Lukas 8 - Riang

¹ Moh ceu nawhz taan taan Yesuhz lan tawiz weng tawiz pruh, rawz aez reu oiz rak lawng prih Phraz Pen Caoh. Teu paez seu kawlz aarz kaw naeh kawmz Hnhz,

² tang keun nyah teur ka an lawt thaz tihz phiz boh thaz an penz keui, keuh naeh Mari Makdalen an phiz teu pulz lae,

³ Yoanna an naeh yah Khusa, an naeh ihz mawh rumz khunz Herot, Susanna boh keun nyah aarz diz an heungz baaiz keui leh phrihz phrahz daehz kawr Yesuhz boh teu paez Hnhz keui.

Pung taek ihz pakz seu maalz

⁴ Meuz ihz heungz baaiz seu weng taw seu weng keui truz wungz tawz Yesuhz ne, Hnhz lao keuh nahz pung taek,

⁵ “Maang ihz hawkz lan pakz seu maalz. Cakz ceu teur ka klaez tawiz reung dengz, ihz paenz rae simz ploiz lang plengz keui seutz suamz thengz.

⁶ Cakz ceu teur ka samz klaez peur lah ruk reu aangz, meuz lae truz penz teungz ne wiatz hawngz lan kawp daz keu tehz nam nyaakz.

⁷ Cakz ceu teur ka samz klaez peur lah ruk seur keutz, mawh teun peu ne teungz seur keutz keui riat keuh.

⁸ Cakz ceu teur ka samz klaez kaai keu tehz rak, teungz ne mawh plaehz truz peur ya pun.” Meuz Hnhz daz ceun diz ne, Hnhz raak daz, “Ihz maang keu tiakz keui aez hnhz ngarz.”

Kawp naehz Yesuhz bawnz lao pung taek an ni?

⁹ Teu paez Yesuhz keui maanyz Hnhz ti loz mony pung taek.

¹⁰ Hnhz tawpz daz, “pehz bawnz mas an truh an trawng prih Phraz Pen Caoh. Keuiz daz ihz keu diz nahz samz Ohz bawnz lao mony pung taek, keuh yawt boh kaw nam awlz, teuk ngarz boh kaw nam loz.”

Ti loz mony pung taek

¹¹ “Ti loz mony pung taek samz, cakz ceu ne naeh mony reu ma Phraz.

¹² Cakz ceu an klaez tawiz reung dengz ne naeh ceun ihz ngarz mony reu ma Phraz, Manaat truz leh thengz traz an naeh tuhz kingz keu nuasz keuh, yak aez keuh yum, yak aez keuh bawnz khyawt.

¹³ Cakz ceu an klaez peur lah ruk reu aangz samz naeh ceun ihz ngarz mony reu ma Phraz, keuh seuz phawmz saanyz rap traz boh. Keuiz daz rias nam kut truh tuhz kingz keu nuasz keuh. Keuh yum taw seu co pan, meuz talz reung dengz kyaam ya ne keuh keun titz.

¹⁴ Cakz ceu an klaez peur lah ruk seur keutz ne naeh ceun ihz ngarz mony reu ma Phraz, meuz keuh cih tawiz taw lomz daehz, reung dengz kawcz phawmz, reung dengz maang, ciz cim lawz kahz keui reup riat mok keuh ne plaehz nam kuhz.

¹⁵ Cakz ceu an klaez kaai keu tehz rak samz naeh ceun ihz ngarz mony reu ma Phraz, leh phawmz an rak boh an keun ra ne saanyz rap rae nyeun thonz taw plaehz.

Leh sroz dupz ngal dupz

¹⁶ Yaeh nam leh sroz dupz ngal ngawiz peun kleoz, nam anz kaw nam mok tuhz keutz kuz. Aez thaangz sapz ihz ne mok kaai lakz ngal ngawiz leun.

¹⁷ Nam maang phrihz phrahz naehz an seun tapz bawnz, ngaz bawnz awlz hacz aamz. Phrihz phrahz an unz keui kaw ihz ngaz mas, ihz ngaz awlz.

¹⁸ Kawp ceun diz pehz bawnz teuk ngarz ceun nae ne seu tih daehz eunz lah. Kawp daz tawz ihz maang ne ngaz bawnz thaengz, tawz ihz nam maang ne leh thengz thaengz tang an hnhz thaang daehz maang.”

Mah Yesuhz boh seum bohz Yesuhz

¹⁹ Mah Yesuhz boh seum bohz Yesuhz keui truz cu Hnhz, keuiz daz kawp wungz ihz keui heungz baaiz rae nam caang lan thatz Hnhz.

²⁰ Ihz teur ka lao Yesuhz, “Mah Mih boh seum bohz Mih keui ceng boh thaz nawk tui, keuh sunz awlz mih da.”

²¹ Yesuhz daz keuh nahz, “Ihz teuk ngarz cih tawiz mony reu ma Phraz ne naeh mah Ohz boh seum bohz Ohz.”

Yesuhz teuk deukz cung coh

²² Naeh seu seu ngihz Yesuhz boh teu paez Hnhz keui kut tuhz ceun luang, Hnhz daz keuh nahz, “Ehz lan thaz tui omz hiuz.” Keuh kaw teur aacz daehz lan.

²³ Meuz keuh lan ne Yesuhz yaetz reuk ngeut tuhz ceun luang. Meuz ceun diz cung longz kurz longz pat tuhz nawngz, omz ngaz neuk tuhz ceun luang keuh. Keuh talz phez mawh longz.

²⁴ Teu paez keui lan peun rawi Yesuhz daz, “Tahz, Tahz, ehz ngaz yam.” Yesuhz kaw rawi lao kurz boh seuk mar omz an seuk rawi keui kaw deukz lan.

²⁵ Hnhz daz teu paez keui nahz, “Pehz daz daehz yum ne naeh a naez?” Keuh teur aacz daehz doz baaiz paw sangz, teur daz daehz nahz, “Hnhz naeh yaeh awh lah? Hnhz lao kurz boh seuk mar omz kaw teuk ngarz a!”

Yesuhz wah thengz phiz raai

²⁶ Yesuhz boh teu paez Hnhz keui tumz ceun luang phraeoz prih Kerasin, an naeh thaz tui omz nawngz Kalile.

²⁷ Meuz Yesuhz raw lan lang pukz ne awlz ihz phiz kut hawkz truz cu Hnhz. Hnhz nam kap kreung ceu nawhz baaiz, kaang daehz kaw nam moh. Hnhz moh tuhz ruk peun lu pan.

²⁸ Meuz hnhz awlz Yesuhz ne raak keurz, kupz aacz ngaai Yesuhz daz, “Yesuhz, Kuanz Phraz Pen Caoh an trawng dutz! Mih lo ohz cih naehz? Ohz maanyz mih, yak pae suamz ohz!”

²⁹ An hnhz daz ceun diz ne kawp daz Yesuhz wah thengz teuk aacz phiz raai tuhz ihz an diz. Phiz a wa kut tuhz hnhz heungz laehz baaiz, ihz leh nuarz hirz boh khoi cawng mat mok rae pao yawt boh hnhz kaw hnhz teuk teutz an mat mok daehz, phiz keui aacz kut hnhz tuhz ruk.

³⁰ Yesuhz maanyz hnhz, “Mus mih daz naehz?” Hnhz daz, “Mus ohz daz Phiz Wungz.” Kawp daz phiz keui kut heungz baaiz tuhz ihz an diz.

³¹ Phiz keui maanyz yak aez Yesuhz wah daehz lan tuhz ngal raai an truh lak ihz.

³² A diz maang wungz lek mawh suamz boh kaai rang ne, phiz keui maanyz Yesuhz aez daehz bawnz kut tuhz wungz lek, Hnhz kaw aez keuh kut.

³³ Phiz keui lae thaz ihz kaw kut tuhz lek boh. Wungz lek keui teuk basz cur tawiz paerz rang leucz yam tuhz omz.

³⁴ Meuz ihz khaenz lek keui awlz lawng an diz ne keuh wang lan lao reu oiz an diz tawiz weng tawiz pruh.

³⁵ Ihz keui kaw lae yawt an daehz ngarz. Meuz keuh phraeoz tawz Yesuhz ne keuh awlz ihz phiz tomz kut ne keu dez boh rim cawng Yesuhz, kap tang seu kaeng, phawmz hnhz kaw rak boh rae keuh doz baaiz.

³⁶ Ihz awlz tawiz keui lao plaez ihz nahz lawng an ihz phiz kut ne cih seu naez moh rak truz.

³⁷ Ihz prih Kerasin keui doz baaiz rae keuh lao Yesuhz aez lae lan thaz prih daehz. Yesuhz kaw kut tuhz ceun luang, waaiz weng mial.

³⁸ Ihz phiz lae an diz kaw maanyz lan tawiz Yesuhz,

³⁹ Yesuhz daz hnhz nahz, “Mih weng cu kaang daehz, krai lawng Phraz Pen Caoh cih kez cuz kaai mih thanz teur nae ne.” Ihz an diz weng krai plaez ihz tang weng nahz an Phraz Pen Caoh cih kez cuz kaai daehz thanz teur nae ne.

Kuanz keun nyah Yairus boh keun nyah naamz thawkz

⁴⁰ Meuz Yesuhz phraeoz mial plaakz thaz niz nawngz ne ihz heungz baaiz pao Hnhz rae saanyz seuz rap Hnhz.

⁴¹ Meuz ceun diz maang ihz mawh crawp hawkz mus hnhz daz Yairus ne truz kupz rim cawng Yesuhz, hnhz maanyz Yesuhz aez weng kaang daehz.

⁴² Kawp daz hnhz maang kuanz keun nyah taw hawkz, a saak a wa naeh seu kawlz aarz khopz ne penz paw raenz yam. Meuz Yesuhz lan ne wungz ihz keui prawk cu rim Hnhz klawhz plaakz.

⁴³ Maang keun nyah hawkz naamz thawkz seu kawlz aarz wit, seuk neum a naez kaw nam bilz, ron khamz hnhz pan hacz lan.

⁴⁴ Hnhz prawk truz thaz butz Yesuhz, teu kreung Hnhz, meuz ceun diz luat naamz hnhz kaw a wa eutz.

⁴⁵ Yesuhz kaw maanyz, “Yaeh teu Ohz?” Ihz keui kaw daz daehz nam bawnz teu. Petros daz, “Tahz, wungz ihz keui prawk wit wit boh Mih.”

⁴⁶ Keuiz daz Yesuhz daz, “Maang boh ihz hawkz teu Ohz, Ohz mas taanz khoz lae thaz Ohz.”

⁴⁷ Keun nyah an diz mas daehz nam unz bawnz, paw teur ceus rae truz kupz aacz ngaai Yesuhz, hnhz lao aacz ngaai ihz kawp naehz rae daehz teu boh, a wa teu kaw moh rak luat ne.

⁴⁸ Yesuhz daz keun nyah an diz nahz, “An mih yum ne cih aez mih bilz, lan nimz nimz naz.”

⁴⁹ Meuz Yesuhz daz boh ceun diz ne maang ihz hawkz truz thaz kaang Yairus truz lao daz, “Kuanz keun nyah mih a wa yam, nam lo krio Tahz Sra leui.”

⁵⁰ Meuz Yesuhz ngarz ne lao Yairus nahz, “Yak khiz, lo yum pan, kuanz keun nyah mih ne ngaz rak boh.”

⁵¹ Meuz Yesuhz phraeoz kaang Yairus ne neuz lak Petros, Yakop, Yohn boh mah paz keun nyah kyehz pan, nam aez yaeh kut tuhz kaang.

⁵² Ihz keui yaam lengz lengz boh tuhz kaang kawp keun nyah kyehz yam. Yesuhz daz keuh nahz, “Yak yaam, kuanz ihz nam yam keuiz, yaetz reuk ngeut pan.”

⁵³ Ihz keu diz mas kuanz ihz ne a wa yam rae ngot keulz Yesuhz.

⁵⁴ Yesuhz cao keuh lae klawhz ihz rae tawnz tihz keun nyah kyehz ne raak daz, “Rawi raez, kuanz!”

⁵⁵ Khuanz hnhz kut truz mial rae rawi truz luat. Yesuhz seumz keuh leh aez seum suamz.

⁵⁶ Mah paz hnhz keui sangz baaiz, keuiz daz Yesuhz seumz kaar yak aez lao ihz nahz lawng an ni.