2 Samuel 9 - Ti Baro a Naimbag a Damag Biblia

Ni David ken ni Mefiboset

¹ Iti naminsan, sinaludsod ni David, “Adda ngata pay sibibiag a kabagian ni Saul? Kayatko nga ipakita ti asik kenkuana gapu ken ni Jonatan.”

² Adda idi maysa nga adipen iti familia ni Saul nga agnagan iti Siba. Naibaga kenkuana a dumatag ken ni David, ket idi napan, sinaludsod ti ari no isu ni Siba. “Wen, apo,” insungbat ni Siba, “siak ti nanumo nga adipenmo.”

³ Sinaludsod ti ari kenkuana, “Adda kadi pay sibibiag iti familia ni Saul? Kayatko a maipakitak kenkuana ti kinapudno ken kinaimbagko kas inkarik iti Dios.” Simmungbat ni Siba, “Adda pay la maysa kadagiti annak ni Jonatan, ngem pilay.”

⁴ “Sadino ti ayanna?” sinaludsod ti ari. “Adda idiay Lodebar, iti balay ni Makir nga anak ni Ammiel,” insungbat ni Siba.

⁵ Iti kasta, pinaayaban ni Ari David.

⁶ Idi sumangpet ni Mefiboset nga anak ni Jonatan ken apoko ni Saul, nagpakleb iti sangoanan ni David a mangipakita iti panagraemna. Sinaludsod ni Ari David, “Sika kadi ni Mefiboset?” “Wen, apo,” insungbat ni Mefiboset. “Siak ti nanumo nga adipenmo.”

⁷ “Dika agbuteng,” kinuna ni David. “Ipakitak ti kinaimbagko kenka gapu ken ni Jonatan nga amam. Isublik ti amin a daga a kukua daydi apongmo a Saul, ket awisenka a makipangan kaniak iti agnanayon.”

⁸ Nagpakleb manen ni Mefiboset sana kinuna, “Apay a naimbagkay unay kaniak, apo? Mayarigak la iti natay nga aso nga awan serserbina.”

⁹ Pinaayaban ni David ni Siba nga adipen ni Saul. Kinunana kenkuana, “Itedkon ken ni Mefiboset ti amin a kukua daydi Saul ken ti familiana.

¹⁰ Dakayo ngarud kadagiti annak ken adipenmo, ti mangtalon iti daga ket itedyo ti amin nga apit iti familiana. Nupay kasta, kanayonto a makilanglang kaniak ni Mefiboset.” (Sangapulo ket lima a lallaki ti annak ni Siba ken 20 ti adipenna.)

¹¹ “Aramidek amin nga ibilinmo,” insungbat ni Siba. Manipud idin, nakilanglang ni Mefiboset iti lamisaan ti ari a kas maysa kadagiti annakna.

¹² Adda agtutubo nga anak ni Mefiboset nga agnagan iti Mica. Nagbalin nga adipen ni Mefiboset dagiti amin a kameng ti familia ni Siba.

¹³ Nagnaed ngarud idiay Jerusalem ni Mefiboset a pilay ti dua a sakana, ket nangan iti lamisaan ti ari iti unos ti panagbiagna.