Lukas 9 - Riang

Tahz Yesuhz cao lan teu maan seu kawlz aarz

¹ Yesuhz raak teur cuhz teu maan seu kawlz aarz ne aez keuh nahz taanz khoz boh a na wah thengz phiz hacz aamz boh aez ihz penz keui bilz.

² Hnhz phuhz keuh lan rawz lawng prih Phraz Pen Caoh boh aez ihz penz keui bilz.

³ Hnhz seumz keuh, “Yak khaenz lan naehz tawiz reung dengz, yak leh kawn teur leui, yak khaenz seu kiz, yak khaenz seum suamz, yak khaenz paekz, yak khaenz kreung plut.

⁴ Meuz pehz kut tuhz kaang ihz, ihz saanyz pehz ne thangz thonz taw maat lae mial thaz weng an diz.

⁵ Tawiz ti ihz nam saanyz pehz ne meuz pehz lae lan thaz weng an diz pisz thengz yangz cawng pehz, aez keuh mas pehz khatz keuh.”

⁶ Teu paez keui kaw lae khahz lan tawiz pruh rae rawz reu oiz rak boh aez ihz penz keui bilz.

Khunz Herot phawmz sukz

⁷ Meuz khunz Herot prih Kalile ngarz lawng an Yesuhz cih klawhz meoz ne phawmz sukz baaiz, kawp daz ihz teur ka daz Yohn tahz teuk sruz ne a wa meu rae imz.

⁸ Teur ka kaw daz Eliyas a wa paw truz, teur ka samz daz ihz taangz phraz meuz neungz seu hawkz hawkz ne a wa meu rae imz.

⁹ Khunz Herot daz, “Ohz a wa tatz kingz Yohn, an ohz ngarz ne naeh yaeh ez?” Hnhz sawkz khahz aez daehz awlz Yesuhz.

Yesuhz damz ihz hanz rengz

¹⁰ Teu maan keui weng truz cu mial Yesuhz rae lao plaez Hnhz nahz lawng daehz cih hacz aamz. Yesuhz raak keuh lan tawiz daehz ti seun tapz ihz a weng an ihz raak daz weng Betsaida.

¹¹ Keuiz daz wungz ihz keui mas ti Hnhz lan rae lan tawiz Hnhz. Hnhz kaw saanyz rap keuh, lao plaez keuh nahz lawng prih Phraz Pen Caoh boh aez ihz penz keui bilz.

¹² Meuz seu ngihz ngaz keutz ne teu maan seu kawlz aarz keui truz cu Yesuhz daz, “Plawiz ihz keui weng khahz yal suamz seum suamz boh khahz yaetz cih khaekz tawiz pruh tawiz maar keui kawp daz a niz naeh ti seun tapz ihz.”

¹³ Keuiz daz Yesuhz lao keuh nahz, “Pehz aez keuh nahz seum suamz raez.” Keuh kaw daz, “Ehz maang kaaiz mun khanz boh kahz keu aarz pan, nam anz kaw, Mih sunz aez ehz lan yal seum suamz ta wungz ihz keu ni hiuz?”

¹⁴ A diz keur meh mawh naeh kraao hanz rengz. Yesuhz lao teu paez daehz keui nahz, “Aez ihz keui keu dez teur mukz hanz kawlz raez.”

¹⁵ Teu paez keui kaw cao ihz keu dez.

¹⁶ Yesuhz leh kaaiz mun khanz boh kahz keu aarz, ngaw yawt lang kaang raaoz, dawkz kez cuz Phraz ta kaaiz mun. Pekz kaaiz mun aez teu paez keui nahz, cao teur phraez aez ihz keui nahz.

¹⁷ Keuh suamz saakz klawhz ihz, teu paez keui seutz leh an leuz ne bawnz seu kawlz aarz piat neuk neuk.

Petros rap Yesuhz naeh Kuanz Phraz

¹⁸ Naeh seu laehz meuz Yesuhz suz tawngz boh taw Daehz ne teu paez keui kaw naeh kawmz Hnhz, Yesuhz maanyz keuh, “Ihz keui daz Ohz naeh yaeh?”

¹⁹ Keuh tawpz, “Teur ka daz naeh Yohn tahz teuk sruz, teur ka daz naeh Eliyas, teur ka kaw daz naeh ihz taangz phraz meuz neungz meu rae imz.”

²⁰ Yesuhz kaw maanyz keuh, “Pehz luz thaang Ohz naeh yaeh?” Petros kaw lao, “Mih naeh Khris Phraz Pen Caoh.”

²¹ Yesuhz lao kan keuh, yak aez lao ihz nahz lawng an ni.

Yesuhz lao teuk aacz lawng Daehz yam

²² Yesuhz lao keuh, “Kuanz Ihz ne bawnz talz suhz heungz, ihz mawh keui, beunz caangz keui, ihz mawz kyaamz keui ngaz thiangz thengz. Ihz ngaz piamz Hnhz, keuiz daz moh waiz seu ngihz meu rae imz thaz yam boh.”

²³ Hnhz kaw siupz lao thaengz ihz keui nahz, “Beuk yaeh sunz lan tawiz puatz Ohz kaw bawnz cunz thengz daehz eunz, baekz lakz klawngz klaengz daehz klawhz seu ngihz rae lan tawiz Ohz.

²⁴ Ihz sunz khyawt phawmz daehz ne ngaz sumz, ihz sumz kawp Ohz ne ngaz bawnz khyawt phawmz daehz.

²⁵ Beuk ihz bawnz peung tang prih keu tehz keuiz daz phawmz hnhz sumz kaw maang a keoz naehz?

²⁶ Beuk yaeh keu sehz kawp Ohz boh traz Ohz ne, Kuanz Ihz kaw ngaz keu sehz caz ihz an diz meuz Hnhz truz kaai bunz Daehz, tang bunz Paz Phraz, tang bunz teu maan kaang raaoz an seu ngamz.

²⁷ Ohz daz mawn pehz nahz, ihz teur ka an naeh a niz keui meuz keuh maat awlz prih Phraz Pen Caoh ne maat yam.”

Yesuhz plut raang

²⁸ Moh kraao tahz seu ngihz keu ni Yesuhz raak Petros, Yakop boh Yohn raw lang rang ngaz suz tawngz.

²⁹ Meuz Hnhz suz tawngz boh ne mael Hnhz kaw pleung, kreung Hnhz kaw keun ra aasz keum yaamz hacz aamz.

³⁰ Meuz diz luat maang ihz keu aarz an naeh Moses boh Eliyas upz taw Yesuhz.

³¹ Kaar thaangz tuhz bunz kaang raaoz rae upz taw Yesuhz, lawng Yesuhz ngaz bawnz yam tuhz weng Yerusalem tawiz reung dawhz Phraz Pen Caoh ngaz keunyz.

³² Petros boh kuanz bohz keui reum lim. Meuz keuh dangz ne keuh awlz bunz Yesuhz boh ihz keu aarz ceng kawmz Hnhz.

³³ Meuz Moses boh Eliyas ngaz praasz Yesuhz ne Petros mony luanz lao Hnhz, “Tahz, rak seum moh baaiz a niz! Ehz ngaz cih siungz keu waiz, hawkz ta Mih, hawkz ta Moses, thaengz hawkz samz ta Eliyas.”

³⁴ Meuz phangz Petros daz boh ne peu eumz truz reupz keuh, keuh naeh tuhz peu eumz ne keuh doz baaiz.

³⁵ Reus rawhz tuhz peu eumz daz, “Hnhz an ni naeh Kuanz Ohz, an Ohz ras. Teuk ngarz Hnhz raez.”

³⁶ Meuz reus ne deukz, kiutz taw Yesuhz pan. Meuz phangz an diz keuh nam yaak lao yaeh nahz lawng an keuh awlz.

Yesuhz wah thengz phiz an naeh tuhz kuanz ihz

³⁷ Ceun kap siz meuz Yesuhz boh teu paez keu waiz cur truz thaz rang ne ihz wungz mawh keui truz saanyz Hnhz.

³⁸ Ihz hawkz an naeh tuhz wungz ihz ne raak Hnhz, “Tahz sra, yawt kuanz ohz an naeh taw hawkz ne.

³⁹ Phiz leh hnhz, cih aez hnhz raak keurz. Cih aez hnhz raw, aez busz lae thaz mony. Kai truz tekz hnhz baaiz, samz lae kreuk baaiz.

⁴⁰ Ohz maanyz teu paez Mih wah thengz phiz, keuiz daz keuh nam pae.”

⁴¹ Yesuhz daz, “Euz Kheuz ihz an nam mawz yum boh ihz peuk ceuh keui! Ohz ngaz moh kawmz pehz rae ngaz bawnz nyeun pehz seu naeh?” Yesuhz kaw lao paz kuanz ihz nahz, “Leh kuanz mih truz a niz raez.”

⁴² Meuz kuanz ihz truz boh ne phiz teuk taz hnhz tuhz keu tehz, cih aez hnhz raw. Keuiz daz Yesuhz nal phiz rae cih aez kuanz ihz moh rak. Hnhz leh kuanz ihz aez mial paz keuh nahz.

Yesuhz lao teuk aacz thaengz lawng Daehz ngaz yam

⁴³ Ihz keui sangz baaiz taanz khoz mawh Phraz Pen Caoh. Ihz keui sangz baaiz an Yesuhz cih klawhz meoz, Hnhz lao teu paez Daehz keui nahz,

⁴⁴ “Tang tang an Ohz ngaz lao pehz nahz. Kuanz Ihz ne ngaz talz ihz aapz Daehz tuhz tihz raan su.”

⁴⁵ Keuiz daz keuh nam loz phawmz Yesuhz daz naehz. An diz yeung seun tapz boh keuh, kawp ceun diz nam loz phawmz, keuiz daz keuh nam yaak maanyz lawng mony reu ma an diz.

Naeh yaeh mawh lak ihz

⁴⁶ Teu paez Yesuhz keui teur thiangz daehz, tuhz keuh ne yaeh ngaz mawh myaat lak ihz.

⁴⁷ Keuiz daz Yesuhz mas an keuh wonz, kawp ceun diz Hnhz raak kuanz ihz hawkz aez ceng rim Daehz.

⁴⁸ Beuk a wa kaw daz keuh nahz, “Ihz saanyz rap kuanz ihz kawp mus Ohz ne saanyz rap Ohz, ihz saanyz rap Ohz kaw saanyz rap tang an phuhz Ohz truz. Ihz kyehz lak ihz tuhz pehz ne naeh an mawh lak ihz.”

Ihz nam khatz pehz ne naeh ihz pehz

⁴⁹ Yohn daz Yesuhz, “Tahz, ehz awlz ihz hawkz leh mus Mih wah thengz phiz, ehz kan hnhz kawp daz hnhz nam anz cumz ehz.”

⁵⁰ Keuiz daz Yesuhz lao hnhz, “Yak kan hnhz, ihz nam khatz pehz ne naeh ihz pehz.”

Ihz pruh Samaria nam saanyz Yesuhz

⁵¹ Meuz a wa thatz kraao leh phrawz Yesuhz raw kaang raaoz ne Hnhz klaengz tatz phawmz lan weng Yerusalem.

⁵² Hnhz phuhz ihz teur ka lan aacz pruh Samaria, aez keuh raenz peun tan mok ta Daehz klawhz meoz.

⁵³ Keuiz daz ihz keui nam saanyz rap Hnhz kawp daz Hnhz aanz lan weng Yerusalem.

⁵⁴ Meuz teu paez Hnhz Yakop boh Yohn awlz an diz ne kaar lao Yesuhz, “Tahz, anz Mih sunz aez ehz raak ngal kaang raaoz klaez teuk kat keuh ceun Eliyas cih?”

⁵⁵ Keuiz daz Yesuhz peur wiang rae nae kaar, kawp teu paez keui daz ceun diz.

⁵⁶ Keuh kaw lan cu pruh aarz tui boh.

Ihz sunz tawiz Yesuhz

⁵⁷ Meuz keuh naeh kaai reung dengz ne maang ihz hawkz maanyz Yesuhz, “Ohz ngaz lan tawiz Mih ti Mih lan.”

⁵⁸ Yesuhz mial daz, “Sohz keu tehz maang tuhz moh, simz ploiz lang plengz kaw maang haanz, Kuanz Ihz samz nam maang ti tam kingz.”

⁵⁹ Yesuhz lao thaengz ihz hawkz nahz, “Lan tawiz Ohz.” Ihz an diz daz, “Aez ohz bawnz lan saangz keo aacz paz daehz.”

⁶⁰ Yesuhz tawpz daz, “Aez ihz yam keui saangz keo ihz daehz yam raez! Mih samz khahz krai lawng prih Phraz Pen Caoh.”

⁶¹ Ihz thaengz hawkz samz lao Yesuhz, “Ohz ngaz lan tawiz Mih, keuiz daz aez ohz weng seumz aacz ihz kaang daehz naz.”

⁶² Yesuhz kaw daz hnhz nahz, “Ihz tawnz ngawn thaiz waaiz yawt thaz puatz ne nam theukz prih Phraz Pen Caoh.”