Lukas 19 - Riang

Yesuhz boh Sakkhaeus

¹ Yesuhz datz kut tuhz weng Yerikho.

² Tuhz weng an diz maang ihz mawh seutz khawn hawkz, mus hnhz daz Sakkhaeus, hnhz naeh ihz maang.

³ Hnhz sunz awlz Yesuhz, keuiz daz hnhz naeh ihz pakz, nam awlz bawnz Yesuhz kawp daz wungz ihz heungz.

⁴ Hnhz wang lan aacz ngaai ihz, raw khaehz laangz wah, pao yawt reung dengz an Yesuhz ngaz truz.

⁵ Meuz Yesuhz phraeoz a diz ne ngaw yawt hnhz rae daz, “Sakkhaeus, cur truz luat raez! Meu ni Ohz ngaz cih khaekz kaang pehz.”

⁶ Sakkhaeus kaw cur luat rae seuz phawmz saanyz Yesuhz weng kaang daehz.

⁷ Meuz ihz keui awlz ne teur aacz daehz saehz daz, “Hnhz an ni cih khaekz ihz maang reung dengz kawi.”

⁸ Sakkhaeus ceng lao Caoh Phraz daz, “Ohz ngaz aez ihz phaanz nahz phrihz phrahz daehz seu khinz, beuk ohz upz leh maen khangz ihz kaw aez mial ponz pun.”

⁹ Yesuhz lao Sakkhaeus nahz, “Seu ngihz meu ni reung dengz khyawt a wa phraeoz tuhz kaang an ni, kawp daz hnhz kaw naeh kuanz Abraham.

¹⁰ Kawp daz Kuanz Ihz ne truz khahz khyawt ihz bilz.”

Pung taek lawng kuanz leng seu kawlz

¹¹ Yesuhz lao ihz teuk ngarz traz keui nahz mony pung taek kawp Hnhz a wa naeh thatz weng Yerusalem, kawp daz ihz keui thaang prih Phraz Pen Caoh ne ngaz tae luat.

¹² Hnhz daz, “Maang caoh waz hawkz, hnhz ngaz lan cih khunz rae lae nawk prih kaw hnhz weng truz mial.

¹³ Meuz maat lan ne raak kuanz leng daehz seu kawlz, aez keuh nahz khamz ihz teur pyaz, daz keuh nahz, ‘Leh khamz keu ni khahz ka thonz taw ohz phraeoz mial tui raez.’

¹⁴ Keuiz daz ihz prih an ceuh hnhz keui cao ihz taangz daehz lao daz, ‘Ehz nam dawhz hnhz cih khunz ehz.’

¹⁵ Meuz caoh waz an diz penz khunz weng truz mial ne sunz mas kuanz leng daehz an daehz lao mok, an aez mok khamz keui bawnz a myaat seu naeh rae raak truz maanyz keuh.

¹⁶ Kuanz leng hawkz truz daz, ‘Tahz, ohz leh khamz mih seu pyaz ne bawnz a myaat seu khanz.’

¹⁷ Khunz an diz daz, ‘Kyahz baaiz, tawiz an kyehz kaw mih maang saet ca, upz peung mih nahz seu kawlz weng raez.’

¹⁸ Thaengz hawkz kaw truz daz, ‘Tahz, ohz leh khamz mih seu pyaz ne a wa bawnz a myaat hanz pyaz.’

¹⁹ Khunz an diz kaw daz, ‘Upz peung mih nahz hanz weng raez.’

²⁰ Thaengz hawkz samz truz daz, ‘Tahz, khamz mih naeh a niz, ohz leh pahz cet tawmz mok.

²¹ Ohz mas, kawp daz mih cih kreuk, seutz tawiz ti daehz nam tam rae woc tawiz ti daehz nam plihz.’

²² Khunz an diz daz, ‘Euz, kuanz leng raai, ohz ngaz tatz traz tawiz mony reu ma mih. Beuk mih mas ohz cih kreuk, seutz tawiz ti ohz nam tam, woc tawiz ti ohz nam plihz ne,

²³ leh khamz ohz nam aez mok tawz ihz plawiz yangz hoh?’ Beuk mih cih ceun diz ohz bawnz tang yangz eu.

²⁴ Khunz an diz lao ihz ceng rim daehz keui nahz, ‘Leh khamz a hnhz ne aez ihz maang seu khanz nahz.’

²⁵ Keuh kaw daz, ‘Hnhz paw a wa maang seu khanz hoh!’

²⁶ Khunz kaw daz, ‘Kaai ihz maang ne ohz ngaz aez thaengz, kaai ihz nam maang ne leh thengz tang seu keuh maang.

²⁷ Seu ni leh truz tang raan su ohz, an nam sunz aez ohz penz khunz daehz keui, piamz keuh aacz ngaai ohz.’”

Yesuhz kut tuhz weng Yerusalem

²⁸ Meuz Yesuhz a wa lao ceun diz ne lan aacz ngaai ihz, lan weng Yerusalem.

²⁹ Meuz ngaz phraeoz pruh Betphake boh pruh Bethani, rim teungz rang an ihz daz rang Olip ne cao teu paez Daehz keu aarz lan aacz ngaai.

³⁰ Hnhz seumz kaar nahz, “Kut tuhz pruh an naeh aacz ngaai paarz, paarz te awlz meu rang mahz liz an yaeh maat ti tumz ne tukz mok. Khawz nuarz leh truz a niz raez.

³¹ Beuk ihz maanyz, cih naehz khawz nuarz mahz liz daz kaw, ‘Tahz ehz lo,’ daz ceun ni.”

³² Kaar kaw lan awlz ceun Yesuhz lao kaar klawhz meoz.

³³ Meuz kaar yeung khawz nuarz mahz liz ne tahz mahz liz maanyz, “Cih naehz, khawz nuarz mahz liz a?”

³⁴ Kaar kaw mial daz, “Tahz ehz lo.”

³⁵ Kaar leh truz cu Yesuhz, kaar leh kreung daehz paelz kaai butz mahz liz rae aez Yesuhz tumz.

³⁶ Meuz Hnhz tumz lan boh ne ihz keui leh kreung daehz paelz tawiz reung dengz.

³⁷ Meuz Hnhz ngaz phraeoz rim weng Yerusalem, paerz rang Olip ne wungz ihz an naeh teu paez keui seuz phawmz seun teungz ngawk lupz phrawz Phraz Pen Caoh usz usz tawiz an keuh awlz taanz khoz an Hnhz cih plaez hacz aamz.

³⁸ Keuh raak daz, “Phraz Pen Caoh aez reung dengz rak kaai khunz an truz kaai mus Phraz Cen Cen. Reung dengz nimz aez naeh lang kaang raaoz, aez bunz naeh tawz Phraz Pen Caoh!”

³⁹ Pharise teur ka an naeh tuhz wungz ihz keui lao Yesuhz daz, “Tahz sra, lao teu paez Mih keui moh pras pras!”

⁴⁰ Hnhz kaw mial daz, “Ohz daz pehz nahz, beuk keuh moh pras kaw kawnz reu aangz keui ngaz raak keurz boh.”

Yesuhz yaam ta weng Yerusalem

⁴¹ Meuz Yesuhz thatz weng Yerusalem ne awlz weng an diz rae yaam daz,

⁴² “Khanz mih mas kraao seu ni naeh lawng an cih aez penz truz reung dengz nimz ne te rak baaiz. Keuiz daz seu ni an keu diz yeung seun tapz mok ngaai mih.

⁴³ Kraao raan su mih keui cih peun lawm rae khangz wit wit mih ne ngaz naeh.

⁴⁴ Keuh te ya mih boh ihz an naeh tuhz peun lawm weng mih hacz aamz keui aez teuk krengz keu tehz, kawnz reu aangz an peun baetz teur sawnz keui thanz paw nam kiutz hawkz hawkz, kawp daz mih nam mas kraao Phraz Pen Caoh truz yawt daehz.”

Yesuhz kut tuhz wat

⁴⁵ Meuz Yesuhz kut tuhz wat ne wah thengz ihz saz toz satz pukz caw keui.

⁴⁶ Hnhz daz keuh nahz, “Tuhz kyaamz lik taemz mok, ‘Kaang Ohz naeh ti suz tawngz’ da, keuiz daz pehz cih aez hnhz naeh tham conz.”

⁴⁷ Yesuhz sawnz aez tuhz wat klawhz seu ngihz. Beunz caangz keui, ihz mawz kyaamz keui, tang ihz peur aacz keui kyaam piamz Hnhz.

⁴⁸ Keuiz daz keuh nam caang, kawp daz maen phangz ihz keui maang phawmz teuk ngarz mawn mawn mony reu ma Hnhz sawnz.