Markus 6 - Riang

Ihz weng Nasaret nam saanyz rap Yesuhz

¹ Yesuhz boh teu paez keui lae thaz a diz, phraeoz weng Nasaret an naeh weng Daehz.

² Kaai seu ngihz sinz ne, Yesuhz sawnz aez traz tuhz crawp. Ihz an bawnz ngarz keui teur aacz daehz sangz baaiz rae daz, “Ihz an ni bawnz truz traz keu ni thaz naez ez? Hnhz bawnz pi nya thaz naez, taanz khoz an plaez bawnz an laak laaiz ne truz thaz naez?”

³ Keuh thaang laerz Hnhz daz, “Nam anz tahz lak seu maz haz? Nam anz kuanz Mari haz? Nam anz mai Yakop, Yosep, Yudas boh Simon keui haz? Seum bohz keun nyah Hnhz keui kaw moh rim ehz ne nam anz haz?”

⁴ Yesuhz kaw daz, “Ihz taangz phraz ne tuhz pruh tuhz weng daehz boh tawiz ceu kheuz kuanz mai daehz ne nam maang sre naehz, maang sre aarz diz pan.”

⁵ A diz Hnhz leh tihz Daehz taangz lang kol ihz aez moh rak pan, nam plaez thaengz an laak laaiz naehz leui.

⁶ Hnhz sangz baaiz keuh nam yum. Yesuhz khahz lan sawnz aez traz ihz keui nahz tawiz pruh rim Daehz naeh ne.

Yesuhz cao peun lan teu paez daehz seu kawlz aarz

⁷ Hnhz raak teu paez seu kawlz aarz truz cu Daehz, aez keuh nahz a na an pae phiz rae cao keuh lan keu aarz teur tawiz,

⁸ seumz tang keuh nahz, neuz lak kawn teur leui, yak khaenz lan naehz tawiz reung dengz. Yak khaenz seu kiz, yak khaenz seum suamz boh yak khaenz paekz sapz tuhz seum mat.

⁹ Kap cawng khlapz pan, yak kap seu kaeng teur sawnz.

¹⁰ “Neuz lak diz, pehz kut kaang yaeh kaw yak kraai ti thonz taw pehz lae lan thaz weng an diz.

¹¹ Ti pehz lan ne beuk ihz nam saanyz rap pehz, nam teuk ngarz pehz kaw, pisz thengz yangz cawng pehz lae lan, aez penz a tik a keuh Phraz Pen Caoh ngaz aez keuh nahz taam. Ohz daz mawn pehz nahz, meuz seu ngihz tatz traz ne, weng an diz ngaz bawnz talz leuz lak weng Sodom boh weng Komorrah boh.”

¹² Keuh lae lan rawz aez ihz keui nahz traz caanz reung dengz kawi.

¹³ Teu paez Hnhz keui wah thengz phiz heungz baaiz, keuh leh nam man thukz ihz nam moh rak keui heungz baaiz, aez keuh moh rak.

Yohn, tahz teuk sruz omz ne yam

¹⁴ Khunz Herot Antipas ngarz reu oiz ihz hongz baaiz Yesuhz. Ihz teur ka daz, “Yohn tahz teuk sruz a wa meu rae imz kawp ceun diz rae hnhz caang cih an laak laaiz.”

¹⁵ Ihz teur ka thaang Hnhz naeh Eliyas. Teur ka kaw thaang Hnhz naeh ihz taangz phraz hawkz ceun ihz taangz phraz meuz neungz seu paz paz ne.

¹⁶ Meuz Khunz Herot ngarz reu oiz Hnhz ne daz, “Ihz an ni naeh Yohn, an ohz cao siukz tatz kokz hnhz a wa yam meu rae imz.”

¹⁷ Kawp daz Khunz Herot leh mial Herotias, an naeh yah seum bohz daehz Philip ne, kawp keun nyah an diz toz Khunz Herot luat caang cao siukz mat leh Yohn sapz thang.

¹⁸ Kawp Yohn daz, “Khunz, nam rak seum leh mial yah seum bohz daehz.”

¹⁹ Kawp ceun diz, Naang Herotias keu nakz tamz mok Yohn, sunz piamz hnhz kaw nam caang.

²⁰ Khunz Herot doz Yohn, ro se, kan khraez hnhz, kawp hnhz naeh ihz seu ngamz tang ihz keu sangz. Meuz Khunz Herot teuk ngarz Yohn daz ne, sangz daz phawmz sukz kaw mok phawmz seuz seuz teuk ngarz mony hnhz.

²¹ Waaiz an diz, phraeoz truz kraao sang trohz ta Herotias nahz. Khunz Herot raenz pawiz seu ngihz keut daehz, damz seum suamz teuk borz ne hnhz paangz muz maat, kingz siukz boh ihz mawh tuhz prih Kalile keui.

²² Meuz ceun diz ne, kuanz keun nyah Naang Herotias kut kaz tuhz paangz pawiz, trohz phawmz Khunz Herot boh bohz raen hnhz. Khunz kaw daz keun nyah ne nahz, “Mih dawhz naehz kaw maanyz raez. Ohz aez boh mih nahz.”

²³ Samz aez thaengz tang keu ti, “Mih maanyz teur mih dawhz, thonz taw phraeoz prih seu khinz kaw ohz aez bawnz boh.”

²⁴ Keun nyah kyehz kaw lae lan maanyz mah daehz, “Ohz ngaz bawnz maanyz leh naehz lah mah?” Mah hnhz kaw daz, “Maanyz leh kingz Yohn tahz teuk sruz omz ne.”

²⁵ Keun nyah kyehz an diz kaw rip kut lao khunz nahz, “Leh kingz Yohn tahz teuk sruz omz ne sapz tuhz pheunz an ni, truz aez ohz nahz seu ni luat.”

²⁶ Khunz kaw kreuk phawmz baaiz, keuiz daz kawp hnhz laanz lao aacz ngaai khaekz daehz, nam caang peur mial mony reu ma daehz leui.

²⁷ Kawp ceun diz hnhz cao siukz hawkz lan tatz luat kingz Yohn an naeh tuhz thang ne. Siukz an diz kaw lan tatz luat kingz Yohn,

²⁸ leh kingz Yohn sapz tuhz pheunz leh truz aez keun nyah kyehz ne nahz, hnhz kaw lan aez mah daehz nahz.

²⁹ Meuz teu paez Yohn keui ngarz lawng an ni ne, truz leh lan pluz toz yam hnhz.

Yesuhz damz ihz hanz rengz

³⁰ Teu maan keui mial truz cu teur cuhz daehz tawz Yesuhz, keuh lao plaez meu rae an daehz cih boh an daehz rawz keui.

³¹ Yesuhz kaw daz teu maan keui nahz, “Truz cu ti seun tapz ihz, preumz reu seu co.” Kawp daz ihz heungz baaiz lan lan mial mial, teu maan keui thanz paw nam tan suamz seum suamz.

³² Kawp ceun diz keuh tumz ceun luang lan ti seun tapz.

³³ Keuiz daz ihz samz awlz keuh lan, keuh mas naeh Yesuhz boh teu paez Hnhz keui. Ihz heungz baaiz lae truz klawhz weng klawhz pruh wang lan tawiz waar omz, phraeoz aacz ti an keuh ngaz lan ne.

³⁴ Meuz Yesuhz lae truz cu lang pukz ne awlz keuh, Hnhz maang phawmz teur yawng, kawp daz keuh naeh ceun soz nam maang ihz khaenz ihz damz ne, Hnhz rawz aez keuh nahz heungz meoz baaiz.

³⁵ Meuz teuk borz ne, teu paez Hnhz keui truz cu Hnhz daz, “A niz ne naeh ti seun tapz ihz, prih kaw a wa reu nyeum.

³⁶ Cao ihz keui khahz yal seum suamz tawiz pruh rim keu ni raez.”

³⁷ Yesuhz kaw daz, “Pehz aez keuh nahz seum suamz raez.” Teu paez keui kaw daz, “Yal kaaiz mun ta ron aarz peur ya denarius ngaz aez keuh nahz seum suamz haz?”

³⁸ Yesuhz kaw daz keuh nahz, “Pehz dawmz yawt luz, maang kaaiz mun seu naeh?” Keuh kaw lan yawt rae mial daz, “Maang kaaiz mun khanz boh kahz keu aarz.”

³⁹ Yesuhz kaw lao aez keuh keu dez penz wungz kaai taak ngiar.

⁴⁰ Keuh kaw keu dez kaai taak ngiar teur wungz teur peur ya, teur wungz hanz kawlz, cih penz wungz penz wungz.

⁴¹ Yesuhz kaw leh kaaiz mun khanz boh kahz keu aarz an diz, ngaw yawt lang plengz, taang kez cuz Phraz, pekz kaaiz mun aez teu paez keui teur phraez aez ihz nahz. Kahz keu aarz kaw Hnhz teur phraez aez keuh nahz.

⁴² Ihz keui kaw bawnz suamz saakz klawhz ihz.

⁴³ Seutz leh an leuz keui bawnz seu kawlz aarz piat neuk neuk.

⁴⁴ Keur meh suamz kaaiz mun ne naeh kraao hanz rengz.

Yesuhz nuar kaai omz

⁴⁵ Waaiz Yesuhz plawiz weng wungz ihz ne, cao teu paez Daehz keui tumz ceun luang lo aacz, cu weng Betsaida, an naeh thaz tui omz.

⁴⁶ Meuz Hnhz plawiz ihz keui a wa weng hacz ne, Hnhz raw lan Daehz ne kaai rang, ngaz suz tawngz.

⁴⁷ Meuz teuk bimz ne, teu paez Hnhz naeh kaai ceun luang tuhz teun khinz omz nawngz. Yesuhz taw daehz pan naeh lang pukz.

⁴⁸ Hnhz awlz teu paez Daehz keui wit ceun luang paw reu, kawp kurz thoz truz nam maen plaakz. Meuz aacz prih thaangz kraao waiz na ri ne, Hnhz nuar kaai omz, lan cu keuh, thanz paw ngaz peun lan keuh.

⁴⁹ Keuiz daz meuz keuh awlz Hnhz nuar kaai omz ne, thaang Hnhz naeh phet rae raak keurz.

⁵⁰ Keuh kaw doz baaiz kawp keuh awlz Yesuhz. Hnhz kaw daz luat keuh nahz, “Mok phawmz eumz eumz! Naeh Ohz eu! Yak doz.”

⁵¹ Meuz Hnhz raw kaai ceun luang keuh ne, kurz kaw deukz. Keuh kaw sangz mawn mawn.

⁵² Kawp daz kingz keu nuasz keuh tanz, keuh nam loz phawmz meuz Hnhz damz kaaiz mun ne.

Yesuhz seuk neum ihz weng Kennesaret

⁵³ Meuz keuh phraeoz weng Kennesaret ne peuk deukz mok ceun luang a diz.

⁵⁴ Meuz keuh lae truz thaz kaai ceun luang ne ihz keui tang ngaai Yesuhz.

⁵⁵ Hnhz naeh a naez kaw ihz teur lao ihz rim daehz. Ihz keui kaw leh ihz penz tang ti yaetz keuh, truz cu Hnhz.

⁵⁶ Meuz Yesuhz lan tawiz weng tawiz pruh, tawiz sraakz maar kaw, ihz keui mok ihz suhz ihz rit tawiz teur laas rae maanyz teu caam caai kreung Hnhz. Ihz an teu keui kaw bawnz moh rak klawhz ihz.