1 Ar-ari 5 - Ti Baro a Naimbag a Damag Biblia

Isagana ni Solomon a Bangonen ti Templo

¹ Nabayagen a nadekket nga aggayyem da Hiram nga ari ti Tiro ken Ari David. Idi madamag ni Hiram a naisaad ni Solomon nga ari a sukat daydi amana, nangibaon kadagiti pannakabagina a mapan kenkuana.

² Idi nagsubli dagiti naibaon, daytoy ti pinaibilin ni Solomon ken ni Hiram:

³ “Ammom a di nasango daydi amak a David ti nangbangon iti templo a pagdaydayawan iti Apo a Diosna. Ngamin, kanayon ti pannakigubgubatna kadagiti kabusorna a nasion iti likmutna. Dina mabangon ti templo agingga a pagballigien ti Dios ket parmekenna dagiti amin a kabusorna.

⁴ Ngem ita, inikkannak ti Apo a Diosko iti kappia iti amin nga aglawlawko. Awanen ti kabusorko, ket awanen ti ammok a mangraut kaniak.

⁵ Inkari ti Apo ken ni amak a David, ‘Ti anakmo nga isaadko nga ari a sumaruno kenka ti mangbangon iti templok.’ Inkeddengkon a bangonen ti templo a pagdaydayawan iti Apo a Diosko.

⁶ Ibaonmo ngarud dagiti tattaom a mapan idiay Libano ta ipukanandak kadagiti sedro. Tangdanak ida ti gatad nga ituyangmo. Tumulongto kadakuada dagiti tattaok, ta saanda a kas kadagiti tattaom a naruam nga agpukan iti kayo.”

⁷ Kasta unay ti ragsak ni Hiram iti dawat ni Solomon. Kinunana, “Madaydayaw ti Apo ta inikkanna ni David iti masirib nga anak a mangituray iti dayta naindaklan a nasion!”

⁸ Impatulodna ti sungbatna ken ni Solomon. Kinunana, “Naawatko ti mensahem. Sisasaganaak nga agpapukan kadagiti sedro ken saleng a kasapulam.

⁹ Isalogto dagiti tattaok dagitoy a kayo manipud Libano ket ipanda iti baybay. Pagkakamangendanto a kas balsa sada ipan iti lugar a kayatmo a pakaisangladanda. Sadiay, warwarento dagiti tattaok ida ket makaammonton dagiti tattaom. Iti biangmo, dawatek a mangtedka iti taraon a kasapulan dagiti tattaok iti palasio.”

¹⁰ Inted ni Hiram dagiti amin a masapul ni Solomon a sedro ken saleng.

¹¹ Inikkan met ni Solomon iti 100,000 a salup a trigo ken 110,000 a galon a puro a lana ti olibo iti tunggal tawen a taraon dagiti tattaona.

¹² Tinungpal ni Yahweh ti karina ket inikkanna ni Solomon iti sirib. Adda kappia iti baet da Hiram ken Solomon ket nagtulagda a taginayonenda ti nasayaat a panaglangenda.

¹³ Imbilin ni Ari Solomon ti pannakaayab ti 30,000 a tattao iti entero nga Israel tapno agtrabahoda nga inkapilitan.

¹⁴ Dinutokanna ni Adoniram a kapatasda. Biningayna ida iti tallo a bunggoy; sagsasangapulo ribu iti tunggal bunggoy. Makabulan ti panagtrabaho ti maysa a grupo idiay Libano ket kalpasanna agbakasionda iti dua a bulan kadagiti balbalayda.

¹⁵ Nangikabil pay ni Solomon iti 80,000 a para-tikap iti bato iti kabambantayan ket 70,000 ti para-bunag.

¹⁶ Nangisaad iti 3,300 a kapatas a mangimaton iti trabahoda.

¹⁷ Binilinna nga agtikapda iti dadakkel ken napipintas a bato nga ikabilda a fondasion ti Templo.

¹⁸ Insagana dagiti tattao da Solomon ken Hiram, agraman dagiti taga-siudad ti Byblos dagiti bato ken tarikayo a pangbangon iti Templo.