Lukas 22 - Riang

Ihz kyaam piamz Yesuhz

¹ Meuz pawiz kaaiz mun nam sapz ceu an daz pawiz lawt phez ne ngaz phraeoz,

² beunz caangz keui, ihz mawz kyaamz keui kyaam rah piamz Yesuhz, keuiz daz keuh doz ihz.

Yudas Iskariot saz Yesuhz

³ Meuz ceun diz Satan kut tuhz Yudas Iskariot, an naeh tuhz teu paez seu kawlz aarz.

⁴ Hnhz lan cu beunz caangz keui, ihz mawh siukz pao wat keui rae teur reu ma daehz ngaz mat Yesuhz ceun nae.

⁵ Keuh seuz phawmz rae prawm ngaz aez hnhz nahz paekz.

⁶ Hnhz kaw prawm, khahz kraao saang trohz aapz Yesuhz meuz wungz ihz keui nam naeh.

Raenz pawiz kaaiz mun lawt phez

⁷ Meuz phangz pawiz kaaiz mun nam sapz ceu, naeh kaai seu ngihz piamz soz lawt phez ne a wa phraeoz.

⁸ Yesuhz lao Petros kaar Yohn nahz, “Lan raenz pawiz lawt phez ta ehz suamz raez.”

⁹ Kaar maanyz mial daz, “Mih sunz aez aaiz raenz a naez hoh?”

¹⁰ Yesuhz lao kaar nahz, “Meuz paarz kut tuhz weng ne saanyz boh ihz keur meh beusz omz. Lan tawiz hnhz kut tuhz kaang an hnhz kut,

¹¹ daz tahz kaang ne nahz, ‘Tahz Sra ehz daz, lukz khaekz naeh a naez, ti Ohz boh teu paez Ohz suamz kaaiz mun ne naeh a naez?’

¹² Ihz an diz ngaz plaez paarz nahz lukz mawh raan thaz kol an khriungz mok. Raenz mok ehz nahz a diz raez.”

¹³ Petros kaar Yohn kaw lan awlz ceun Yesuhz lao rae kaar raenz mok pawiz lawt phez a diz.

Pawiz Caoh Phraz

¹⁴ Meuz kraao a wa phraeoz ne Yesuhz boh teu maan keui keu dez truz suamz kaaiz mun kaai pheunz.

¹⁵ Hnhz daz keuh nahz, “Co Ohz maat talz peur teuk ne Ohz sunz suamz kawmz pehz baaiz, pawiz kaaiz mun nam sapz ceu.

¹⁶ Ohz daz mawn pehz nahz, Ohz nam suamz thaengz kaaiz mun ceun ni, taw lawng an ni maat keunyz tuhz prih Phraz Pen Caoh.”

¹⁷ Yesuhz leh klakz omz seu pit, dawkz kez cuz Phraz Pen Caoh rae daz, “Leh klakz an ni, teur phraez tiangz raez.

¹⁸ Ohz lao pehz, taw prih Phraz Pen Caoh tae ne Ohz nam tiangz thaengz seu pawk leui.”

¹⁹ Yesuhz leh tang kaaiz mun, lupz phrawz kez cuz Phraz Pen Caoh. Hnhz pekz kaaiz mun an diz aez keuh nahz, “An ni naeh toz Ohz, an ohz cunz aez pehz nahz. Aez pehz tang Ohz ne cih ceun ni raez.”

²⁰ Naeh ceun diz, waaiz suamz kaaiz borz ne, Hnhz leh tang klakz omz seu pit, Hnhz daz keuh nahz, “An ni naeh naamz Ohz, an thawkz aez pehz nahz, naeh traz an prawm teun mehz.

²¹ Keuiz daz yawt raez, tihz ihz an aapz Ohz ne naeh kawmz Ohz kaai pheunz an ni!

²² Kuanz Ihz ngaz bawnz yam ceun a wa bakz mok, keuiz daz kaai ihz aapz ne naeh an nam rak.”

²³ Keuh teur deuiz teur maanyz daehz naeh yaeh ngaz cih ceun ni a.

Yaeh ngaz mawh myaat lak ihz?

²⁴ Teu maan keui teur thiangz daehz daz tuhz keuh ne yaeh mawh myaat lak ihz.

²⁵ Yesuhz lao keuh nahz, “Khunz an nam anz kheuz Yio keui leh a na upz peung ihz prih daehz, ihz maang a na keui kaw daz daehz cih kez cuz kaai ihz prih daehz.

²⁶ Keuiz daz pehz yak cih ceun keuh. An mawh lak ihz ne aez naeh ceun an kyehz lak ihz raez, ihz peur aacz kaw aez naeh ceun kuanz leng ihz raez.

²⁷ Ihz keu dez a pheunz boh ihz cih damz ne yaeh mawh myaat leuz a? Nam anz ihz keu dez haz? Keuiz daz Ohz naeh ceun kuanz leng peur lah pehz.

²⁸ Meuz Ohz talz an kyaam ya ne pehz naeh kawmz Ohz se se.

²⁹ Ceun Paz Ohz aez Ohz upz peung prih ne Ohz kaw ngaz aez pehz upz peung.

³⁰ Pehz ngaz bawnz suamz bawnz tiangz kawmz a pheunz Ohz tuhz prih Ohz, keu dez kaai plaang ne ngaz tatz traz kaai kheuz Israel seu kawlz aarz.

Yesuhz lao aacz Petros ngaz thiangz thengz Daehz

³¹ ‘Simon, Simon, teuk ngarz raez! Satan maanyz kriung pehz naeh ceun ihz kriung kaaiz kyung ne.

³² Keuiz daz Ohz suz tawngz aez mih boh, yak aez reung dengz yum mih pleung. Meuz mih waaiz cu mial Ohz ne aez kuanz mai daehz keui nahz keum rang raez.’”

³³ Petros mial daz, “Tahz, sangz daz bawnz klaez thang kawmz Mih hiuz, yam kawmz Mih hiuz kaw ohz a wa peun tan mok.”

³⁴ Yesuhz mial daz hnhz nahz, “Borz meu ni co yaerz maat keu dawrz ne mih ngaz thiangz Ohz waiz laehz ngaz daz daehz nam mas Ohz.”

Thangz paekz, seu kiz boh waac

³⁵ Yesuhz maanyz teu paez Daehz keui nahz, “Meuz Ohz cao pehz lan nam khaenz thangz paekz, seu kiz boh cawng khlapz ne anz pehz lo seu ceu seu meoz?” Teu paez keui kaw daz, “Nam.”

³⁶ Yesuhz lao keuh nahz, “Seu ni ihz maang thangz paekz kaw aez khaenz, ihz maang seu kiz lae reung dengz kaw aez khaenz, ihz nam maang waac kaw saz kreung daehz aez yal.

³⁷ An taemz mok lawng Ohz daz, ‘Hnhz an ni bawnz nap teur kawmz tang ihz raai,’ an daz ne ngaz naeh mawn.”

³⁸ Teu paez keui kaw mial daz, “Tahz, a niz maang waac keu aarz.” Yesuhz mial daz, “A wa bawnz.”

Yesuhz suz tawngz kaai Rang Olip

³⁹ Waaiz an diz, Yesuhz lae thaz weng rae lan cu rang Olip ceun Hnhz tomz lan klawhz pawk, teu paez Hnhz keui kaw lan tawiz.

⁴⁰ Meuz keuh phraeoz ne Hnhz daz keuh nahz, “Yak aez pehz lan tawiz reung dengz kyaam ya ne pehz suz tawngz raez.”

⁴¹ Yesuhz praasz keuh lan yaan seu wiurz kawnz reu aangz ne, Hnhz seuk deumz suz tawngz daz,

⁴² “Paz, beuk caang kaw, kraai thengz klakz an ni thaz Ohz. Keuiz daz yak aez naeh ceun Ohz sunz penz, aez naeh ceun Mih sunz penz.”

⁴³ Meuz phangz an diz teu maan kaang raaoz thaz kaang raaoz seu paz plaez toz a Hnhz ne aez Hnhz nahz keum rang.

⁴⁴ Hnhz suhz phawmz baaiz rae suz tawngz mawn baaiz, sraangz Hnhz car naeh ceun cakz naamz.

⁴⁵ Meuz Hnhz rawi thaz suz tawngz, mial truz cu teu paez Daehz ne awlz keuh yaetz reuk ngeut, kawp keuh phawmz luh onz reu.

⁴⁶ Hnhz lao keuh nahz, “Cih naehz lah, pehz yaetz reuk ngeut a? Rawi suz tawngz raez, aez pehz lawt thaz reung dengz kyaam ya.”

Ihz cawpz Yesuhz

⁴⁷ Meuz Yesuhz daz boh ceun diz ne maang ihz seu wungz phraeoz truz. Yudas an naeh tuhz seu kawlz aarz ne aacz truz keuh. Yudas truz cu Yesuhz ngaz kuny Hnhz.

⁴⁸ Yesuhz maanyz hnhz, “Yudas aez, mih kuny rae aapz Kuanz Ihz haz?”

⁴⁹ Meuz teu paez Yesuhz keui mas lawng an keu diz ne keuh maanyz, “Tahz, anz ehz ngaz leh waac mak hiuz?”

⁵⁰ Naeh hawkz mak aez kuanz leng ceu beunz, keu tiakz takz kaaiz hnhz paw teutz.

⁵¹ Yesuhz kaw lao, “Paw leuk!” Hnhz teu keu tiakz ihz an diz cih aez rak mial.

⁵² Yesuhz lao beunz caangz keui, ihz mawh siukz pao wat boh ihz peur aacz setz an truz cu Daehz keui nahz, “Pehz khaenz tang kawn tang waac ngaz mat Ohz ceun conz haz?

⁵³ Ohz naeh kawmz pehz tuhz wat klawhz seu ngihz, pehz paw nam mat Ohz. Keuiz daz seu ni naeh kraao pehz, naeh kraao an bimz upz peung.”

Petros thiangz Yesuhz

⁵⁴ Keuh mat Yesuhz leh lan cu kaang ceu beunz. Petros moh teun yaan lan tawiz.

⁵⁵ Keuh sapz ngal tuhz teun leukz, keu dez teur wong, Petros kaw keu dez kawmz keuh.

⁵⁶ Meuz keun nyah kuanz leng hawkz yawt takz hnhz keu dez a ngal ne daz, “Hnhz an ni naeh ihz tawiz Yesuhz.”

⁵⁷ Petros kaw thiangz daz, “Keun nyah aez, ohz nam mas Hnhz keuiz!”

⁵⁸ Moh nam paw ceu nawhz, maang thaengz hawkz awlz Petros ne daz, “Mih hawkz naeh cumz keuh!” Petros kaw thiangz thaengz, “Nam anz ohz.”

⁵⁹ Moh thaengz seu seu na ri ne maang thaengz hawkz truz tak mawn baaiz daz, “Hnhz an ni naeh mawn bohz Yesuhz, naeh ihz prih Kalile!”

⁶⁰ Petros thiangz thengz thaengz daz, “Ohz nam mas an mih lao!” Meuz hnhz yeung daz ceun diz ne yaerz kaw keu dawrz luat.

⁶¹ Caoh Phraz waaiz yawt Petros. Petros samz tang mony reu ma Hnhz lao mok daz, “Borz meu ni co yaerz maat keu dawrz ne mih ngaz thiangz Ohz waiz laehz daz daehz nam mas Ohz.”

⁶² Hnhz kaw peun lengz lengz baaiz rae lae yaam lang nawk.

Ihz ngot keulz Yesuhz

⁶³ Ihz pao Yesuhz keui ngot keulz Hnhz, tiz Hnhz.

⁶⁴ Keuh reupz mok ngaai Hnhz ne maanyz, “Yaeh tiz Mih, tak raez?”

⁶⁵ Leh tang mony reu ma tang meoz keui saehz Hnhz.

Yesuhz phraeoz aacz ngaai khunz Pilat boh khunz Herot

⁶⁶ Meuz prih a wa thaangz ne ihz mawh Yio keui, beunz caangz keui boh ihz mawz kyaamz keui leh lan Yesuhz tawz rumz.

⁶⁷ Keuh maanyz, “Beuk Mih naeh mawn Khris kaw lao ehz raez.” Yesuhz mial daz, “Beuk Ohz lao, pehz te nam yum Ohz.

⁶⁸ Beuk Ohz maanyz kaw pehz te nam thaw.

⁶⁹ Kaanz ni lan, Kuanz Ihz ngaz keu dez plaakz takz kaaiz Phraz Pen Caoh taanz khoz mawh.”

⁷⁰ Keuh hacz aamz kaw maanyz thaengz, “Beuk naeh ceun diz kaw Mih naeh Kuanz Phraz Pen Caoh haz?” Yesuhz mial tawpz, “Naeh mawn ceun pehz daz.”

⁷¹ Keuh kaw daz, “Ehz lo thaengz naehz leui? Toz ehz a wa ngarz Hnhz lao.”