1 Ar-ari 13 - Ti Baro a Naimbag a Damag Biblia

¹ Bayat ti panagtakder ni Jeroboam iti sangoanan ti altar idiay Betel tapno mangidatag iti daton a mapuoran, simmangpet ti maysa a profeta a naggapu idiay Juda. Bilin ni Yahweh

² nga ilunodna ti altar: “O altar, altar, daytoy ti sao ti Apo: ‘Addanto ubing nga agnagan iti Josias a mayanak iti familia ni David. Papatayennanto ditoy dagiti papadi nga agserserbi kadagiti altar kadagiti nangato a lugar, isuda nga agidatdatag kenka kadagiti daton a mapuoran. Agpuorto kadagiti tultulang ti tao iti rabawmo.’”

³ Intuloy ti profeta, “Marakrakto daytoy nga altar ket maiwaristo dagiti dapuna. Daytoyto ti pakaammoanyo a nagsao ti Apo kaniak.”

⁴ Idi mangngeg ni Ari Jeroboam daytoy, intudona ti profeta sana imbilin, “Tiliwenyo dayta a tao!” Ngem dagus a timmangken ti inyunnatna nga imana ket dinan makukot.

⁵ Pagammoan, narba ti altar ket naiwariswaris dagiti dapu kas impadto ti profeta iti nagan ni Yahweh.

⁶ Kinuna ti ari kenkuana, “Pangngaasim, ta ikararagannak iti Apo a Diosmo ket dawatem kenkuana a paimbagenna ti imak.” Nagkararag ti profeta ket naisubli ti sigud a kasasaad ti ima ti ari.

⁷ Kinuna ti ari, “Awisenka nga umay mangan idiay balay. Gunggonaanka iti inaramidmo.”

⁸ Ngem insungbat ti profeta, “Uray pay itedmo ti kagudua ti kinabaknangmo, saanak a kumuyog kenka. Saanak met a mangan wenno uminum ditoy.

⁹ Binilinnak ti Apo a diak mangan wenno uminum iti uray ania ket iti panagawidko, diak magna iti dalan a nagnaak nga immay.”

¹⁰ Saan ngarud a nagna ti profeta iti dalan a nagnaanna. Sabali a dalan ti sinurotna.

Ti Lakay a Profeta a Taga-Betel

¹¹ Kadagidi a tiempo, adda lakay a profeta nga agnaed idiay Betel. Simmangpet dagiti annakna a lallaki, ket impadamagda kenkuana ti inaramid ti profeta a taga-Juda iti dayta nga aldaw ken ti imbagana iti ari.

¹² “Sadino ti nagnaanna itay pumanaw?” sinaludsodna kadakuada. Impakitada kenkuana ti dalan

¹³ ket imbagana a silyaanda ti asnona. Nagtungpalda ket simmakay ti lakay

¹⁴ tapno kamakamenna ti profeta a taga-Juda. Nasarakanna ti profeta nga agtugtugaw iti sirok ti maysa a kayo a lugo. “Sika kadi ti profeta a taga-Juda?” sinaludsodna. “Wen, siak,” insungbat ti lalaki.

¹⁵ “Umayka idiay balay ta manganka,” kinunana.

¹⁶ Ngem insungbat ti profeta, “Diak mabalin ti agsubli ket umayak idiay balayyo wenno patgan ti awismo. Ken saan a mabalin a makipangan wenno makiinumak kenka ditoy

¹⁷ ta binilinnak ti Apo a diak mangan wenno uminum iti uray ania ken saanak a magna iti nagnaak nga immay.”

¹⁸ Kinuna ti lakay a profeta a taga-Betel, “Profetaak met a kas kenka. Binilin ti Apo ti maysa nga anghel a nangibaga kaniak a yawidka tapno sangailienka.” Ngem agul-ulbod ti lakay a profeta.

¹⁹ Simmurot ngarud ti profeta a taga-Juda iti lakay a profeta ket nakipangan kenkuana.

²⁰ Idi mangmanganda, dimteng ti sao ti Apo iti lakay a profeta

²¹ ket imbagana iti profeta a taga-Juda, “Kuna ti Apo a dika nagtungpal kenkuana ket dimo inaramid ti imbilinna.

²² Nagsublika ketdi a nangan iti lugar nga imbagana a dimo panganan. Gapu iti daytoy, mapapataykanto ket dinto maikali ti bangkaymo iti tanem ti familiam.”

²³ Kalpasan ti pannanganda, sinilyaan ti lakay ti asno a pagsakayan ti profeta a taga-Juda.

²⁴ Iti dalanna nga agawid, dinarup ti maysa a leon a nangpatay kenkuana. Naiwalang ti bangkayna iti dalan ket nagtakder ti asno ken ti leon iti abayna.

²⁵ Adda sumagmamano a lallaki a limmabas. Nakitada ti bangkay iti dalan ken ti leon iti asideg. Idi dumtengda idiay Betel a pagnaedan ti lakay a profeta, impadamagda ti nakitada.

²⁶ Idi madamag ti lakay a profeta ti napasamak, kinunana, “Isu dayta ti profeta a nangsalungasing iti bilin ti Apo! Iti kasta, imbaon ti Apo ti leon a mangdarup kenkuana ket patayenna a kas imbagana.”

²⁷ Binilinna dagiti annakna a silyaanda ti asnona. Nagtungpalda

²⁸ ket nagsakay ti profeta a pimmanaw. Nasarakanna ti bangkay iti dalan; agtatakder pay laeng ti asno ken ti leon iti abayna. Saan a kinnan ti leon ti bangkay ket dina inan-ano ti asno.

²⁹ Binagkat ti lakay a profeta ti bangkay sana insakay iti asno ket insublina idiay Betel tapno dung-awan ken itabonna.

³⁰ Inkalina ti bangkay iti tanem ti familia ket dinung-awanda kadagiti annakna a kunkunana, “Ay, kabsatko, kabsatko!”

³¹ Kalpasan ti pumpon, kinuna ti profeta kadagiti annakna, “Inton matayak, itabondak iti daytoy a tanem ket yabayyo ti bangkayko iti bangkayna.

³² Awan duadua a matungpal ti imbagana a bilin ti Apo a maibusor iti altar ti Betel ken iti amin a pagdaydayawan kadagiti ili ti Samaria.”

Ti Kadaksan a Basol ni Jeroboam

³³ Saan latta nga insardeng ni Jeroboam nga ari ti Israel dagiti dakes nga aramidna. Intultuloyna ti nangdutok kadagiti papadi a nagtaud kadagiti gagangay a familia nga agserbi kadagiti altar a binangonna. Ikonsagrarna a kas padi ti siasinoman nga agtarigagay nga agpadi.

³⁴ Daytoy ti nakaigapuan ti pannakadadaelna ken naan-anay ti namimpinsan a pannakapukaw ti kaputotanna.