2 Cronicas 3 - Ti Baro a Naimbag a Damag Biblia

¹ Insagana idin ni Ari David nga ama ni Solomon ti lugar a pakabangonan ti Templo. Adda daytoy idiay Jerusalem, iti Bantay Moria, iti disso a nagparangan idi ni Yahweh ken ni David, iti pagir-irikan ni Arauna a Jebuseo. Nangrugi ti trabaho

² iti maikadua a bulan iti maikapat a tawen a panagari ni Solomon.

³ Adtoy ti rukod ti Templo a binangon ni Ari Solomon: 90 a kadapan ti kaatiddogna ken 30 a kadapan ti kaakabana.

⁴ Tallopulo met a kadapan ti kaakaba ti masungad a kuarto, kas iti Templo ket 180 a kadapan ti kangatona. Puro a balitok ti naikalupkop iti uneg ti kuarto.

⁵ Nadidingan iti sedro ti kadakkelan a kuarto: nakalupkopan dagiti diding iti kasayaatan a balitok ket nakitikitan dagitoy kadagiti sinan-kayo a palma ken kawar.

⁶ Inarkosan ti ari ti Templo iti napintas ken agkakapateg a batbato ken balitok a nagatang iti daga ti Parvaim.

⁷ Inusarna dagiti balitok a pinangkalupkop kadagiti diding, awanan, dagiti pagserkan ken ruangan ti Templo. Naikitikit kadagiti diding dagiti imahen dagiti kerubim.

⁸ Tallopulo a kadapan ti kaakaba ti akin-uneg a kuarto a maawagan iti Kasantoan a Disso, ket 30 a kadapan met ti kaatiddogna. Duapulo ket lima a tonelada a balitok ti nausar a naikalupkop kadagiti diding ti Kasantoan a Disso:

⁹ duapulo nga onsa a balitok ti naaramid a lansa, ket nakalupkopan met iti balitok dagiti diding dagiti akingngato a kuarto.

¹⁰ Nagpaaramid pay ti ari iti dua a sinan-kerubim a plata. Pinakalupkopanna ida iti balitok sana inkabil iti Kasantoan a Disso,

^11-13 ket pinagabayda ida a sumango iti pagserkan. Sagduduada iti payak. Pito ket kagudua a kadapan ti kaatiddog ti tunggal payak. Ukrad dagiti payakda ket agsinnagidda iti tengnga ti kuarto. Dumanon kadagiti agsumbangir a diding ti sabali a payakda. Tallopulo a kadapan ti nakaukradan dagiti payakda.

¹⁴ Adda bengbeng a naaramid iti linen ken iti lupot a natina iti asul, purpura ken nalabaga. Naiborda dagiti sinan-kerubim iti daytoy a bengbeng.

Dagiti Dua a Bronse nga Adigi

¹⁵ Nagpaaramid ti ari iti dua nga adigi nga agtayag iti 52 a kadapan, ket impatakderna ida iti sango ti Templo. Iti tuktok ti tunggal adigi, adda paratok a pito ket kagudua a kadapan ti kangatona.

¹⁶ Naarkosan ti paratok kadagiti nalagalaga a kawar ken 100 a bronse a sinan-granada.

¹⁷ Naipatakder dagiti adigi iti agsumbangir a pagserkan iti templo. Jakin ti nagan ti adigi nga akin-abagatan; Boaz ti akin-amianan.