Lukas 7 - Riang

Reung dengz yum ihz mawh siukz

¹ Waaiz Yesuhz a wa lao hacz ihz nahz ceun diz ne lan weng Kapernaum.

² Maang kuanz leng ihz mawh siukz prih Rom an upz seu peur ya hawkz, an tahz hnhz yaw baaiz ne reum paw ngaz yam.

³ Meuz ihz mawh siukz ngarz reu oiz Yesuhz ne, hnhz cao ihz mawh Yio teur ka maanyz aez Yesuhz truz teuk bilz aez kuanz leng daehz.

⁴ Meuz keuh phraeoz tawz Yesuhz ne krio daz, “Hnhz an ni kiungz boh Mih kawr.

⁵ Hnhz rak kheuz ehz rae a wa cih aez crawp rawz traz ehz nahz.”

⁶ Kawp ceun diz Yesuhz lan tawiz keuh. Meuz Yesuhz thatz phraeoz kaang keuh ne ihz mawh siukz an diz cao kuanz bohz daehz truz lao Yesuhz, “Tahz, yak cih teuk reu toz Daehz raez. Ohz nam theukz Mih phraeoz truz kaang ehz.

⁷ Ohz kaw nam theukz lan cu Mih. Maang mony reu ma seu khaw keuiz kaw kuanz leng ohz ngaz moh rak.

⁸ Ohz naeh ihz tuhz keutz a na khunz, tuhz keutz ohz kaw maang siukz heungz baaiz. Beuk ohz cao hawkz, ‘Lan.’ daz kaw hnhz lan, cao thaengz hawkz, ‘Truz.’ daz kaw hnhz truz. Ohz cao kuanz leng daehz, ‘Cih an ni raez.’ daz kaw hnhz cih.”

⁹ Meuz Yesuhz ngarz an diz ne sangz baaiz. Hnhz waaiz yawt tang wungz ihz tawiz puatz Daehz rae daz, “Ohz lao pehz nahz, Ohz nam ti awlz reung dengz yum heungz thanz teur ni tuhz kheuz Israel.”

¹⁰ Ihz an hnhz cao lan keui weng phraeoz mial ne awlz kuanz leng an diz kaw a wa moh rak.

Yesuhz cih kuanz yah keu maaiz meu rae imz

¹¹ Nam paw ceu nawhz Yesuhz boh teu paez keui lan weng Nain, tang wungz ihz keui.

¹² Meuz Hnhz a wa thatz keur wah weng ne, ihz keui klamz lae truz ihz yam hawkz, naeh kuanz keur meh taw hawkz yah keu maaiz, ihz weng keui truz tawiz yah keu maaiz.

¹³ Meuz Caoh Phraz awlz keun nyah an diz ne teur yawng baaiz yah keu maaiz rae daz, “Yak yaam.”

¹⁴ Yesuhz nuar lan teu teun lawngz, ihz klamz keui kaw deukz. Yesuhz lao, “Ihz plung aez, Ohz daz mih nahz, rawi raez.”

¹⁵ Ihz yam an diz rawi keu dez upz mial. Yesuhz leh ihz an diz aez mah hnhz nahz.

¹⁶ Keuh hacz aamz tang doz tang sangz lupz phrawz kez cuz Phraz Pen Caoh daz, “Ihz taangz phraz an mawh a wa paw truz peur lah ehz. Phraz Pen Caoh truz kawr ihz Daehz.”

¹⁷ Reu oiz lawng Yesuhz an diz kaw sirz tuhz prih Yio boh prih aarz diz.

Yohn cao teu paez daehz maanyz Yesuhz

¹⁸ Teu paez Yohn keui lao plaez meu rae Yohn nahz lawng an ni. Hnhz raak teu paez daehz keu aarz,

¹⁹ cao lan maanyz Yesuhz, “Mih naeh Tahz an ngaz truz ne haz? Nam anz kaw ehz bawnz mang thaengz hawkz haz?”

²⁰ Meuz kaar phraeoz tawz Yesuhz ne maanyz, “Yohn tahz teuk sruz cao aaiz maanyz daz, ‘Mih naeh Tahz an truz haz? Nam anz kaw ehz bawnz mang thaengz hawkz haz?’”

²¹ Meuz phangz an diz Yesuhz seuk neum ihz penz keui, wah thengz phiz keui, cih aez ihz ngaai lapz keui awlz.

²² Yesuhz lao kaar nahz, “Paarz weng lao Yohn nahz an paarz ngarz boh an paarz awlz, ihz ngaai lapz keui awlz, ihz cawng nam rak keui nuar, ihz tut keui rak meu rae, ihz lutz keui ngarz, ihz yam keui meu rae imz, ihz phaanz keui bawnz ngarz reu oiz rak.

²³ Ihz an nam yum pleung Ohz keui ngaz naeh an rak.”

²⁴ Waaiz teu paez Yohn weng lan ne Yesuhz lao wungz ihz keui nahz lawng Yohn daz, “Pehz lan yawt naehz tuhz plaangz klaacz tui? Lan yawt teungz teur law keusz tawiz kurz pat haz?

²⁵ Nam anz kaw lan yawt ihz kap kreung laep haz? Yawt luz! Ihz kap kreung langz mawh rae moh khyaw khyaw ne naeh tuhz hawz pan.

²⁶ Pehz lae lan yawt naehz? Lan yawt ihz taangz phraz haz? Anz mawn laai, Ohz daz pehz nahz hnhz mawh lak ihz taangz phraz.

²⁷ Naeh Yohn, tuhz kyaamz lik taemz mok lawng hnhz daz, ‘Yawt raez, Ohz cao ihz phuhz reu oiz Daehz lan aacz Mih, hnhz ngaz meu rae reung dengz aacz Mih.’

²⁸ Ohz lao pehz nahz, ihz an keun nyah keut penz truz ihz ne yaeh nam mawh lak Yohn leui. Keuiz daz ihz an kyehz lak ihz tuhz prih Phraz Pen Caoh ne mawh lak Yohn boh.”

²⁹ Ihz hacz aamz an ngarz mony an diz keui, pa tang ihz seutz khawn keui kaw yeung leh teuk sruz tawz Yohn, teur aacz daehz saanyz rap daz Phraz Pen Caoh naeh Tahz an keu sangz.

³⁰ Keuiz daz Pharise boh ihz mawz kyaamz keui nam saanyz rap a kyaam Phraz Pen Caoh rae keuh nam leh teuk sruz tawz Yohn.

³¹ Yesuhz siupz lao thaengz, “Ihz kaap seu ni, ngaz leh naehz neung ez? Keuh deuiz naehz?

³² Keuh naeh ceun kuanz ihz keui keu dez boh tuhz teur laas, teur raak daehz nahz, ‘Ehz putz ceu waasz taw pehz kaw pehz nam haaiz, ehz keun euiz taw pehz kaw pehz nam lengz lengz.’

³³ Yohn tahz teuk sruz truz, nam suamz kaaiz mun, nam tiangz omz seu pit ne pehz daz, ‘Hnhz naeh ihz phiz kut.’

³⁴ Kuanz Ihz truz, suamz suamz tiangz tiangz ne pehz samz daz, ‘Yawt luz, Hnhz an ni naeh ihz suamz leuz tiangz leuz, naeh ihz cih bohz ihz seutz khawn boh ihz nam taap keui.’

³⁵ Keuiz daz, naeh ihz saanyz pinya keui caang mas pinya naeh an anz.”

Yesuhz naeh kaang Simon Pharise

³⁶ Ihz Pharise hawkz raak Yesuhz suamz kaaiz bimz tawz kaang daehz, Hnhz kaw lan kaang keuh, keu dez suamz kawmz.

³⁷ Tuhz weng an diz maang keun nyah nam rak hawkz, hnhz ngarz Yesuhz naeh a diz ne leh truz nam man hawm seu teur dawngz reu aangz keun ra,

³⁸ truz ceng thaz butz Yesuhz, omz ngaai car sapz kaai cawng Yesuhz, leh hukz daehz watz cawng kuny cawng Hnhz rae leh omz hawm thawkz sapz cawng Yesuhz.

³⁹ Meuz Pharise an paangz Yesuhz awlz ceun diz ne daz tuhz phawmz daehz, “Beuk Hnhz naeh ihz taangz phraz kaw taan daehz mas keun nyah an teu cawng Hnhz ne naeh keun nyah ceun nae ez, keun nyah an ni naeh keun nyah nam rak.”

⁴⁰ Yesuhz kaw daz Pharise nahz, “Simon, Ohz lao mih nahz nyaenz awh.” Simon kaw daz, “Lao raez.”

⁴¹ Yesuhz kaw lao, “Maang ihz keu aarz khamz ni tahz paekz hawkz. Hawkz khamz paekz denarius hanz cawi, thaengz hawkz samz khamz paekz denarius ha khanz.

⁴² Kaar nam phrawz bawnz ni daehz teur deuiz. Kawp ceun diz tahz paekz yaoz mah aez kaar eunz. Yaeh ngaz rak leuz tahz paekz?”

⁴³ Simon kaw daz, “Ohz thaang naeh ihz khamz ni heungz.” Yesuhz kaw daz, “Anz mawn ceun mih thaang ne.”

⁴⁴ Yesuhz waaiz yawt keun nyah rae daz Simon nahz, “Anz mih awlz keun nyah an ni? Meuz Ohz kut tuhz kaang pehz, mih nam aez Ohz nahz omz khez cawng, keuiz daz hnhz leh omz ngaai daehz khez cawng Ohz, leh hukz daehz watz teuk hawngz.

⁴⁵ Mih nam saanyz kuny Ohz, keuiz daz thaz meuz Ohz phraeoz ne hnhz kuny cawng Ohz tikz tikz.

⁴⁶ Mih nam leh nam man thukz aez kingz Ohz, keuiz daz keun nyah an ni leh nam man hawm thawkz sapz cawng Ohz.

⁴⁷ Kawp ceun diz an hnhz kawi heungz keui a wa lawt ne mawz rak heungz. Keuiz daz ihz talz plawiz lawt teur nyaenz ne mawz rak taw teur nyaenz.”

⁴⁸ Hnhz kaw daz keun nyah an diz nahz, “Reung dengz kawi mih keui a wa lawt keuiz.”

⁴⁹ Ihz keu dez suamz keui kaw teur daz daehz nahz, “Ihz an plawiz lawt bawnz tang reung dengz kawi ne naeh yaeh ez?”

⁵⁰ Keuiz daz Yesuhz lao keun nyah an diz nahz, “Reung dengz yum mih ne a wa khyawt mih keuiz, lan nimz nimz naz.”