1 Ar-ari 4 - Ti Baro a Naimbag a Damag Biblia

Dagiti Ofisiales ni Solomon

¹ Ket nagari ni Solomon iti entero nga Israel.

² Dagitoy dagiti nangato nga ofisialesna: Ti Padi: ni Azaria nga anak ni Zadok

³ Dagiti sekretario ti palasio: da Elioref ken Ahija nga annak ni Sisa Ti agay-aywan kadagiti nakailanadan dagiti mapaspasamak: ni Josafat nga anak ni Ahilud

⁴ Ti komander ti armada: ni Benaias nga anak ni Jehoyada Papadi: Zadok ken Abiatar

⁵ Pangulo dagiti agtuturay iti probinsia: ni Azaria nga anak ni Natan Mammagbaga iti ari: ni Zabud a padi nga anak ni Natan

⁶ Mayordomo iti palasio: ni Ahisar Kapatas dagiti agtrabaho iti inkapilitan: ni Adoniram nga anak ni Abda

⁷ Nangdutok ni Solomon iti 12 a tattao a gobernador dagiti probinsia iti entero nga Israel. Isuda ti agurnong iti taraon nga aggapu iti probinsiada para iti ari ken iti amin nga adda iti palasiona. Tinawen a mangted ti tunggal maysa kadakuada iti taraon nga agpaay iti makabulan.

⁸ Dagitoy dagiti agturay ken dagiti probinsia a sakupda: Ben-hur: ti katurturodan ti Efraim

⁹ Bendeker: dagiti siudad ti Makaz, Saalbim, Betsemes, Elon, ken Bet-hanan

¹⁰ Ben-hesed: dagiti siudad ti Arubot ken Soco ken ti entero nga Hefer

¹¹ Ben-Abinadab a nangasawa ken ni Tafat nga anak ni Solomon: ti entero a Dor

¹² Baana nga anak ni Ahilud: dagiti siudad ti Taanac, Megiddo ken ti entero a daga iti asideg ti Bet-san, iti asideg ti Zaretan iti abagatan ti ili ti Jezreel agingga iti siudad ti Abel-Mehola ken ti siudad ti Jocmeam

¹³ Ben-geber: ti siudad ti Ramot idiay Galaad ken dagiti siudad dagiti tolda iti Galaad a kukua ti familia ni Jair nga anak ni Manases ken ti Argob idiay Basan—60 a dadakkel a siudad a nasarikedkedan ken nabalunetan dagiti ruanganda iti bronse

¹⁴ Ahinadab nga anak ni Iddo: ti siudad ti Mahanaim

¹⁵ Ahimaas a nangasawa ken ni Basemat a maysa kadagiti babbai nga annak ni Solomon: ti daga ti Neftali

¹⁶ Baana nga anak ni Husai: ti daga ti Aser ken ti ili ti Bealot

¹⁷ Josafat nga anak ni Parua: ti daga ti Isacar

¹⁸ Simei nga anak ni Ela: ti daga ti Benjamin

¹⁹ Geber nga anak ni Uri: ti daga ti Galaad nga inturayan idi ni Sihon nga ari dagiti Amorreo ken ni Og nga ari ti Basan Malaksid dagitoy sangapulo ket dua, adda gobernador a mangituray iti Juda.

Ti Panagturay ni Solomon

²⁰ Adu dagiti tattao ti Juda ken Israel, kas iti kaadu ti darat ti baybay. Nabuslon ti abastoda ken naragsakda.

²¹ Sakupen ti pagarian ni Solomon ti amin a pagilian manipud Karayan Eufrates iti daya agingga idiay Filistia iti laud ken agingga iti beddeng ti Egipto iti abagatan. Nagbuisda kenkuana ket inturayanna ida iti unos ti panagbiagna.

²² Daytoy ti inaldaw nga abasto ni Solomon: 150 a salup a nafino nga arina ken 300 a salup a makan;

²³ sangapulo a baka a napalukmeg iti kuadra; 20 a baka a napalukmeg iti pagpaaraban; 100 a karnero malaksid dagiti ugsa, gasela, korso ken ganso.

²⁴ Iturayan ni Solomon ti amin a daga iti laud ti Eufrates manipud idiay Tifsa agingga iti siudad ti Gaza iti laud. Iturayanna dagiti amin nga ari iti laud ti Eufrates. Nakikappia kadagiti amin a kabangibang a pagilian.

²⁵ Iti panagturay ni Solomon, natalged dagiti umili ti entero a Juda ken Israel. Adda kaubasan ken mula nga igos ti tunggal familia.

²⁶ Addaan ni Solomon iti 40,000 a kuadra para kadagiti pagpaguyod iti lugan a pakigubat ken 12,000 a nagkabalio a mannakigubat.

²⁷ Adda batang dagiti 12 a gobernador a mangyeg iti taraon nga agpaay iti makabulan. Binulan nga yegda dagitoy nga abasto a taraon ni Solomon ken dagiti mangmangan iti palasio; itedda a kanayon ti amin a masapsapul.

²⁸ Ited met ti tunggal gobernador ti pannakabagina a sebada ken garami a kanen dagiti kabalio a para-guyod kadagiti lugan a pakigubat ken dagiti animal a pagtrabaho. Ipanda dagitoy iti sadinoman a lugar a pakasapulanda.

²⁹ Pinaraburan ti Dios ni Solomon iti naisangsangayan a kinasirib ken sirmata. Awan ti pumada iti kinasiribna.

³⁰ Nasirsirib ni Solomon ngem ti amin a mamasirib a taga-daya wenno ti amin a mamasirib iti Egipto.

³¹ Isu ti kasiriban a tao. Nasirsirib ngem ni Etan nga Ezrahita, da Emam, Calcol ken Darda nga annak ni Mahol. Nagdinamag iti amin a kabangibang a nasion.

³² Talloribu a proberbio ken nasurok a 1,000 a kanta ti pinutarna.

³³ Nagsao maipanggep iti kayo ken mula, manipud iti sedro ti Libano agingga iti hisopo nga agtubo kadagiti pader. Nagsao maipanggep kadagiti animal, tumatayab, parsua nga agkarkarayam ken ikan.

³⁴ Nagdinamag iti entero a lubong ti kinasiribna ket nagibaon dagiti ari kadagiti tattao a dumngeg kenkuana.