2 Samuel 22 - Ti Baro a Naimbag a Damag Biblia

Ti Kanta ni David iti Panagballigina

¹ Daytoy ti kanta ni David nga agpaay ken ni Yahweh kalpasan ti panangispal kenkuana ni Yahweh iti pannakabalin ni Saul ken kadagiti dadduma a kabusorna:

² Ni Yahweh ti Salakanko; isu ti napigsa a sarikedkedko.

³ Ti Diosko ti mangsalaknib kaniak ket awanto ti pakaan-anoak. Kas maysa a kalasag, salaknibannak, ikaluya ken aywanannak.

⁴ Umawagak ken ni Yahweh, ket isalakannak kadagiti kabusorko. Madaydayaw ti Apo!

⁵ Dagiti dalluyon ni patay sinabbuagandak ti layus ni pannakadadael inyanudnak.

⁶ Dagiti tali ni patay pinulipolandak, nangikabil ni tanem iti pakaipalab-ogak.

⁷ Iti pannakariribukko, immawagak ken ni Yahweh; immasugak iti tulong iti Diosko. Idiay templona, nangngegna ti timekko, ket inimdenganna ti panagpatulongko.

⁸ Nagginggined ken nagunggon ti daga; nadayeg ken nagindayon ti fondasion ti langit agsipud ta nakapungtot ti Dios!

⁹ Rimmuar ti asuk iti agongna; kasta met ti sumsumgiab nga apuy ken dumardarang a beggang iti ngiwatna.

¹⁰ Linuktanna ti tangatang ket bimmaba; adda nangisit nga ulep iti babaen dagiti sakana.

¹¹ Nakasakay iti bukot ti kerubin, napardas a nagdaliasat iti payak ti angin.

¹² Binungonna ti bagina iti sipnget, nalikmut iti napuskol nga ulep a napno iti danum.

¹³ Iti masangoananna, adda kimat a nangpataud kadagiti yelo ken dumardarang a beggang.

¹⁴ Naggurruod ti Apo iti tangatang, ket nangngeg ti timek ti Kangatoan.

¹⁵ Imbiatna dagiti panana, ket winarawarana dagiti kabusorna; pinagkimatna, ket pinagtatarayna ida.

¹⁶ Nagparang ti lansad ti taaw; nawaknitan dagiti fondasion ti daga, idi binabalaw ni Yahweh dagiti kabusorna, ket binugkawanna ida iti pungtotna.

¹⁷ Manipud langit, ginaw-atnak ni Yahweh ket iniggamannak, kadagiti adalem a danum inalawnak.

¹⁸ Inarayatnak kadagiti nabileg a kabusorko ken kadagiti gumurgura kaniak— napipigsada ket diak kabaelan ida!

¹⁹ Dinarupdak idi mariribukak, ngem ni Yahweh sinalaknibannak.

²⁰ Tinulongannak iti nagpeggadak; insalakannak ta maragsakan kaniak.

²¹ Gunggonaannak ni Yahweh gapu ta nalintegak; bendisionannak ta awan nakabasolak.

²² Ti linteg ni Yahweh tinungpalko; saanko a binusor iti Diosko.

²³ Inannurotko dagiti amin a lintegna, diak sinalungasing ti bilinna.

²⁴ Ammona nga awan biddutko, nga inadaywak ti kinadakes.

²⁵ Iti kasta, gunggonaannak gapu ta nalintegak, ta ammona nga awan nakabasolak.

²⁶ O Apo, agparangka a napudnoka kadagiti napudno kenka; naimbagka kadagiti awan pagkuranganna.

²⁷ Kadagiti nadalus, agparangka a nadalus, ngem naungetka kadagiti nadangkok.

²⁸ Isalakanmo dagiti napakumbaba, ngem dagiti natangsit ipababam ida.

²⁹ O Apo, sika ti silawko. Lawagam ti kinasipngetko.

³⁰ Papigsaennak a sumaranget kadagiti kabusorko; ikkannak iti bileg a mangduprak iti sarikedkedda.

³¹ Daytoy a Dios awan pakapilawan ti aramidna; mapagtalkan dagiti saona! Kasla maysa a kalasag nga agpaay kadagiti amin a kumamang kenkuana.

³² Siasino ti Dios no saan laeng a ni Yahweh? Ket siasino ti bato no saan a ti Diostayo?

³³ Daytoy a Dios ti nabileg a taklinko; Aramidenda a natalged ti pagnaak.

³⁴ Kadagiti bambantay, aywanannak; kas iti ugsa, papartakennak.

³⁵ Sanayennak a makigubat tapno mabiatko ti bai a gambang.

³⁶ Salakniban ken isalakannak, O Apo, intan-oknak babaen iti tulongmo.

³⁷ Dimo impalubos a matiliwak ket pulos a diak naitublak.

³⁸ Kamatek dagiti kabusorko ket tiliwek ida; diak sumardeng agingga a madadaelda.

³⁹ Padsoek ida ket dida makabangon; mapasagda iti sangoanak.

⁴⁰ Ikkannak iti pigsa a makigubat ket tulongannak a mangparmek kadagiti kabusorko.

⁴¹ Pagtarayem dagiti kabusorko nga umadayo kaniak; pukawek dagiti gumura kaniak.

⁴² Agpaarayatda ngem awan makaikanawa kadakuada; umawagda ken ni Yahweh ngem dina sungbatan ida.

⁴³ Tumekek ida a kas tapok; payatpayatek ida a kas pitak kadagiti kalsada.

⁴⁴ Insalakannak kadagiti immalsa a tattao, pinagturaynak kadagiti nasion; nagserbi kaniak dagiti diak am-ammo a tattao.

⁴⁵ Agtamed kaniak dagiti ganggannaet; agtulnogda no mangngegdak.

⁴⁶ Mapukawda ti namnamada, agtigergerda a rummuar iti sarikedkedda.

⁴⁷ Agbiag ti Apo! Madaydayaw ti Salaknibko! Ti Dios ti Salakanko! Ipakaammoyo ti kinatan-okna!

⁴⁸ Tulongannak a mangparmek kadagiti kabusorko, ken mangparukma kadagiti tattao tapno iturayak ida

⁴⁹ ket isalakannak kadagiti gumura kaniak. Pagballigiennak ket parmekek dagiti kabusorko; salaknibannak kadagiti naranggas a tattao.

⁵⁰ Isut' gapuna, O Apo, idaydayawkanto iti imatang dagiti nasion; ikantakto dagiti pagdaydayawko kenka.

⁵¹ Ited ti Dios dagiti naindaklan a balligi iti arina; agnanayon nga ipakitana ti di agbalbaliw nga ayatna iti pinilina, ni David ken kadagiti kaputotanna.