Lukas 17 - Riang

Reung dengz kawi

¹ Yesuhz lao teu paez daehz nahz, “An caang cih aez pleung keui ngaz naeh. Keuiz daz ihz an cih aez ihz pleung ne naeh an nam rak.

² Kaai ihz ceun diz nahz, leh reu aangz mawh hawiz kokz hnhz rae wiurz sapz tuhz paang laai ne baaiz rak lak cih aez kuanz ihz keui pleung.

³ Seu tih toz daehz raez. Beuk kuanz mai pehz cih pleung kaw lao sawnz hnhz, beuk hnhz caanz daehz eunz kaw plawiz lawt aez hnhz.

⁴ Beuk hnhz cih teuk pleung mih seu seu ngihz pan pulz laehz, samz daz ‘Ohz a wa caanz kaw, pehz bawnz plawiz lawt reung dengz kawi hnhz.’”

Reung dengz yum

⁵ Teu maan keui daz Caoh Phraz nahz, “Cih aez reung dengz yum ehz heungz.”

⁶ Caoh Phraz lao keuh nahz, “Beuk pehz maang reung dengz yum seu cakz mustart kaw lao teungz laangz wah nahz, ‘Seuk bawkz tang rias daehz, lan peuk ceukz imz tuhz paang laai raez!’ Daz kaw hnhz teuk ngarz pehz.”

Kaanz kuanz leng

⁷ “Khanz daz tuhz pehz ne maang kuanz leng hawkz weng truz thaz thaiz maar nam anz kaw weng truz thaz khaenz soz ne, anz pehz ngaz daz hnhz nahz, ‘Truz suamz luat raez’?

⁸ Nam daz ceun diz keuiz. Pehz daz hnhz nahz, ‘Raenz pheunz kaaiz damz aacz ohz raez, beuk ohz a wa saakz tui mih caang suamz.’

⁹ Kuanz leng an diz cih tawiz an tahz paz leng daehz lao mok. Anz tahz paz lengz hnhz lo tawpz aez kez cuz hnhz haz? Nam lo keuiz.

¹⁰ Pehz kaw naeh ceun diz, meuz pehz cih teuk wa kaanz an tahz pehz cao ne pehz te daz, ‘Ehz naeh ihz cih aez kez cuz kaai tahz ehz nam anz, ehz cih tawiz an hnhz cao pan.’”

Ihz tut seu kawlz

¹¹ Meuz Yesuhz lan weng Yerusalem ne lan tawiz peur lah prih Samaria boh prih Kalile.

¹² Meuz Hnhz ngaz kut tuhz pruh seu pruh ne maang ihz tut seu kawlz truz saanyz Hnhz. Keuh ceng raamz yaan,

¹³ raak usz usz daz, “Yesuhz, Tahz, teur yawng ehz!”

¹⁴ Meuz Hnhz awlz ne daz keuh nahz, “Lan plaez toz pehz tawz saangz longz keui raez.” Meuz keuh lan tawiz reung dengz ne keuh a wa rak.

¹⁵ Tuhz keuh ne naeh hawkz, awlz daehz a wa rak rae truz cu mial Yesuhz, raak usz usz lupz phrawz Phraz Pen Caoh.

¹⁶ Hnhz truz kupz rim cawng Yesuhz daz kez cuz mawh. Ihz an diz naeh ihz Samaria.

¹⁷ Yesuhz maanyz, “Nam anz ihz seu kawlz haz, an a wa rak meu rae a? Hawz hoh, timz a?

¹⁸ Naeh taw ihz taang kheuz an ni pan truz cu mial, lupz phrawz Phraz Pen Caoh a?”

¹⁹ Yesuhz kaw daz hnhz nahz, “Ceng, lan raez, reung dengz yum mih cih aez mih bilz.”

Prih Phraz Pen Caoh ngaz tae

²⁰ Pharise teur ka maanyz Yesuhz, “Prih Phraz Pen Caoh ngaz tae peuk naeh?” Yesuhz mial daz, “Prih Phraz Pen Caoh nam tae kaai an ngaai ihz caang awlz.

²¹ Pehz nam caang daz, yawt a niz, yawt a tui kawp daz prih Phraz Pen Caoh naeh tuhz pehz.”

²² Yesuhz lao teu paez Daehz keui nahz, “Kraao pehz sunz awlz seu ngihz Kuanz Ihz ne ngaz phraeoz, keuiz daz pehz te nam awlz.

²³ Ihz keui ngaz lao pehz nahz, ‘Yawt a tui, yawt a niz,’ keuiz daz pehz yak lan tawiz.

²⁴ Seu ngihz Kuanz Ihz ne naeh ceun laak lawk aasz keum yaamz lang plengz ceng taw ceng.

²⁵ Meuz maat naeh ceun diz Kuanz Ihz ne ngaz talz peur teuk heungz rae, ihz co an ni ngaz thiangz thengz hnhz.

²⁶ Meuz seu ngihz Kuanz Ihz truz ne naeh ceun co Noah.

²⁷ Ihz keui suamz suamz tiangz tiangz, leh tahz leh yah taw phraeoz seu ngihz Noah kut tuhz ceun luang rae omz lumz teuk yam keuh hacz aamz.

²⁸ Meuz co Lot kaw naeh ceun diz, ihz keui suamz suamz tiangz tiangz, saz saz yal yal, plihz plihz buiz buiz, teur aacz daehz cih kaang.

²⁹ Seu ngihz Lot lae thaz weng Sodom ne cung ngal kaanz klaez truz thaz kaang raaoz rae teuk yam keuh hacz aamz.

³⁰ Kaai seu ngihz Kuanz Ihz paw truz tui kaw ngaz naeh ceun diz.

³¹ Kaai seu ngihz an diz ihz naeh lang kusz kaang keui aez tiunz luat rae yak aez hnhz cur leh phrihz phrahz daehz tuhz kaang. Ihz naeh tawiz sraakz maar keui kaw aez tiunz luat rae yak aez hnhz weng kaang daehz.

³² Tang tang lawng yah Lot raez.

³³ Ihz khyawt aez phawmz daehz lawt ne ngaz luh sumz, ihz luh sumz phawmz ne ngaz bawnz khyawt.

³⁴ Ohz lao pehz nahz, meuz borz an diz ihz keu aarz yaetz kuz kawmz ne hawkz talz leh lan, hawkz samz kiutz mok.

³⁵ Keun nyah keu aarz leui ngohz teur kawmz kaw hawkz talz leh lan, hawkz samz kiutz mok.”

³⁶ Ihz keu aarz naeh tuhz na kaw, hawkz talz ihz leh lan, hawkz samz kiutz.

³⁷ Teu paez keui maanyz Hnhz daz, “Ngaz penz a naez hoh?” Yesuhz kaw lao, “Toz yam naeh a naez kaw, klaangz ta waet a diz.”