ti surat ni Pablo ngem no isu a mismo ti adda kadatayo, kasla awan durina ket awan met mamaay ti ibagbagana.”

¹¹ Nasken a maawatan ti kasta a tao nga awan naggidiatan dagiti isuratmi no adayokami ken dagiti aramidenmi no addakami iti dennayo.

¹² Ta saankami nga agtured a mangibilang wenno mangipada iti bagimi kadagiti mangidaydayaw unay iti bagida. Nagkunengdan! Agaramidda iti bukodda a pagrukodan a pangrukod iti mismo a bagida.

¹³ Nupay kasta, iti biangmi, saanmi a lablabsen ti agpasindayag. Aramidenmi ti maiparbeng a trabaho nga intuding ti Dios. Mairaman ti trabahomi kadakayo.

¹⁴ Ket gapu ta addakayo iti masakupan daytoy, saankami a naglabes idi immaykami kadakayo tapno ipakaammomi ti Naimbag a Damag maipapan ken ni Cristo.

¹⁵ Isu a saanmi nga ipasindayag ti trabaho nga inaramid dagiti dadduma iti labes ti intuding ti Dios kadakami. Ngem namnamaenmi ketdi a pumigsa ti pammatiyo, nga ad-adunto pay ti maaramidmi iti dennayo, ket kankanayon nga addakami iti sakup nga inted ti Dios.

¹⁶ Iti kasta, mabalinminto nga ikasaba ti Naimbag a Damag kadagiti sabali a pagilian nga adayo kadakayo. Saan a masapul a pagpannakkelmi ti trabaho a naaramiden iti sakup ti sabali a tao.

¹⁷ Ngem kas kuna ti Nasantoan a Surat, “Siasinoman nga agpasindayag, ipasindayagna koma ti inaramid ti Apo.”

¹⁸ Ta saan nga anamongan ti Dios dagiti tattao a mangidaydayaw iti bagida. Anamonganna laeng dagiti tattao nga idaydayawna.