Markus 7 - Riang

Thungz caam ihz thao meuz neungz

¹ Waaiz an diz, Pharise boh ihz mawz kyaamz teur ka an truz thaz weng Yerusalem keui, truz cu Yesuhz.

² Keuh awlz teu paez teur ka nam khez tihz suamz seum suamz.

³ Kawp peu daz, Pharise boh ihz Yio tang heungz keui cih tawiz thungz caam ihz thao meuz neungz, beuk nam khez tihz kaw nam suamz seum suamz.

⁴ Meuz weng truz thaz teur laas ne beuk nam khez kaw nam suamz. Neuz lak an diz klakz, klohz, sroz tawng boh kuz keui kaw khez, cih tawiz thaengz thungz caam tang meoz keui.

⁵ Kawp ceun diz, Pharise boh ihz mawz kyaamz daz Yesuhz nahz, “Teu paez Mih keui nam khez tihz kaw suamz. Cih naehz teu paez Mih keui nam cih tawiz thungz caam ihz thao meuz neungz a?”

⁶ Yesuhz kaw daz keuh nahz, “An ihz taangz phraz Isaiah rawz lawng pehz setz an seuk cih daehz naeh ihz rak ne a wa tawz baaiz. Hnhz taemz mok daz, Phraz Pen Caoh daz keuh nahz, ‘Ihz keu ni leh mony ro se Ohz, keuiz daz kingz keu nuasz keuh yaan Ohz baaiz.

⁷ Sawnz aez thungz caam ihz cih mok naeh ceun sinz Phraz. Keuh seuk cih daehz koz kwaai Ohz.’

⁸ Pehz plawiz thengz sinz Phraz Pen Caoh, samz cih tawiz thungz caam ihz thao meuz neungz.”

⁹ “Pehz sunz cih tawiz thungz caam ihz thao meuz neungz baaiz, thanz paw mawz plawiz thengz sinz Phraz Pen Caoh.

¹⁰ Moses lao mok daz, ‘Ro se mah paz, ihz an nam nap suamz mah paz ne, aez hnhz yam.’

¹¹ Keuiz daz, pehz sawnz aez ihz nahz, ‘Maang phrihz phrahz an lo aez mah paz ne, aez keuh daz naeh Korban’ an loz daz naeh Phrihz phrahz Phraz Pen Caoh kaw

¹² ihz an diz nam lo cih aez mah paz daehz nahz naehz leui.

¹³ Aez daehz thanz paw bawnz cih tawiz thungz caam ihz thao meuz neungz an siupz cur truz ne, pehz thengz tang mony reu ma Phraz Pen Caoh. Pehz cih tawiz ceun diz heungz baaiz.”

Phrihz phrahz an cih aez ihz woi

¹⁴ Waaiz an diz, Yesuhz raak mial wungz ihz keui, daz keuh nahz, “Pehz teuk ngarz Ohz raez, aez pehz loz phawmz.

¹⁵ Seum suamz an naeh thaz nawk kut tuhz ihz ne, nam cih aez ihz woi. An lae truz thaz nao ihz pan cih aez ihz woi a.

¹⁶ Ihz maang keu tiakz keui, aez hnhz ngarz.”

¹⁷ Meuz Yesuhz praasz wungz ihz kut tuhz kaang ne, teu paez keui maanyz ti loz mony pung taek an diz.

¹⁸ Hnhz kaw daz keuh nahz, “Teur diz kaw pehz nam loz haz? Seum suamz klawhz meoz an truz thaz nawk kut tuhz ihz ne nam cih aez ihz woi.

¹⁹ Seum suamz an naeh thaz nawk keui nam kut tuhz kingz keu nuasz. Kut tuhz klungz, phraeoz tuhz reu ingz rae nam cih aez ihz woi keuiz.” Seum suamz keui seu ngamz hacz aamz aacz ngaai Phraz Pen Caoh.

²⁰ “An lae truz thaz nao ihz pan, cih aez ihz woi a.

²¹ Kawp peu daz an lae truz thaz nao ihz ne, naeh an wonz meukz, kawi kamesuhz, rah khangz ihz, piamz ihz,

²² dawhz kuanz yah ihz, lawz phahz mawh, phawmz wot, kaoz suamz ihz, phawmz meukz, seu ke ihz, phyaakz sre ihz, seuk sam, nam saangz suamz ihz,

²³ an keu ni ne lae thaz nao ihz rae cih teuk woi ihz.”

Reung dengz yum keun nyah ihz prih Siria

²⁴ Waaiz an diz, Yesuhz moh a diz lan thaz keun bongz tawz eungz a nae weng Taia. Hnhz nam sunz aez ihz mas Daehz naeh a diz kaw nam caang.

²⁵ Meuz diz luat, maang keun nyah hawkz, kuanz keun nyah kyehz hnhz an phiz kut ne ngarz reu oiz Yesuhz truz seuk deumz aacz ngaai Hnhz.

²⁶ Maanyz tang Hnhz nahz, aez wah thengz phiz tuhz kuanz keun nyah kyehz daehz. Keun nyah an diz naeh ihz an nam anz kheuz Yio, moh a eungz Phoenisia tuhz prih Siria.

²⁷ Yesuhz kaw daz hnhz nahz, “Ohz lo damz aacz kuanz Daehz saakz saakz. Nam rak seum leh kaaiz mun kuanz ihz seum plawngz aez sohz nahz.”

²⁸ Keun nyah an diz kaw daz, “Anz mawn laai, Tahz ehz. Keuiz daz sohz keui kaw caang seutz suamz boh kaaiz mun an nyawi, an kuanz ihz teuk beurz keui.”

²⁹ Yesuhz kaw daz hnhz nahz, “Kawp mony reu ma an ni, mih weng raez. Phiz ne a wa lae lan thaz kuanz keun nyah kyehz mih.”

³⁰ Keun nyah an diz kaw weng lan, awlz kuanz keun nyah kyehz daehz ne yaetz reuk ngeut boh a diz, phiz kaw a wa lae thaz kuanz keun nyah kyehz ne.

Yesuhz cih aez ihz ahz keu tiakz lutz hawkz ne rak

³¹ Waaiz an diz, Yesuhz lae truz thaz weng Taia, datz truz tang weng Sidon, peun truz thaengz tang prih Dekapolis phraeoz nawngz Kalile.

³² Meuz diz, ihz keui leh ihz ahz keu tiakz lutz hawkz truz cu Hnhz, keuh maanyz aez Yesuhz leh tihz Daehz taangz lang kol hnhz.

³³ Yesuhz kaw leh hnhz lae thaz ihz keu diz, lan ti seun tapz. Leh reum haz tihz Daehz cukz sapz tuhz keu tiakz hnhz, teuk chuz tang omz nyaangz teu taakz hnhz.

³⁴ Beuk a wa kaw ngaw yawt lang plengz, seuk weu tang phawmz Daehz daz, “Ephphatha,” an loz daz, “Aez loz.”

³⁵ Meuz diz luat, keu tiakz hnhz a wa ngarz, taakz hnhz kaw a wa keu ceum, upz kaw a wa cakz.

³⁶ Waaiz an diz, Yesuhz seumz keuh yak aez lao ihz nahz lawng an ni. Hnhz yeung seumz, reu oiz baaiz yeung lae.

³⁷ Ihz keui kaw teur aacz daehz sangz baaiz thanz paw nam maang ti lao rae daz, “Hnhz a wa cih sang trohz klawhz meoz, aez ihz keu tiakz lutz keui ngarz, aez ihz ahz keui reu ma bawnz.”