Markus 9 - Riang

¹ Yesuhz daz keuh nahz, “Ohz daz mawn pehz nahz, ihz an naeh a niz teur ka keui thonz taw keuh maat awlz prih Phraz Pen Caoh an tae kaai taanz khoz ne, keuh maat bawnz yam.”

Yesuhz plut raang

² Moh thaengz tualz seu ngihz, Yesuhz raak leh Petros, Yakop boh Yohn pan rae raw kaai rang an trawng, ti seun tapz ne. Raang Yesuhz ne plut aacz ngaai keuh,

³ kreung Hnhz kaw aasz keun ra thanz paw ihz seuk tuhz kreung tuhz prih keu tehz ne nam caang seuk tuhz aez keun ra deuiz ceun diz.

⁴ Meuz diz, keuh keu waiz awlz Moses kaar Eliyas paw truz aacz ngaai keuh rae upz taw Yesuhz.

⁵ Meuz phangz an diz, Petros daz Yesuhz nahz, “Tahz ehz, a niz ne naeh ti rak seum moh. Ehz ngaz cih siungz keu waiz, ta Mih hawkz, ta Moses hawkz, ta Eliyas hawkz.”

⁶ Keuh keu waiz kaw doz baaiz. Petros kaw nam mas ngaz daz ceun nae rae daz nahz ceun diz.

⁷ Meuz ceun diz, peu eumz ne teuk eupz keuh, reus lae truz thaz peu eumz ne daz, “Hnhz an ni naeh Kuanz an Ohz yaw, teur aacz daehz teuk ngarz mony reu ma Hnhz.”

⁸ Meuz diz luat, keuh waaiz yawt wit wit thaz naez kaw neuz lak Yesuhz pan, nam awlz yaeh leui.

⁹ Meuz keuh cur truz thaz rang ne, Yesuhz seumz mok keuh nahz, “Yak lao ihz lawng an pehz awlz, thonz taw Kuanz Ihz maat meu rae imz thaz reung dengz yam.”

¹⁰ Keuh teuk ngarz boh mony Hnhz, samz teur daz daehz nahz, “Meu rae imz thaz reung dengz yam ne loz daz naehz ez?”

¹¹ Keuh kaw maanyz thaengz Yesuhz daz, “Kawp naehz, ihz mawz kyaamz keui daz Eliyas ne truz aacz a?”

¹² Yesuhz kaw daz, “Eliyas truz aacz rae a wa meu rae mok keunyz. Tuhz kyaamz lik taemz mok kawp naehz, Kuanz Ihz samz ngaz talz reung dengz peur teuk boh talz ihz thiangz thengz a?”

¹³ Keuiz daz Ohz daz pehz nahz, “Tuhz kyaamz lik taemz mok daz, Eliyas ne a wa phraeoz, ihz cih Hnhz teur keuh sunz.”

Yesuhz wah thengz phiz an kut tuhz kuanz ihz

¹⁴ Meuz keuh phraeoz truz mial ti teu paez an kiutz ne awlz wungz ihz wit wit keuh, teur thiangz tang ihz mawz kyaamz keui.

¹⁵ Meuz wungz ihz keui awlz Yesuhz ne sangz baaiz saanyz seuz upz tak luat Hnhz.

¹⁶ Yesuhz kaw maanyz teu paez Daehz, “Pehz teur thiangz tang keuh lawng naehz?”

¹⁷ Ihz hawkz an naeh tuhz wungz ihz ne daz, “Tahz Sra, ohz leh truz kuanz ohz an phiz kut cih aez hnhz nam caang upz ne, truz cu Mih.

¹⁸ Meuz phiz kut tuhz hnhz ne taz tuhz keu tehz, thaz mony hnhz kaw lae busz, teur kak raangz. Toz hnhz kaw kuangz. Ohz lao teu paez Mih keui aez keuh wah thengz phiz kaw keuh nam pae bawnz.”

¹⁹ Yesuhz kaw daz keuh nahz, “Euz, ihz an nam yum keui, Ohz ngaz bawnz moh kawmz pehz seu naeh? Ohz ngaz bawnz nyeun pehz seu naeh? Leh kuanz ihz truz cu Ohz raez.”

²⁰ Keuh kaw leh kuanz ihz lan cu Hnhz. Meuz phiz an diz awlz Yesuhz ne cih aez kuanz ihz raw, taz tuhz keu tehz, kling lan kling mial, omz nyaangz kaw busz lae thaz mony hnhz.

²¹ Yesuhz maanyz paz kuanz ihz daz, “Penz ceun ni ne anz a wa ceu nawhz?” Paz kuanz ihz kaw daz, “Thaz meuz hnhz kyehz,

²² Phiz ne sunz aez hnhz yam rae kai leh teuk klaez tuhz omz boh tuhz ngal. Beuk Mih penz bawnz kaw teur yawng ehz, kawr ehz.”

²³ Yesuhz kaw daz hnhz nahz, “Cih naehz lah, Mih caang daz beuk Mih penz bawnz a? Beuk mih yum kaw penz bawnz klawhz meoz eu.”

²⁴ Paz kuanz ihz kaw daz luat tang reus usz, “Tahz, Ohz yum boh, kawr tang an ohz nam yum keui.”

²⁵ Meuz ceun diz, Yesuhz awlz ihz keui wang truz rae Hnhz wah thengz phiz ahz ne daz, “Phiz ahz keu tiakz lutz aez, Ohz lao mih, lae lan thaz kuanz ihz raez, thaengz seu laehz yak kut leui.”

²⁶ Phiz an diz kaw raak keurz cih aez kuanz ihz ne raw teur kuangz kaw lae lan. Ihz tang heungz keui thanz paw daz kuanz ihz ne a wa yam.

²⁷ Keuiz daz, Yesuhz tawnz tihz kuanz ihz yawk peun rawi, kuanz ihz kaw rawi ceng.

²⁸ Meuz weng phraeoz lang kaang ne, teu paez keui maanyz Hnhz, “Kawp naehz ehz nam pae wah thengz phiz an diz a?”

²⁹ Yesuhz kaw daz, “Neuz lak suz tawngz, laai tang meoz keui nam pae.”

Yesuhz lao teuk aacz thaengz lawng Daehz ngaz yam

³⁰ Yesuhz boh teu paez Hnhz keui lae lan thaz a diz, datz lan eungz Kalile, nam sunz aez yaeh mas Daehz naeh a naez.

³¹ Kawp peu Hnhz sawnz aez teu paez Daehz keui daz, “Kuanz Ihz ne ngaz talz ihz aapz thengz kaai tihz ihz, ihz kaw ngaz piamz Hnhz. Keuiz daz, moh waiz seu ngihz meu rae imz boh.”

³² Sangz daz, keuh nam loz phawmz lawng an diz kaw keuh nam yaak maanyz meu rae Hnhz.

Yaeh mawh myaat lak ihz?

³³ Meuz keuh phraeoz weng lang kaang, weng Kapernaum ne Yesuhz maanyz keuh, “Meuz naeh tawiz reung dengz ne pehz teur daz daehz nahz lawng naehz?”

³⁴ Keuiz daz, keuh moh pras pras boh, kawp daz keuh teur daz daehz nahz, naeh yaeh mawh myaat lak ihz.

³⁵ Yesuhz kaw keu dez, raak leh teu paez seu kawlz aarz rae daz, “Ihz an sunz penz peur aacz ihz ne, lo naeh thaz puatz ihz, lo naeh kuanz leng ihz hacz aamz.”

³⁶ Raak leh tang kuanz ihz hawkz aez moh teun khinz keuh, pumz tang kuanz ihz, daz keuh nahz,

³⁷ “Ihz an saanyz rap kuanz ihz kawp mus Ohz ne, saanyz rap Ohz. Ihz an saanyz Ohz samz, saanyz rap taw Ohz nam anz, saanyz rap pa tang Tahz an cao Ohz truz.”

Ihz nam khatz ehz naeh ihz ehz

³⁸ Yohn daz Yesuhz nahz, “Tahz Sra, ehz awlz ihz hawkz leh mus Mih wah thengz phiz, ehz kan hnhz kawp daz hnhz nam lan tawiz ehz.”

³⁹ Yesuhz kaw daz, “Yak kan hnhz, waaiz ihz an leh mus Ohz plaez an laak laaiz ne, nam paw ceu nawhz yaeh nam caang saehz Ohz leui.

⁴⁰ Ihz an nam cih khatz ehz ne naeh plaakz ehz.

⁴¹ Ohz daz mawn pehz nahz, ihz an leh mus Ohz aez pehz nahz omz seu klakz kawp peu daz pehz naeh ihz Ohz ne tiunz bawnz a suz.

A keoz an cih pleung

⁴² Ihz an cih pleung kuanz ihz an yum Ohz ne rak lak leh reu aangz mawh hawiz kokz hnhz, leh hnhz wiurz sapz tuhz omz paang laai.

⁴³ Beuk tihz mih cih aez mih pleung kaw tatz thengz.

⁴⁴ Pheuz lak maang tihz keu aarz bawnz kut tuhz ngal raai, racz nam yam, ngal nam ngat ne, maang tihz seu plaakz pan, bawnz kut tuhz prih khyaamz sa ne baaiz rak lak an diz.

⁴⁵ Beuk cawng mih cih aez mih pleung kaw tatz thengz.

⁴⁶ Pheuz lak maang cawng keu aarz bawnz kut tuhz ngal raai, racz nam yam, ngal nam ngat ne, maang cawng seu plaakz pan bawnz kut tuhz prih khyaamz sa ne baaiz rak lak an diz.

⁴⁷ Beuk ngaai mih cih aez mih pleung kaw klawkz thengz. Maang ngaai seu plaakz pan bawnz kut tuhz prih khyaamz sa ne rak lak maang ngaai keu aarz

⁴⁸ bawnz kut tuhz ngal raai, racz nam yam, ngal nam ngat ne.

⁴⁹ Ihz hacz aamz bawnz talz leh ngal cih aez seu ngamz. Naeh ceun khuz an toz pukz caw klawhz toz bawnz sapz suakz cih aez seu ngamz.

⁵⁰ Suakz rak baaiz. Keuiz daz beuk nam taap leui kaw, ngaz cih seu naez aez hnhz taap mial. Pehz teur deuiz kaw aez maang suakz. Moh aez daehz teur maen.”