Lukas 16 - Riang

Ihz tawnz craangz meukz

¹ Yesuhz lao teu paez Daehz nahz, “Maang tahz seu thez hawkz, hnhz maang ihz tawnz craangz. Hnhz ngarz reu oiz ihz tawnz craangz daehz sraz sraz.

² Kawp ceun diz hnhz raak lao hnhz daz, ‘Ohz ngarz mih eunz ne naeh seu naez? Mih cih seu naez kaw plaez ohz nahz luz. Kamz ni lan, mih nam bawnz cih ihz tawnz craangz leui keuiz.’

³ Ihz tawnz craangz kaw daz mial daehz eunz, ‘Ohz ngaz cih seu naez ez? Tahz ohz a wa wah thengz ohz, ohz nam krang lak keu tehz, maanyz suamz kaw ohz keu sehz.

⁴ Ohz a wa mas kamz ni a, meuz ohz nam maang kaanz kaw aez bohz raen ohz keui saanyz ohz tawiz kaang keuh.’

⁵ Hnhz raak ihz khamz ni tawz tahz seu thez daehz klawhz ihz rae maanyz ihz an truz aacz ihz daz, ‘Mih khamz ni tahz seu thez ehz seu naeh?’

⁶ Ihz an diz kaw daz, ‘Nam man seu peur ya pungz eu.’ Ihz tawnz craangz kaw daz, ‘Leh craangz mih rip keu dez maaiz hanz kawlz raez.’

⁷ Maanyz thaengz hawkz, ‘Mih luz, lo aez seu naeh?’ Ihz an diz kaw daz, ‘Lo aez ngohz seu peur ya langz eu.’ Ihz tawnz craangz kaw daz, ‘Leh craangz mih lan keu dez maaiz tahz kawlz langz raez.’

⁸ Tahz seu thez kaw lupz ihz tawnz craangz meukz cih lakz laem. Kawp daz ihz tuhz prih keu tehz keui cih tawiz kaanz daehz ne lakz laem lak ihz an thaangz.

⁹ Ohz lao pehz nahz, aez daehz maang bohz ne cao phrihz phrahz tuhz prih keu tehz. Meuz phrihz phrahz tuhz prih keu tehz hacz ne, keuh ngaz saanyz pehz tawz kaang cen cen.

¹⁰ Ihz tawz ti tawiz an kyehz ne tawiz an mawh kaw tawz ti boh. Keuiz daz beuk nam tawz ti tawiz an kyehz ne tawiz an mawh kaw nam tawz ti.

¹¹ Kawp ceun diz beuk pehz nam tawz ti kaai ukz ca prih keu tehz ne, yaeh ngaz aapz aez pehz nahz ukz ca an caet?

¹² Beuk pehz nam tawz ti tawiz phrihz phrahz ihz kaw yaeh samz ngaz aez pehz nahz aez naeh khangz pehz?

¹³ Yaeh kaw nam cih bawnz kuanz leng tahz paz leng keu aarz. Hnhz ngaz ceuh hawkz, ngaz rak hawkz, nam anz kaw nap suamz hawkz, ngaz nam saangz suamz hawkz. Pehz kaw nam cih bawnz kuanz leng tang Phraz tang paekz.”

Mony reu ma Yesuhz teur ka

¹⁴ Pharise an lawphahz paekz keui ngarz Yesuhz lao ceun diz ne ngot keulz Hnhz.

¹⁵ Yesuhz daz keuh nahz, “Pehz kiungz keu sangz boh aacz ngaai ihz, keuiz daz Phraz Pen Caoh mas phawmz pehz hacz aamz. Phrihz phrahz an ihz thaang an mawh myaat ne rak seum ritz ritz aacz ngaai Phraz Pen Caoh.

¹⁶ Kyaamz Moses boh kyaamz ihz taangz phraz keui lao reu oiz rak lawng prih Phraz Pen Caoh, taw co Yohn tahz teuk sruz, ihz ngarz keui kaw teur aacz daehz rip kut prih Phraz Pen Caoh.

¹⁷ Kaang raaoz boh keu tehz ne luh yoh lak mony reu ma Phraz Pen Caoh.

¹⁸ Ihz thengz yah daehz leh thaengz yah hawkz ne ihz kawi pleung kamesuhz, ihz leh yah raat kaw kawi pleung kamesuhz.”

Pung taek ihz maang boh Lasarus

¹⁹ “Maang ihz maang hawkz kap kreung eurz langz mawh, moh tuhz reung dengz khyaw klawhz seu ngihz.

²⁰ Samz maang thaengz ihz phaanz hawkz mus hnhz daz Lasarus lae ngoi raai tang toz, yaetz boh keu lawrz ihz maang ne.

²¹ Hnhz pao suamz ihz maang teuk beurz klaez keui. Sohz keui truz liat boh ngoi raai hnhz.

²² Naeh seu seu ngihz ihz phaanz an diz yam, teu maan kaang raaoz keui leh hnhz lan tawz rim Abraham. Ihz maang an diz kaw yam tang daehz rae saangz keo boh.

²³ Khuanz hnhz samz bawnz lan prih maranahz tui. Hnhz ngaw yawt teuk soz awlz Lasarus naeh tawz rim Abraham rae,

²⁴ hnhz raak keurz daz, ‘Paz Abraham, teur yawng ohz luz. Aez Lasarus leh kuanz tihz daehz crum sapz tuhz omz rae teuk car aez taakz ohz luz. Ohz rawhz peur teuk tuhz mukz ngal an ni.’

²⁵ Keuiz daz Abraham lao hnhz, ‘Wonz yawt raez, kuanz, meuz yeung naeh prih keu tehz ne mih dawhz naehz kaw bawnz, Lasarus samz peur teuk. Seu ni hnhz samz sa, mih samz peur teuk baaiz baaiz.

²⁶ Neuz lak an diz, peur lah ehz ne maang phraakz truh. Ihz moh a niz beuk sunz lan cu pehz kaw nam caang. Ihz moh a pehz sunz truz cu ehz kaw nam caang.’

²⁷ Ihz maang kaw daz, ‘Beuk naeh ceun diz kaw Paz Abraham aez, aez Lasarus lan kaang paz ehz tui nyaenz awh lah.

²⁸ Aez hnhz lan kan kuanz mai ohz khanz luz, yak aez keuh truz cu a niz ti peur teuk dutz an ohz naeh ne.’

²⁹ Abraham daz, ‘Maang boh traz Moses boh traz ihz taangz phraz keui, aez kuanz mai mih keui teuk ngarz an keuh.’

³⁰ Ihz maang kaw daz, ‘Nam anz keuiz paz Abraham! Beuk ihz yam meu rae imz lan lao keuh ne keuh te caanz reung dengz kawi.’

³¹ Keuiz daz Abraham kaw daz, ‘Beuk keuh nam teuk ngarz Moses boh ihz taangz phraz keui kaw ihz yam meu rae imz lan lao keuh kaw keuh te nam teuk ngarz.’”