1 Juan 5 - Ti Baro a Naimbag a Damag Biblia

Ti Pannakaparmek ti Lubong babaen iti Pammati

¹ Anak ti Dios ti siasinoman a mamati a ni Jesus isu ti Cristo, ket ti siasinoman nga agayat iti maysa nga ama, ayatenna met ti anak dayta nga ama.

² No ayatentayo ti Dios ken tungpalentayo dagiti bilbilinna, daytoy ti pakaammoantayo nga ayatentayo dagiti annak ti Dios.

³ Ta no ayatentayo ti Dios, kayatna a sawen a tungpalentayo dagiti bilbilinna. Saan a narigat a tungpalen dagiti bilbilinna,

⁴ agsipud ta amin nga anak ti Dios maparmekna ti lubong. Ket babaen iti pammatitayo, agballigitayo a mangparmek iti lubong.

⁵ Siasino ti makaparmek iti lubong? Awan sabali no di ti mamati a ni Jesus ket Anak ti Dios.

Ti Pammaneknek maipapan ken Jesu-Cristo

⁶ Ni Jesu-Cristo ti immay babaen iti danum ken iti dara. Immay, saan laeng nga iti danum, no di ket iti danum ken iti dara. Paneknekan met laeng ti Espiritu a pudno daytoy, agsipud ta pudno ti Espiritu.

⁷ Tallo ti mangpaneknek:

⁸ ti Espiritu, ti danum ken ti dara. Ket agpapada ti ibagada.

⁹ Mamatitayo iti pammaneknek ti tao. Ngem natibtibker ti pammaneknek ti Dios, ket intedna daytoy a pammaneknek maipapan iti Anakna.

¹⁰ Ngarud, siasinoman a mamati iti Anak ti Dios adda kenkuana daytoy a pammaneknek. Ngem ti di mamati iti Dios, pinagbalinna nga ulbod ti Dios, ta dina pinati ti pammaneknekna maipapan iti Anakna.

¹¹ Daytoy ngarud ti pammaneknek: Inikkannatayo ti Dios iti biag nga agnanayon, ket masarakan daytoy a biag iti Anakna.

¹² Ti tao a pagtaengan ti Anak, agtaeng met kenkuana ti biag; ti saan a pagtaengan ti Anak ti Dios, saan met nga agtaeng kenkuana ti biag.

Ti Biag nga Agnanayon

¹³ Insuratko dagitoy kadakayo a mamati iti nagan ti Anak ti Dios, tapno maammoanyo nga addaankayo iti biag nga agnanayon.

¹⁴ Ditayo bumdeng nga umasideg iti Dios agsipud ta ammotayo nga itedna ti aniaman a dawatentayo no la ket mayannurot iti pagayatanna.

¹⁵ Ket no ammotayo a denggennatayo iti aniaman a dawatentayo, ammotayo met nga awatentayo ti aniaman a dawatentayo kenkuana.

^16-17 No makita ti siasinoman kadakayo ti kabsatna nga agbasol iti saan nga agtungpal iti patay, masapul nga ikararaganna iti Dios a mangted kenkuana iti biag. Agpaay daytoy kadagiti dadduma pay a nagbasol iti saan nga agtungpal iti patay. Basol ti amin a kita ti kinadakes. Ngem adda basol nga agtungpal iti patay, ket adda met basol a di agtungpal iti patay.

¹⁸ Ammotayo a di agbasol ti anak ti Dios, ket saan a dangran ti Managdakdakes, ta salakniban ti Anak ti Dios.

¹⁹ Ammotayo a kukuanatayo ti Dios, nupay iturturayan ti Managdakdakes ti entero a lubong.

²⁰ Ammotayo nga immayen ti Anak ti Dios, ket inikkannatayo iti pannakaawat tapno maammoantayo daydiay a pudno. Addatayo kenkuana a pudno, wen, addatayo ken ni Jesu-Cristo nga Anakna. Isu ti pudno a Dios ken ti biag nga agnanayon.

²¹ Annakko, annadanyo dagiti saan a pudno a dios.