Lukas 2 - Riang

Lawng Yesuhz keut

¹ Meuz phangz an diz khunz longz Kaesar Aukustus lao ihz tang prih Rom hacz aamz keui sapz craangz ihz.

² An ni naeh laehz seun teungz seutz craangz ihz co khunz Kuirinius penz khunz prih Siria.

³ Ihz keui hacz aamz teur aacz daehz weng cu ti moh daehz rae sapz craangz.

⁴ Yosep kaw moh weng Nasaret, prih Kalile lan cu weng Betlehem, prih Yio, an naeh weng khunz Dawit, kawp daz hnhz naeh kheuz khunz Dawit.

⁵ Hnhz lan sapz craangz tang Mari, an hnhz ngaz leh ne. Keun nyah an diz a wa thatz maang kuanz.

⁶ Meuz kaar naeh a weng Betlehem, seu ngihz maang kuanz a wa phraeoz ne,

⁷ hnhz kaw maang kuanz kingz. Hnhz leh pahz pok kuanz ihz, seuk yaetz mok tuhz haangz meuk. Kawp daz ti khaekz keui preumz ne nam lawnz leui.

Ihz khaenz soz boh teu maan kaang raaoz

⁸ Tuhz prih an diz maang ihz khaenz soz, keuh moh tawz plaangz, keuh pao wungz soz daehz meuz teuk bimz.

⁹ Meuz ceun diz teu maan kaang raaoz Phraz Cen Cen seu paz paw truz tawz keuh, bunz Phraz Cen Cen aasz keum yaamz rae keuh doz baaiz.

¹⁰ Keuiz daz teu maan kaang raaoz daz, “Yak doz! Ohz maang reu oiz rak ta pehz, aez ihz hacz aamz keui seuz phawmz mawn mawn.

¹¹ Seu ngihz meu ni Tahz Khyawt, an naeh Tahz Khris ne keut aez pehz nahz tuhz weng khunz Dawit.

¹² Pehz ngaz cih seu naez mas Hnhz naeh yaeh ne, pehz ngaz awlz kuanz ngaak, leh pahz pok rae seut yaetz boh tuhz haangz meuk.”

¹³ Meuz ceun diz tap teu maan kaang raaoz an heungz keui paw truz tawiz luat teu maan kaang raaoz an diz rae lupz phrawz Phraz Pen Caoh daz,

¹⁴ “Lupz phrawz Phraz Pen Caoh an naeh kaang raaoz trawng dutz, tuhz prih keu tehz kaai ihz an Hnhz trohz phawmz kaw aez maang reung dengz phawmz nimz!”

¹⁵ Waaiz teu maan kaang raaoz keui raw lan lang kaang raaoz ne ihz khaenz soz keui teur daz daehz nahz, “Ehz lan cu weng Betlehem rae lan yawt an Phraz Cen Cen lao ehz.”

¹⁶ Keuh rip lan, awlz Mari boh Yosep tang kuanz ngaak an seuk yaetz boh tuhz haangz meuk.

¹⁷ Meuz ihz khaenz soz keui awlz Yesuhz ne keuh daz mah paz Hnhz nahz, lawng teu maan kaang raaoz keui lao daehz.

¹⁸ Ihz bawnz ngarz keui kaw teur aacz daehz sangz kaai mony reu ma ihz khaenz soz keui lao.

¹⁹ Keuiz daz Mari tang mok keu diz hacz aamz rae wonz yawt truh truh.

²⁰ Ihz khaenz soz keui kaw weng cu meu rae paangz daehz, teur aacz daehz lupz phrawz Phraz Pen Caoh, an keuh awlz, an keuh ngarz ceun mony reu ma teu maan kaang raaoz lao daehz.

Peuk mus kuanz ngaak daz Yesuhz

²¹ Meuz kuanz ngaak a wa bawnz tahz seu ngihz ne saetz aez cawkz hurz, peuk mus daz Yesuhz, ceun teu maan kaang raaoz seumz mok thaz meuz hnhz maat keun meur.

Leh Yesuhz aapz tuhz wat

²² Yosep boh Mari cih tawiz traz Moses, kraao leh kuanz ihz aez seu ngamz a wa phraeoz ne kaar leh lan Hnhz cu wat tuhz weng Yerusalem,

²³ ceun traz Phraz Cen Cen naeh mok, kuanz kingz keur meh ne aez seu ngamz ta Phraz Cen Cen nahz.

²⁴ Kaar raenz kreung lu, ploiz seu ku nam anz kaw ka kaez kyehz seu ku tawiz traz Phraz Cen Cen.

²⁵ Meuz ceun diz maang ihz hawkz mus daz Simeon, ihz weng Yerusalem. Hnhz naeh ihz rak, ihz doz suamz Phraz Pen Caoh rae mang kheuz Israel keui phraeoz reung dengz khyawt. Khuanz Seu Ngamz kaw naeh kaai hnhz.

²⁶ Khuanz Seu Ngamz lawk mok aez hnhz nahz, beuk maat bawnz awlz Tahz Khris Phraz Cen Cen kaw maat yam.

²⁷ Khuanz aacz lan Simeon a teu laangz wat. Meuz mah paz Yesuhz leh lan Hnhz a wat cih tawiz traz an naeh mok ne,

²⁸ Simeon kaw pumz kuanz ihz kaai tranz daehz rae lupz phrawz Phraz Pen Caoh daz,

²⁹ “Phraz Cen Cen aez, seu ni ceun keu tih Mih a wa keunyz kaai ohz rae ohz an naeh kuanz leng Mih ngaz bawnz yam pyaw.

³⁰ Ngaai ohz a wa bawnz awlz reung dengz khyawt Tahz ehz,

³¹ an Mih raenz aez aacz ngaai ihz hacz aamz.

³² Mih plaez an thaangz kaai ihz an nam anz kheuz Yio, aez penz bunz kaai kheuz Daehz Israel keui nahz.”

³³ Mah paz Yesuhz kaw sangz Simeon lao lawng Hnhz.

³⁴ Simeon aez reung dengz rak a keuh, daz tang Mari nahz, “Yawt luz! Phraz Pen Caoh khaanz mok Kuanz Ihz an ni aez kheuz Israel tang heungz keui luh sumz, teur ka samz raw trawng. Hnhz ngaz naeh a tik Phraz, ihz tang heungz keui ngaz upz khatz Hnhz.

³⁵ Kawp ceun diz a kyaam tuhz kingz keu nuasz ihz keui ngaz plaez rae, naeh ceun waac ngaz teusz kingz keu nuasz mih.”

Mony reu ma Anna rawz

³⁶ Maang yah keu maaiz ihz taangz phraz hawkz, mus hnhz daz Anna, hnhz naeh kuanz Phanuel, kheuz Asher. Hnhz a wa thao baaiz, bawnz moh kawmz tahz daehz pulz wit pan.

³⁷ Penz yah keu maaiz taw a saak hnhz a wa naeh tahz kawlz ponz. Hnhz nam praasz wat seu pawk, seuk ngih teuk bimz hnhz koz kwaai Phraz Pen Caoh tang suz tawngz boh kaerz seum suamz.

³⁸ Meuz phangz an diz hnhz truz lupz phrawz Phraz Pen Caoh, lao aez ihz weng Yerusalem an mang reung dengz khyawt keui nahz lawng Kuanz Ihz.

Weng mial weng Nasaret

³⁹ Waaiz Yosep kaar Mari a wa cih tawiz traz Phraz Cen Cen ne keuh weng cu mial kaang daehz a weng Nasaret, tuhz prih Kalile.

⁴⁰ Kuanz ihz kaw mawh truz, keum rang truz, reung dengz mas kaw heungz truz, kez cuz Phraz Pen Caoh kaw naeh kaai Hnhz.

Yesuhz naeh tuhz wat

⁴¹ Mah paz Yesuhz lan pawiz lawt phez tawz weng Yerusalem klawhz wit.

⁴² Meuz Yesuhz a wa bawnz seu kawlz aarz khopz ne lan weng Yerusalem ceun tomz lan klawhz wit.

⁴³ Meuz pawiz a wa waaiz ne keuh teur aacz daehz weng. Keuiz daz Yesuhz samz kiutz tuhz weng Yerusalem. Mah paz samz nam mas naeh ceun diz.

⁴⁴ Kaar thaang naaoz daehz naeh tuhz kuanz bohz kuanz mai daehz. Kaar weng a wa bawnz seu seu ngihz, dawmz yawt tawiz ceu kheuz kuanz mai boh tawiz kuanz bohz keui.

⁴⁵ Meuz kaar nam awlz Hnhz, kaar kaw truz dawmz mial Hnhz tuhz weng Yerusalem.

⁴⁶ Moh waiz seu ngihz kaar awlz Hnhz naeh boh tuhz wat, keu dez peur lah ihz mawz kyaamz Yio keui rae teuk ngarz keuh, maanyz keuh.

⁴⁷ Ihz an ngarz Hnhz keui sangz baaiz an Hnhz maang pinya tawpz bawnz.

⁴⁸ Meuz mah paz Hnhz awlz ne sangz. Mah keuh daz Hnhz nahz, “Naaoz, Mih cih naehz aaiz nahz? Aaiz paz pehz keun tiatz phawmz khahz mih eu.”

⁴⁹ Yesuhz daz kaar nahz, “Cih naehz khahz Ohz a? Mah kaar paz nam mas haz, Ohz naeh tuhz kaang Paz Daehz a?”

⁵⁰ Keuiz daz kaar nam loz phawmz an Hnhz tawpz.

⁵¹ Hnhz kaw weng tawiz mah paz ne phraeoz weng Nasaret, teuk ngarz mony reu ma kaar. Mah keuh kaw peun tang mok lawng keu ni hacz aamz tuhz phawmz daehz.

⁵² Toz Yesuhz kaw mawh truz, pinya Hnhz kaw heungz truz rae bawnz mawk mael aacz ngaai Phraz Pen Caoh boh aacz ngaai ihz.