1 Samuel 8 - Ti Baro a Naimbag a Damag Biblia

Dawaten dagiti Tattao a Maikkanda iti Ari

¹ Idi lumakayen ni Samuel, dinutokanna dagiti annakna nga ukom iti Israel.

² Joel ti nagan ti inauna ket Abias met ti inaudi. Nagserbida nga ukom idiay Beerseba.

³ Ngem dida sinurot ti tugot ni amada. Ti laeng panguartaanda ti pampanunotenda, isu a nagawatda iti pasuksok ket saan a nalinteg ti panangrisutda kadagiti darum.

⁴ Naguummong dagiti amin a panglakayen ti Israel sada napan ken ni Samuel idiay Rama.

⁵ Kinunada kenkuana, “Kitaem, lumakaykan ket saan a sumurot dagiti annakmo iti tugotmo. Nasaysayaat no mangdutokka iti ari a mangituray kadakami, tapno maaddaankami iti ari a kas kadagiti sabali a pagilian.”

⁶ Saan a naragsakan ni Samuel iti panagdawatda iti ari, ket nagkararag ken ni Yahweh. Kinuna ni Yahweh:

⁷ “Ipangagmo ti amin nga ibaga dagiti tattao kenka, ta saan a sika ti linaksidda no di ket siak ta didakon kayat a mangituray kadakuada.

⁸ Manipud idi inruarko ida idiay Egipto, tinallikudandakon ket nagdaydayawda kadagiti didiosen. Ita, ar-aramidenda met kenka ti inar-aramidda kaniak.

⁹ Ipangagmo ngarud ti saoda, ngem ballaagam ida iti nainget ket ilawlawagmo kadakuada no anianto ti aramiden ti ari a mangituray kadakuada.”

¹⁰ Impakaammo ni Samuel kadagiti agdawat kenkuana iti ari ti amin nga imbaga kenkuana ni Yahweh.

¹¹ Kinunana, “Kastoyto ti aramiden kadakayo ti ari: Alaennanto dagiti annakyo a lallaki ket pagbalinennanto ida a mannakigubat. Addanto dagiti agserbi kadagiti luganna a pakigubat. Agpaayto dagiti dadduma a kas mannakigubat a nakakabalio. Sabalinto pay dagiti para darup nga adda iti sango dagiti lugan a pakigubat.

¹² Pagbalinennanto dagiti dadduma nga ofisiales nga agaywan iti rinibu a tao, ket addanto met dagiti agaywan iti limapulo. Pagaradoennanto dagiti lallaki nga annakyo kadagiti talonna, agani kadagiti apitna, ken agaramid iti armas ken kadagiti alikamen nga agpaay kadagiti luganna a pakigubat.

¹³ Alaennanto dagiti annakyo a babbai nga agaramid iti bangbanglo, para luto ken panadera.

¹⁴ Alaennanto dagiti kasayaatan a talon, kaubasan ken kaoliboanyo ket itedna kadagiti ofisialesna.

¹⁵ Alaennanto ti apagkapullo dagiti trigo ken ubasyo nga agpaay kadagiti ofisiales nga agserserbi iti tronona ken dadduma pay a turayen.

¹⁶ Alaennanto dagiti tagabuyo, dagiti kasayaatan a baka ken asnoyo, ket agserbidanto kenkuana.

¹⁷ Alaennanto ti apagkapullo ti arbanyo. Agbalinkayto a tagabuna.

¹⁸ Inton umay dayta a tiempo, agasugkayto iti nasaem gapu iti ari a mismo a piniliyo, ngem dinakayto ipangag ti Apo.”

¹⁹ Saan a dimngeg dagiti tattao ken ni Samuel, ket kinunada ketdi, “Kayatmi ti maaddaan iti ari

²⁰ tapno maipadakami kadagiti sabali a pagilian. Iturayannakami ket ipanguloannakami a makiranget ken makigubat.”

²¹ Dinengngeg ni Samuel ti amin a sinaoda ket kalpasanna, napanna imbaga dagitoy ken ni Yahweh.

²² “Aramidem ti kayatda ket ikkam ida iti ari,” insungbat ni Yahweh. Kalpasanna, pinagawid ni Samuel dagiti amin nga Israelita.