1 Samuel 29 - Ti Baro a Naimbag a Damag Biblia

Saan nga Awaten dagiti Filisteo ti Tulong ni David

¹ Inummong dagiti Filisteo ti amin a mannakigubatda ket nagkampoda idiay Afec. Nagkampo met dagiti Israelita iti asideg ti ubbog iti Tanap ti Jezreel.

² Nagmartsa dagiti lima nga ari a Filisteo ket impanguloanda dagiti buyotda a buklen ti ginasut ken rinibu a tattao. Adda ni David ken dagiti tattaona iti likud agraman ni Akis.

³ Idi nakita ida dagiti kapitan a Filisteo, sinaludsodda, “Ania ti kukuaen ditoy dagitoy a Hebreo?” Simmungbat ni Akis, “Dayta ni David a maysa nga ofisial ni Saul nga ari ti Israel. Nabayagen nga adda kaniak. Manipud idi immay, awan pay nagbiddutanna.”

⁴ Ngem nakapungtot dagiti kapitan a Filisteo ken ni Akis ket kinunada kenkuana, “Pagsubliem dayta a tao iti ili nga intedmo kenkuana. Dimo palubosan a kumuyog kadatayo amangan no liputannatayo ket agbalin a kabusor inton madama ti ranget. Ta awanen ti nasaysayaat a panggun-odna iti parabur ni apona no di ti panangpapatayna kadagiti tattaotayo!

⁵ Kinapudnona, isu dayta ni David nga ikankanta dagiti babbai bayat ti panagsasalada: ‘Rinibu ti pinatay ni Saul, ngem pinullo ribu ti pinatay ni David!’”

⁶ Inayaban ni Akis ni David ket kinunana kenkuana, “Ammok a napudnoka kaniak ket isapatak daytoy iti nagan ti sibibiag a Dios ti Israel. Maragsakanak iti ikukuyogmo kaniak tapno makirangetka iti daytoy a gubat. Manipud simmangpetka, awan pay ti nasarakak a biddutmo. Ngem saandaka kayat dagiti dadduma nga ari.

⁷ Ngarud, agawidka a sitatalna ket dika agaramid iti aniaman a mamagpungtot kadakuada.”

⁸ “Ania kadi ti dakes nga inaramidko?” insungbat ni David. “Pulos nga awan ti nasarakam a biddut kaniak, apo, manipud nagserbiak kenka. Apay kadi a diak mabalin ti kumuyog kenka, sika nga apok ken arik, tapno gubatek dagiti kabusormo?”

⁹ “Ammok a napudnoka kaniak ket ibilangka a kas anghel ti Dios,” insungbat ni Akis. “Ngem imbaga dagiti dadduma nga ari a dimo mabalin ti kumuyog kadakami iti paggugubatan.

¹⁰ Ngarud, David, sapaem ti bumangon inton bigat, agraman dagiti amin a kimmuyog kenka a nangpanaw ken ni Saul, ket pumanawkayo apaman nga aglawag.”

¹¹ Kabigatanna, nasapa a nagrubbuat ni David ken dagiti tattaona tapno agsublida idiay Filistia. Intuloy dagiti Filisteo ti napan idiay Jezreel.