1 Cronicas 10 - Ti Baro a Naimbag a Damag Biblia

Ti Pannakatay ni Ari Saul

¹ Ginubat dagiti Filisteo dagiti Israelita idiay Bantay Gilboa. Adu ti natay kadagiti Israelita ket nagtataray dagiti dadduma.

² Nakamatan dagiti Filisteo ni Saul ken dagiti annakna. Pinatayda da Jonatan, Abinadab ken Malkisua nga annakna.

³ Nadara ti ranget iti likmut ni Saul. Napuntaan kadagiti pana ti kabusor ket nakaro ti sugatna.

⁴ Kinunana iti agtutubo a para-awit kadagiti igamna, “Asutem ti kampilanmo ket patayennak tapno didak pagang-angawan dagitoy awan diosna a Filisteo.” Ngem kasta unay ti buteng ti agtutubo. Dina kayat a tungpalen ti bilin ni Saul. Iti kasta, inasut ni Saul ti kampilanna sana rinugmaan.

⁵ Idi makita ti agtutubo a natayen ni Saul, rinugmaanna met ti kampilanna ket natay.

⁶ Natay ni Saul ken dagiti tallo nga annakna ket nagpatingga ti panagarina.

⁷ Idi madamag dagiti Israelita nga agnanaed iti Tanap ti Jezreel a nagtataray dagiti soldado ken natay ni Saul ken dagiti annakna, nagtatarayda a pimmanaw kadagiti ilida. Kalpasanna, dimteng dagiti Filisteo ket sinakupda dagiti ili.

⁸ Iti sumuno nga aldaw kalpasan ti gubat, napan nagsamsam dagiti Filisteo kadagiti napapatay. Nasarakanda dagiti bangkay ni Saul ken dagiti tallo nga annakna a naiwalang idiay Bantay Gilboa.

⁹ Pinutolanda ni Saul, innalada ti kalasagna sada nangibaon kadagiti mapan iti entero a Filistia a mangipakaammo iti naimbag a damag kadagiti tattao ken kadagiti diosda.

¹⁰ Inkabilda dagiti igamna iti maysa kadagiti templo dagiti diosda, ket imbitinda ti ulona iti templo ni dios a Dagon.

¹¹ Idi madamag dagiti agnaed iti Jabes ti Galaad ti inaramid dagiti Filisteo iti bangkay ni Saul,

¹² nagrubbuat dagiti katuturedan a lallaki, ket napanda innala dagiti bangkay ni Saul ken dagiti annakna. Inyawidda dagitoy idiay Jabes ket intanemda ida iti sirok ti kayo a lugo. Pito nga aldawda a nagayunar.

¹³ Natay ni Saul agsipud ta saan a nagtalinaed a napudno ken ni Yahweh. Sinukirna ti bilin ni Yahweh. Tinarigagayanna ti paidalan babaen iti pannakiumanna kadagiti espiritu dagiti natay,

¹⁴ a saan ketdi ken ni Yahweh ti nakiumananna. Iti kasta, pinatay ni Yahweh ket intedna ti pagarian ken ni David nga anak ni Jesse.